מגדל־עז או תמת ישרים· רבי משה חיים לוצאטו [הרמח"ל]
חלק רביעי · ענין ו
(עדה ושמעי)
עדה:
הִנֵּה כְבָר מֵתָה שְׁלוֹמִית תֶּהִי,
עַתָּה יְהִי שָׁלוֹם יְדִידִי סֶלָה.
שמעי:
תּוֹדָה וְקוֹל זִמְרָה שְׂאוּ וָרֹנּוּ,
סַלְעֵי נְאוֹת הָרִים וְכַנְפוֹת אָרֶץ;
שִׂמְחוּ, עֲצֵי הַיַּעַר,
כָּל־בַּהֲמוֹת שָׂדַי וְרוֹעֵי דֶשֶׁא,
בָּחוּר, בְּתוּלָה, שָׂב וְיָשִׁישׁ יָחַד,
כָּל־מַחַזִיקֵי שֵׁבֶט,
אָדוֹן וְעֶבֶד לוֹ בְּהָרֵי קֶדֶם.
עדה:
מַה־טּוֹב לְבַב שִׁמְעִי וּמַה־שָּׂמֵחַ!
שמעי:
עוֹשֶׂה גְּדוֹלוֹת, מַה־מְּאֹד גָּדַלְתָּ!
מִי יַעֲרֹךְ אֵלֶיךָ,
אוֹ כָל־תְּהִלָּתֶךָ
מִי זֶה אֲשֶׁר יַשְׁמִיעַ? –
שָׁלֹום, עֲדָה! שָׁמַעַתְּ
אֶת כָּל־אֲשֶׁר בָּאַתְנוּ?
עדה:
הִנֵּה בְלִבִּי עַתָּה
זֹאת חוֹשְׁבָה הָיִיתִי:
מַה־זֶּה אֲשֶׁר תִּשְׂמַח, וְכֹה שָׂשׂ אָתָּה?
הִנֵּה שְׁלוֹמִית מֵתָה.
שמעי:
מַה־תֹּאמְרִי? הִנֵּה שְׁלוֹמִית מֵתָה?
חַיָּה שְׂמֵחָה הִיא, וְגַם נִתָּנָה
אִשָּׁה לְשָׁלוֹם.
עדה:
מָה? וְלֹא לַמָּוֶת
נִגְזַר כְּבָר דָּתָה?
שמעי:
כְּבָר לַמָּוֶת
נִגְזַר וְגַם נוֹשָׁעָה.
עדה:
אֶשְׁמַע אֲנִי אוֹ אֶחֱלֹם לִשְׁמֹעַ?
שמעי:
עִמִּי, אֲחוֹתִי, בֹאִי,
כִּי כָל־אֲשֶׁר־אָמַרְתִּי
גַּם אַתְּ הֲלֹא תִרְאִי בְּבֵית הַמֶּלֶךְ.
אַךְ לוּ אֲחוֹתִי, שָׁמָּה
הָיִית, כְּבָר יָדַעְתִּי
כִּי גַם שְׂשׂוֹנֵךְ יִרֶב,
כִּרְבוֹת שְׂשׂוֹנִי עָתָּה. –
מַה־טּוֹב מְנָת חֶלְקֶךָ,
שָׁלוֹם יְדִיד נַפְשִׁי, וּמַה־נָּעֵמָה!
אֵיךְ נַהֲפֹךְ חַבְלֶךָ
מִמָּר לְמָתוֹק פֶּתַע;
פִּתְאֹם לְאוֹר מֵחשֶׁךְ,
מִנַחֲלֵי יָגוֹן וְחַבְלֵי עֹנִי
אֶל־נַחֲלֵי שָׂשׂוֹן וְשִׂמְחַת נָפֶשׁ;
מֵרִדְתְּךָ אָבֵל וּמָר אֶל־קֶבֶר
לָשׂוּשׂ בְּצֵל חֻפָּה בְּכִסֵּא מֶלֶךְ.