תפסיר רס"ג· רב סעדיה גאון
שמות
פרק א
א הד̇ה אסמא בני אסראיל אלדאכ̇לין אלי מצר מע יעקוב רג̇ל ואלה דכ̇לו
ב ראובן שמעון לוי ויהודה
ג יששכר זבולן ובנימן
ד דן ונפתלי גד ואשר
ה וכאן ג̇מלה אלנפוס אלכ̇ארג̇ה מן צלב יעקוב סבעין נפסא מע יוסף אלד̇י כאן במצר
ו ת̇ם מאת יוסף וג̇מיע אכ̇ותה וג̇מיע אהל ד̇לך אלג̇יל
ז ובנו אסראיל את̇מרו וסעו וכת̇רו ועט̇מו ג̇דא ג̇דא ואמתלי ד̇לך אלבלד מנהם
ח וקאם מלך ג̇דיד עלי מצר מן לם ישאהד יוסף
ט וקאל לקומה הוד̇א קום בני אסראיל אכת̇ר ואעט̇ם מנא
י תעאלו נחתאל להס כילא יכת̇רון פיכון אד̇א ואפאנא חרב אנצ̇אפו הם איצ̇א אלי אעדאינא פחארבונא ואהרבונא מן אלבלד
יא פצירו עליהם רוסא ד̇מה לקבל אן יעד̇בוהם בנקלהם פבנו קרי מכ̇אזן לפרעון פי אלפיום ופי עין אלשמס
יב וכלמא עד̇בוהם כד̇אך יכת̇רון ויזדאדון חתי צ̇ג̇רו מן קבל בני אסראיל
יג ואסתכ̇דם אלמצריון בבני אסראיל באקמא
יד ואמרו חיאתהם בכ̇דמה צעבה באלטין ואללבן וסאיר אעמאל אלצחרא וג̇מיע כ̇דמתהם אלתי אסתכ̇דמוהם באקמא
טו ת̇ם קאל מלך מצר ללקואבל אלעברניאת אלתי אסם אחדאהמא שפרה ואלאכ̇רי פועה
טז קאל אד̇א קבלתן אלעבראניאת פאנט̇רן ענד אלמת̇בר אן כאן אבנא פאקתלנה ואן כאנת אבנה פאסתבקינהא
יז פכ̇אפת אלקואבל אללה ולם יצנען מא קאל להן מלך מצר פאסתבקון אלבנין
יח פדעי בהן מלך מצר וקאל להן מא באלכן צנעתן הד̇א אלאמר ואסתבקיתן אלבנין
יט קלתא לה ליס כאלנסא אלמצריאת אלעבראניאת בל הן בציראת וקבל אן תדכ̇ל אליהן אלקאבלה ילדן
כ פאחסן אללה אלי אלקואבל פכת̇ר אלקום ועט̇מו ג̇דא
כא ולמא כ̇אף אלקואבל אללה צנע להן ביותא חג̇בהן
כב ת̇ם אמר פרעון ג̇מיע קומה קאילא כל אבן יולד להן אטרחוה פי אלניל וכל אבנה אסתבקוהא
פרק ב
א ת̇ם מצ̇י רג̇ל מן אללוי פתזוג̇ באבנה לוי
ב פחמלת וולדת אבנא ולמא ראתה חסנא אכ̇פתה ת̇לת̇ה שהור
ג ולם תטק אן תכ̇פיה זיאדה פאכ̇ד̇ת לה תאבותא מן ברדי וקפרתה באלקפר ואלזפת וצירת פיה אלצבי וצירתה באלדיס עלי שאטי אלניל
ד ווקפת אכ̇תה מן בעיד לתנט̇ר מה יצנע בה
ה פנזלת אבנה פרעון לתגתסל פי אלניל וכאן ג̇ואריהא ימשין עלי שאטיה פראת אלתאבות פי וסט אלדיס פמדת ידהא פאכ̇ד̇תה
ו ופתחתה פראת בצבי יבכי פשפקת עליה וקאלת הד̇א מן אולאד אלעבראניין
ז קאלת להא אכ̇תה אאמצ̇י ואדעי לך במראה מרצ̇ע מן אלעבראניאת תרצ̇עה לך
