אור ברסלב
תפסיר רס"ג בראשית

תפסיר רס"ג· רב סעדיה גאון

בראשית

הקדמה

פרק א

א אול מא כ̇לק אללה אלסמאואת ואלארץ̇

ב ואלארץ̇ כאנת גאמרה ומסתבחרה וט̇לאם עלי וג̇ה אלגמר וריח אללה תהב עלי וג̇ה אלמא

ג ושא אללה אן יכון נור פכאן נור

ד פלמא עלם אללה אן אלנור ג̇יד פצל אללה בין אלנור ובין אלט̇לאם

ה וסמא אללה אוקאת אלנור נהארא ואוקאת אלט̇לאם סמאהא לילא ולמא מצ̇י מן אלליל ואלנהאר יום ואחד

ו שא אללה אן יכון ג̇לד פי וסט אלמא ויכון פאצלא בין מאיין

ז פצנע אללה אלג̇לד ופצל בין אלמא אלד̇י מן דונה ובין אלמא אלד̇י מן פוקה פכאן כד̇אך

ח וסמא אללה אלג̇לד סמאא ולמא מצ̇י מן אלליל ואלנהאר יום ת̇אן

ט שא אללה אן תג̇תמע אלאמיא מן תחת אלסמא אלי מוצ̇ע ואחד ויט̇הר אליבס פכאן כד̇אך

י פסמא אללה אליבס ארצ̇א ומלאם אלמא סמאהא בחארא פעלם אללה אן ד̇לך ג̇יד

יא ושא אללה אן תכלא אלארץ̇ כלאא ועשבא ד̇א חב ושג̇רא ד̇א ת̇מר מכ̇רג̇ ת̇מר לאצנאפה מא גרסה מנה עלי אלארץ̇ וכאן כד̇אך

יב ואכ̇רג̇ת אלארץ̇ כלאא ועשבא ד̇א חב לאצנאפה ושג̇רא מכ̇רג̇ ת̇מר מא גרסה מנה לאצנאפה פעלם אללה אן ד̇לך ג̇יד

יג ולמא מצ̇י מן אלליל ואלנהאר יום ת̇אלת̇

יד שא אללה אן תכון אנואר פי ג̇לד̇ אלסמא ותפרז בין אלנהאר ואלליל פיכונאן איאת ואוקאתא ואיאמא וסנין

טו ותכון אלאנואר פי ג̇לד̇ אלסמא לתצ̇י עלי אלארץ̇ פכאן כד̇אך

טז פצנע אללה אלנירין אלעט̇מין אלניר אלאכבר ללאצ̇אה פי אלנהאר ואלניר אלאצגר ללאצ̇אה פי אלליל ואלכואכב

יז וג̇עלהם אללה פי ג̇לד̇ אלסמא ליצ̇ו עלי אלארץ̇

יח וללאצ̇אה פי אלנהאר ופי אלליל ואלתפרד בין אלנור ואלט̇לאם פעלם אללה אן ד̇לך ג̇יד

יט ולמא מצ̇י מן אלליל ואלנהאר יום ראבע

כ שא אללה אן יסעי מן אלמא סאע ד̇ו נפס חיה וטאיר יטיר עלי אלארץ̇ קבאלה ג̇לד אלסמא

כא פכ̇לק אללה אלתנאנין אלעט̇אם וסאיר אלנפוס אלחיה אלדאבה אלתי סעת מן אלמא לאצנאפהא וכל טאיר ד̇י ג̇נאך̇ לאצנאפה פעלם אללה אן ד̇לך ג̇יד

כב ובארך אללה פיהם וקאל להם חכמא את̇מרו ואכת̇רו ועמו אלמא פי אלבחאר ואלטאיר יכת̇ר פי אלארץ̇

כג ולמא מצ̇י מן אלליל ואלנהאר יום כ̇אמס

כד שא אללה אן תכ̇רג אלארץ̇ נפוסא חיה לאצנאפהא בהאים ודביבא ווחש אלארץ̇ לאצנאפה וכאן כד̇אך

כה וצנע אללה וחש אלארץ̇ לאצנאפה ואלבהאים לאצנאפהא וסאיר דביב אלארץ̇ לאצנאפה פעלם אללה אן ד̇לך ג̇יד

כו וקאל אללה נצנע אנסאנא בצורתנא כשבהנא מסלטא יסתולון עלי סמך אלבחר וטאיר אלסמא ואלבהאים וג̇מיע אלארץ̇ וסאיר אלדביב אלדאב עליהא

כז פכ̇לק אללה אדם בצורתה בצורה שריפה מסלטא כ̇לקה ד̇כרא ואנת̇י כ̇לקהמא

כח ובארך פיהמא אללה וקאל להמא את̇מרו ואכת̇רו ועמו אלארץ̇ ואמלכוהא ואסתולו עלי סמך אלבחר וטאיר אלסמא וסאיר אלחיואן אלדאב עלי אלארץ̇

כט וקאל אללה הוד̇א קד אעטיתכם כל עשב ד̇י חב אלד̇י עלי וג̇ה ג̇מיע אלארץ̇ וכל שג̇ר פיה ת̇מר ד̇ו חב יכון לכם טעאמא

ל ולג̇מיע וחש אלארץ̇ וג̇מיע טאיר אלסמא וסאיר מא דב עלי אלארץ̇ אלד̇י פיה נפס חיה אלי אן ג̇מיע כ̇צ̇ר אלעשב מאכלא פכאן כד̇אך

