תפסיר רס"ג· רב סעדיה גאון
שמות · פרק יא
א פקאל אללה למוסי קד בקי בלא ואחד אתי בה עלי פרעון ועלי אלמצריין בעד ד̇לך יטלקכם מן ההנא פענד אטלאקה ג̇מלה יטרדכם מן ההנא
ב מר אלקום אן יסתוהב אלרג̇ל מן צאחבה ואלמראה מן צאחבתהא אניה פצ̇ה ואניה ד̇הב
ג פאעטא אללה אלקום חט̇אא ענד אלמצריין ואמא מוסי אלרסול פעט̇ים ג̇דא פי ג̇מיע בלד מצר ענד קואד פרעון וענד אלקום
ד פקאל מוסי כד̇א קאל אללה פי נצף אלליל אנא מתג̇לי פי בלד מצר
ה פימות כל בכר פיה מן בכר פרעון אלג̇אלס עלי כרסיה אלי בכר אלאמה אלתי ורא אלרחא וסאיר בכור אלבהאים
ו ויכון צראך̇ עט̇ים פי ג̇מיע בלד מצר מא לם יכן מת̇לה ולא יעוד מת̇לה
ז ולג̇מיע בני אסראיל לא ינבח כלב בפיה פמא פוקה מן אלאד̇א מן נאסהם אלי בהאימהם לכי תעלמו מא יבין אללה בין אלמצריין ובין אלאסראיליין
ח פינחדר ג̇מיע קואדך האולי אלי ויסג̇דון לי קאילין אכ̇רג̇ אנת וג̇מיע אלקום אלד̇י מעך ובעד ד̇לך אכ̇רג̇ פכ̇רג̇ מן ענד פרעון בשדה גצ̇ב
ט ת̇ם קאל אללה אלי מוסי לא יקבל מנכמא פרעון לכי תכת̇ר בראהיני פי בלד מצר
י ומוסי והרון צנעא ג̇מיע הד̇ה אלבראהין בחצ̇רתה פשדד אללה קלבה ולם יטלק בני אסראיל מן בלדה