ח קאלת להא אבנת פרעון אמץ̇ פמצ̇ת אלג̇אריה ודעת באם אלצבי
ט קאלת להא אבנה פרעון הא לך הד̇א אלצבי ארצ̇עיה לי ואנא אעטיך אג̇רתך פאכ̇ד̇ת אלמראה אלצבי וארצ̇עתה
י ולמא כבר אלצבי ג̇את בה אלי אבנה פרעון וצאר להא כאבן וסמתה מוסי קאלת לאני נשלתה מן אלמא
יא וכאן פי תלך אלאיאם אן מוסי כבר וכ̇רג̇ אלי אכ̇ותה ונט̇ר פי נקלהם פאד̇א ברג̇ל מצרי יצ̇רב רג̇לא עבראניא מן אכ̇ותה
יב פאלתפת ימנה ויסרה פראי אנה ליס אנסאן פצ̇רב אלמצרי פמאת ודפנה פי אלרמל
יג ת̇ם כ̇רג̇ פי אליום אלת̇אני פאד̇א ברג̇לין עבראניין יתנאצאן פקאל ללט̇אלם לם תצ̇רב צאחבך
יד פקאל מן צירך רג̇לא רייסא וחאכמא עלינא אתריד אן תקתלני כמא קתלת אלמצרי פפזע מוסי וקאל אד̇ן קד ערף אלאמר
טו ולמא סמע פרעון בהד̇א אלכ̇בר טלב אן יקתל מוסי פהרב מוסי מן בין ידיה וצאר אלי בלד מדין וג̇לס עלי ביר מא
טז וכאן לאמאם מדין סבע בנאת פג̇את ודלת ומלאת אלאחואץ̇ לתסקי גנם אביהן
יז ולמא ג̇או אלרעאה פטרדוהן קאם מוסי פאגאת̇הן וסקי גנמהן
יח ולמא ג̇ין אלי רעואל אביהן קאל מא באלכן אסרעתן באלמג̇י אליום
יט קלן רג̇ל מצרי כ̇לצנא מן יד אלרעאה ואיצ̇א דלא לנא וסקי אלגנם
כ קאל להן ואין הו לם תרכתן אלרג̇ל אדעין בה יאכל טעאמא
כא פלמא אמען מוסי פי אלמקאם ענד אלרג̇ל זוג̇ה בצפורה אבנתה
כב פולדת אבנא וסמאה גרשם לאנה קאל צרת גריבא פי בלד אלגרבה
כג וכאן איצ̇א פי תלך אלאיאם אלטוילה ואנברץ מאת מלך מצר פתנהדו בנו אסראיל מן כ̇דמתהם וצרכ̇ו פצעד שהיקהם אלי אללה מן אלכ̇דמה
כד פסמע אללה שהיקהם וד̇כר עהדה אלד̇י מע אברהים ואסחק ויעקוב
כה ונט̇ר אללה אלי בני אסראיל ורחמהם
פרק ג
א וכאן מוסי ירעא גנם יתרו חמיה אמאם מדין פסאקהא אלי טרף אלבריה חתי ג̇א אלי ג̇בל אללה אלי חריב
ב פתג̇לי לה מלאך אללה בצ̇רים נאר מן אלסנא פראי אלסנא משתעל באלנאר והו ליס יחתרק
ג פקאל מוסי אמיל אלאן ואנט̇ר הד̇א אלמנט̇ר אלעג̇יב מא באל אלסנא לא יחתרק
ד פעלם אללה אנה קד מאל לינט̇ר פנאדאה מן אלסנא וקאל יא מוסי יא מוסי קאל לביך
ה קאל לא תתקדם אלי הנא אנזע נעליך ען רג̇ליך פאן אלמוצ̇ע אלד̇י אנת ואקף עליה מקדס
ו ת̇ם קאל אנא אלאה אביך אברהים ואסחק ויעקוב פסתר מוסי וג̇הה אד̇ כ̇אף אן ינט̇ר אלי נור אללה
ז ת̇ם קאל אללה נט̇רת לצ̇עף קומי אלד̇י במצר וסמעת צראכ̇הם מן קבל ג̇לאוזתהם ועלמת באוג̇אעהם
ח פתג̇לית לאכ̇לצהם מן יד אלמצריין ואצעדהם מן ד̇לך אלבלד אלי בלד ג̇יד ואסע בלד יפיץ̇ אללבן ואלעסל אלי מוצ̇ע אלכנעיין ואלחתיין ואלאמוריין ואלפרזיין ואלחויין ואליבוסיין
ט ואלאן הוד̇א צראך̇ בני אסראיל קד וצל אלי וראית אלצ̇גט אלד̇י אלמצריון יצ̇אגטונהם
י פתעאל אלאן אבעת̇ בך אלי פרעון ואכ̇רג̇ קומי בני אסראיל מן בלד מצר
יא קאל מוסי ללה מן אנא חתי אמצ̇י אלי פרעון ואכ̇רג̇ בני אסראיל מן בלד מצר
יב קאל אנא אכון מעך והד̇ה איה לך אני בעת̇ת בך ואד̇א אכ̇רג̇ת אלקום מן מצר תעבדון אללה עלי הד̇א אלג̇בל
יג וקאל מוסי ללה הא אנא סאיר אלי בני אסראיל פאקול להם אלאה אבאיכם בעת̇ני אליכם פאן קאלו לי מא אסמה מא אקול להם
יד קאל לה אלאזלי אלד̇י לא יזול קאל כד̇א קל לבני אסראיל אלאזלי בעת̇ני אליכם
טו וקאל לה איצ̇א כד̇א קל לבני אסראיל אללה אלאה אבאיכם אלאה אברהים ואסחק ויעקוב בעת̇ני אליכם הד̇א אסמי אלי אלדהר והד̇א ד̇כרי אלי ג̇יל ואג̇יאל
טז אמץ̇ פאג̇מע שיוך̇ בני אסראיל וקל להם אללה אלאה אבאיכם תג̇לי אלי אלאה אברהים ואסחק ויעקוב קאילא קד ד̇כרתכם ומא צנע בכם במצר
יז פקלת אצעדכם מן עד̇אב אלמצריין אלי מוצ̇ע אלכנעאניין ואלחתיין ואלאמוריין ואלפריזיין ואלחויין ואליבוסיין אלי בלד יפיץ̇ אללבן ואלעסל
יח פאד̇א קבלו מנך אדכ̇ל אנת ושיוך̇ בני אסראיל אלי מלך מצר וקולו לה אללה אלאה אלעבראניין ואפאנא אמרה פאלאן נסיר אלאן מסיר ת̇לת̇ה איאם פי אלבר ונקרב ללה רבנא
יט ואנא אעלם אן מלך מצר לא ידעכם אן תמצ̇ו ולא ביד ואחדה שדידה
כ חתי אבעת̇ באפתי פאצ̇רב אלמצריין בג̇מיע אעג̇ובאתי אלתי אצנעהא פי מא בינהם ובעד ד̇לך יטלקכם
כא ואעטי אלקום חט̇אא ענד אלמצריין פאד̇א מצ̇יתם לא תמצ̇ו פרגא
כב בל תסתוהב אלמראה מן מסאכנתהא וג̇ארתהא אניה פצ̇ה וד̇הב ות̇יאבא תצירונהא עלי בניכם ובנאתכם ותנתצפון מן אלמצריין
פרק ד
א פאג̇אב מוסי וקאל לעלהם לא יומנון בי ולא יקבלון מני בל יקולון לם יתג̇לי לך אללה
ב פקאל אללה לה מנבהא מא ד̇א בידך קאל עצא
ג קאל אטרחהא עלי אלארץ̇ פטרחהא פצארת ת̇עבאנא פהרב מוסי מן בין ידיה
ד קאל אללה לה מד ידך ואמסך ד̇נבה פלמא מד ידה פאמסכה פצאר עצא פי ידה
ה לכי יומנו אן קד תג̇לי לך אללה אלאה אבאיהם אברהים ואסחק ויעקוב
ו וקאל לה איצ̇א אדכ̇ל ידך אלי כמך פאדכ̇להא ת̇ם אכ̇רג̇הא פאד̇א בהא ביצ̇א כאלת̇לג̇
ז וקאל לה איצ̇א ארדד ידך אלי כמך ורדהא ת̇ם אכ̇רג̇הא וקד עאדת כסאיר בדנה
ח קאל פאן לם יומנו בך ולם יקבלו אלאיה אלאולי פיומנון באלאיה אלת̇אניה
ט קאל פאן לם יומנו בהאתין אלאיתין ולם יקבלו מנך כ̇ד̇ מן מא אלניל ואצכבה עלי אליבס פאנה ינקלב ויציר דמא פי אליבס
י קאל מוסי לרבה יא רב ליס אנא ד̇ו נטק מן אמס ומא קבלה ולא מן חין כ̇אטבת עבדך אני ת̇קיל אלפם ואללסאן ג̇מיעא
יא קאל לה אללה מן כ̇לק נטקא ללאנסאן או מן יכ̇לק אלאכ̇רם או אלאצם או אלבציר או אלאעמי אליס אנא אללה
יב פאמץ̇ אלאן פאנא אכון מע קולך ואדלך עלי מא תתכלם בה
יג קאל יא רבי אבעת̇ מן אנת באעת̇ה
יד ואשתד גצ̇ב אללה עלי מוסי וקאל אליס הרון אכ̇וך אלליואני אנא אעלם אנה מתכלם והוד̇א הו כ̇ארג̇ תלקאך פינט̇ר אליך ויסר פי נפסה
טו פכלמה וציר הד̇א אלכלאם פי פיה פאנא אכון מע קולך וקולה ואדלכמא עלי מא תצנעון
טז פיכלם הו לך אלקום ויכון לך תרג̇מאנא ואנת תכון לה אסתאד̇א
יז וכ̇ד̇ הד̇ה אלעצא בידך תצנע בהא אלמעג̇זאת
יח פמצ̇י מוסי ורג̇ע אלי יתר חמיה וקאל לה אמצ̇י וארג̇ע אלי אכ̇ותי אלד̇ין במצר ואנט̇ר הל הם באקיון קאל לה אמץ̇ בסלאם
יט ת̇ם קאל אללה למוסי במדין אמץ̇ ארג̇ע אלי מצר פאן קד מאת ג̇מיע אלקום אלטאלבין נפסך
כ פאכ̇ד̇ מוסי זוג̇תה וולדיה וארכבהם עלי חמאר ובעת̇ בהם ורג̇ע אלי בלד מצר ואכ̇ד̇ אלעצא אלד̇י אמרה אללה בהא פי ידה
כא ת̇ם קאל אללה לה פי מצ̇יך לתרג̇ע אלי מצר אנט̇ר ג̇מיע אלבראהין אלתי צירתהא פי ידך ואצנעהא בין ידי פרעון ואנא אשדד קלבה ולא יטלק אלקום
כב פקל לה כד̇א קאל אללה משרפא אבני בכרי אסראיל
כג פקלת לך אטלך אבני יעבדני פאן אבית אן תטלקה הא אנא קאתל אבנך בכרך
כד ולמא כאן פי אלטריק פי אלמבית פאג̇א ולדה מלאך אללה פטלב קטלה
כה פאכ̇ד̇ת צפורה צואנא פקטעת קלפה אבנהא וקדמתה בין ידיה וקאלת כאד אלערוס אן יכון מקטולא
כו פכף ענה חיניד̇ קאלת צאר אלערוס אלמקטול מכ̇תונא
כז ת̇ם קאל אללה להרון אמץ̇ תלקא מוסי פי אלבר פמצ̇א פואפאה פי ג̇בל אללה פקבלה
כח פאכ̇ברה מוסי בג̇מיע כלאם אללה אלד̇י בעת̇ה בה וג̇מיע אלאיאת אלתי אמרה אללה
כט פמצ̇א מוסי והרון וג̇מעא ג̇מיע שיוך̇ בני אסראיל
ל וכלמהם הרון בג̇מיע אלכלאם אלד̇י כלם אללה מוסי וצנע אלמעג̇זאת בחצ̇רה אלקום
לא פאמן אלקום אד̇ סמעו אן אללה קד ד̇כר בני אסראיל ונט̇ר צ̇עפהם וכ̇רו וסג̇דו
פרק ה
א ובעד ד̇לך דכ̇ל מוסי והרון וקאלא לפרעון כד̇א קאל אללה אלאה אסראיל אטלק קומי יחג̇ון לי פי אלבר
ב קאל פרעון מן אללה חתי אקבל מנה ואטלק בני אסראיל לא אערף אללה ולא אטלק בני אסראיל איצ̇א
ג קאלא אלאה אלעבראניין ואפאנא אמרה נמצ̇י מסיר ת̇לת̇ה איאם פי אלבר ונקרב ללה רבנא כילא יפאג̇ינא בובא או בסיף
ד קאל להמא מלך מצר לם יא מוסי והרון תג̇ד̇באן אלקום ען אעמאלהם אמצ̇ו אלי נקלכם
ה ת̇ם קאל אמן כת̇רה אהל אלבלד חתי תעטלאהם מן נקלהם
ו ואמר פרעון פי ד̇לך אליום ג̇לאוזה אלקום וערפאהם קאילא
ז לא תעודו אן תעטו תבנא לילבנו אללבן מת̇ל אמס ומא קבלה בל הם ימצ̇ון ויקמשון להם תבנא
ח וצ̇ראיב אללבן אלתי כאנו יצנעונהא אמסא ומא קבלה צירוהא עליהם ולא תנקצון מנהא לאנהם מרפהון ולד̇לך יצרכ̇ון ויקולון נמצ̇י נקרב לרבנא
ט ית̇קל אלעמל עלי אלקום פישתגלו בה ולא ישתגל באמור באטלה
י פכ̇רג̇ ג̇לאוזה אלקום וערפאהם וקאלו להם כד̇א קאל פרעון ליס אעטיכם תבנא
יא אנתם אמצ̇ו וכ̇ד̇ו לכם תבנא חית̇ מא תג̇דון ואעלמו אן לא ינקץ מן עמלכם שי
יב ותבדד אלקום פי ג̇מיע בלד מצר ליקמשו קשא ללתבן
יג ואלג̇לאוזה מלחון קאילין אכמלו עמלכם אמר יום ביום כמא כאן פי וקת אעטא אלתבן
יד פצ̇רב ערפא בני אסראיל אלד̇ין ולוהם עליהם ג̇לאוזה פרעון וקאלו להם מא באלכם לם תכמלו צ̇ראיבכם אן תלבנו מת̇ל אמס ומא קבלה איצ̇א אמס ואליום
טו וג̇א ערפא בני אסראיל ואסתגאת̇ו אלי פרעון קאילין לם תצנע כד̇א בעבידך
טז תבן לם ידפע אלינא ויקולון לנא אצ̇רבו לבנא הוד̇א עבידך מצ̇רובון ממא יכ̇טי עליהם קומך
יז קאל אנתם מרפהון ולד̇לך תקולון נמצ̇י נקרב לרבנא
יח ואלאן אמצ̇ו אעמלו ותבן לא יעטי לכם וצ̇ראיבכם תופון
יט פנט̇ר ערפא בני אסראיל אנהם בשר וקאלו לא תנקצו מן לבנכם אמר יום ביום
כ ופאג̇ו מוסי והרון ואקפון תלקאהם ענד כ̇רוג̇הם מן ענד פרעון
כא פקאלו להמא ינט̇ר אללה ויחכם עליכם כמא אפסדתמא חאלנא ענד פרעון וענד קואדה חתי לו אן סיפא פי ידהם לקתלונא
כב פרג̇ע מוסי אלי אללה וקאל יא רב לם אבלית הולאי אלקום ולם ד̇א בעת̇ת בי
כג ומן חיתי דכ̇לת אלי פרעון פכ̇אטבתה באסמך אסא אליהם ולם תכ̇לצהם מן ד̇לך
פרק ו
א קאל אללה למוסי אלאן תנט̇ר מא אצנע לפרעון אנה סיטלקהם ביד שדידה ויטרדהם מן בלדה ביד שדידה
ב ת̇ם כלם אללה מוסי וקאל לה אנא אללה
ג אלד̇י תג̇לית לאברהים ואסחק ויעקוב באלטאיק אלכאפי ואסמי אללה פקט לם אערפהם
ד ואיצ̇א ת̇בת עהדי מעהם לאעטיהם בלד כנעאן בלד סכנאהם אלד̇י סכנוה
ה ואיצ̇א אני קד סמעת שהיק בני אסראיל ממא אלמצריון יסתכ̇דמונהם פד̇כרת עהדי
ו לד̇לך קל לבני אסראיל אנא אללה לאכ̇רג̇כם מן נקל אלמצריין ואכ̇לצכם מן כ̇דמתהם ואפככם בד̇ראע ממדודה ובאחכאם עט̇ימה
ז ואתכ̇ד̇כם לי אמה ואכון לכם אלאהא ותעלמון אנני אללה רבכם אלמכ̇רג̇כם מן נקל אלמצריין
ח ואדכ̇לכם אלי אלבלד אלד̇י אקסמת באמרי אן אעטיה לאברהים ואסחק ויעקוב פאעטיה לכם חוזא אנא אללה אפי בד̇לך
ט פכלם מוסי בד̇לך בני אסראיל ולם יקבלו מנה מן צ̇יק ארואחהם ומן כ̇דמתהם אלצעבה
י ת̇ם כלם אללה מוסי תכלימא
יא אדכ̇ל כלם פרעון מלך מצר פי אן יטלק בני אסראיל מן בלדה
יב וכלם מוסי בין ידי אללה קאילא הוד̇א בנו אסראיל לם יקבלו מני פכיף יסמע מני פרעון ואנא אלת̇ג אלפם
יג פכלם אללה מוסי והרון ווצאהמא בסבב בני אסראיל ופרעון מלך מצר אן יכ̇רג̇א בני אסראיל מן בלד מצר
יד האולי רוסא ביות אבאיהם בנו ראובן בכר אסראיל חנוך ופלוא חצרן וכרמי האולי עשאיר ראובן
טו ובנו שמעון ימואל וימין ואהד ויכין וצחר ושאול אבן אלכנעאניה האולי עשאיר שמעון
טז והד̇ה אסמא בני לוי עלי תאלידהם גרשון וקהת ומררי וסנו חיוה לוי מיאה וסבע ות̇לת̇ון סנה
יז ובנו גרשון לבני ושמעי לעשאירהם
יח ובנו קהת עמרם ויצהר וחברון ועזיאל וסנו חיותה מיאה ות̇לת̇ ות̇לת̇ון סנה
יט ובנו מררי מחלי ומושי האולי עשאיר אלליואניין עלי תאלידהם
כ פתזוג̇ עמרם ביוכבד עמתה קבל אן תחט̇ר פולדת לה הרון ומוסי וכאן סנו חיותה מיאה וסבע ות̇לת̇ין סנה
כא ובנו יצהר קרח ונפג וזכרי
כב ובנו עזיאל מישאל ואלצפן וסתרי
כג פתזוג̇ הרון באלישבע בנת עמינדב אכ̇ת נחשון פולדת לה נדב ואביהוא ואלעזר ואיתמר
כד ובנו קרח אסיר ואלקנה ואביאסף הד̇ה עשאיר אלקרחיין
כה ואלעזר אבן הרון תזוג̇ במראה מן בנאת פוטיאל פולדת לה פינחס האולי רוסא אבא אלליואניין לעשאירהם
כו המא הרון ומוסי אללד̇אן קאל להמא אללה אכ̇רג̇א בני אסראיל מן בלד מצר עלי ג̇יושהם
כז המא אלמכ̇אטבאן פרעון מלך מצר ליכ̇רג̇א בני אסראיל מן בלד מצר המא מוסי והרון
כח ולמא כאן יום כ̇אטב אללה מוסי פי בלד מצר
כט וקאל אללה למוסי קאילא אנא אללה כלם פרעון מלך מצר בג̇מיע מא אמרך בה
ל וקאל מוסי בין ידי אללה הוד̇א אנא אלתיג אלפם וכיף יסמע מני פרעון