לא ולמא עלם אללה אן ג̇מיע מא צנעה ג̇יד ג̇דא ולמא מצ̇י מן אלליל ואלנהאר יום סאדס

פרק ב

א כמלת אלסמא ואלארץ̇ וג̇מיע ג̇יושהם

ב ואכמל אללה פי אליום אלסאבע כ̇לקה אלד̇י צנעה ועטל פיה אן יכ̇לק שיא מן מת̇ל כ̇לקה אלד̇י צנעה

ג ובארך פיה וקדסה אד̇ עטל פיה אן יכ̇לק שיא מן מת̇ל כ̇לקה אלד̇י צנעה

ד הד̇א שרח נואשי אלסמאואת ואלארץ̇ אד̇ כ̇לקתא פי וקת צנע אללה אלארץ̇ ואלסמא

ה ואן ג̇מיע שג̇ר אלצחרא קבל אן יכון פי אלארץ̇ וג̇מיע עשבהא קבל אן ינבת אד̇ לם ימטר אללה עליהא ולא אנסאן כאן יפלחהא

ו ולא בכ̇אר כאן יצעד מנהא פיסקי ג̇מיע וג̇ההא

ז ואן אללה כ̇לק אדם תראבא מן אלארץ̇ ונפך̇ פי אנפה נסמה אלחיוה פצאר אדם נפסא נאטקה

ח וגרס אללה ג̇נאנא פי עדן שרקיא וציר ת̇ם אדם אלד̇י כ̇לקה

ט ואנבת אללה מן אלארץ̇ כל שג̇רה חסן מנט̇רהא וטיב מאכלהא ושג̇רה אלחיוה פי וסט אלג̇נאן ושג̇רה מערפה אלכ̇יר ואלשר

י ונהר יכ̇רג̇ מן עדן יסקי אלג̇נאן ומן ת̇ם יפתרק ויציר לארבעה רוס

יא אסם אחדהא אלניל והו מחיט בג̇מיע בלד זוילה אלד̇י ת̇ם אלד̇הב

יב וד̇הב ד̇לך אלבלד ג̇יד ת̇ם אללולו וחג̇ארה אלבלור

יג ואסם אלנהר אלת̇אני גיחון והו מחיט בג̇מיע בלד אלחבשה

יד ואסם אלנהר אלת̇אלת̇ אלדג̇לה והו יסיר פי שרקי אלמוצל ואלנהר אלראבע הו אלפראת

טו ואכ̇ד̇ אללה אדם ואנזלה פי ג̇נאן עדן ליפלחהא וליחפט̇הא

טז ואמר אללה אדם קאילא מן ג̇מיע שג̇ר אלג̇נאן ג̇איז אן תאכל

יז ומן שג̇ר מערפה אלכ̇יר ואלשר לא תאכל פאנך פי יום תאכל מנהא תסתחק אן תמות

יח וקאל אללה לא כ̇יר פי בקא אדם וחדה אצנע לה עונא חד̇אה

יט פחשר אללה מן אלארץ̇ ג̇מיע וחש אלצחרא וטאיר אלסמא ואתי בהא אלי אדם לירא מא יסמיהא פכל מא סמאה אדם מן נפס חיה הו אסמה אלי אלאן

כ פסמא אדם אסמא לג̇מיע אלבהאים וטאיר אלסמא וג̇מיע וחש אלצחרא ולם יג̇ד אדם עונא חד̇אה

כא פאוקע אללה סבאתא עלי אדם לילא יחס פנאם ואסתל אחדי אצ̇לאעה וסד מכאנה בלחם

כב ובנא אללה אלצ̇לע אלתי אכ̇ד̇ אמראה פאתי בהא אלי אדם

כג פקאל אדם הד̇ה אלמרה שאהדת עט̇מא מן עט̇אמי ולחמא מן לחמי וינבגי אן תסמא אמראה לאנהא מן אמר אכ̇ד̇ת

כד לד̇לך יתרך אלרג̇ל אבאה ואמה וילזם זוג̇תה פיציראן כג̇סד ואחד

כה וכאנא ג̇מיעא עריאנין אדם וזוג̇תה ולא יחתשמאן מן ד̇לך

פרק ג

א ואלת̇עבאן צאר חכימא מן ג̇מיע חיואן אלצחרא אלד̇י כ̇לקה אללה פקאל ללאמראה איקינא קאל אללה לא תאכלא מן ג̇מיע שג̇ר אלג̇נאן

ב קאלת אלמראה ללת̇עבאן מן ג̇מיע ת̇מר שג̇ר אלג̇נאן נאכל

ג לכן מן ת̇מר אלשג̇רה אלתי פי וסטה קאל אללה לא תאכלא מנהא ולא תדנוא בהא כילא תמותא

ד וקאל להא לסתמא תמותאן

ה אן אללה עאלם אנכמא פי יום תאכלאן מנהא תנפץ עיונכמא ותציראן כאלמלאיכה עארפין אלכ̇יר ואלשר

ו פלמא ראת אלאמראה אן אלשג̇רה טיבה אלמאכל שהיה ללמנט̇ר מנאא ללעקל אכ̇ד̇ת מן ת̇מרהא פאכלת ואעטת בעלהא ואכל מעהא

ז פאנפצת עיונהמא פעלמא אנהמא עראיאנאן פכ̇יטא מן ורק אלתין מא צנעא מנה מיאזר

ח פסמעא צות אללה מארא פי אלג̇נאן ברפק כחרכה אלנהאר פאסתכ̇בא אדם וזוג̇תה חיאא מן בין ידי אללה פימא בין שג̇ר אלג̇נאן

ט פנאדא אללה אדם וקאל לה מקררא אין אנת

י קאל אני סמעת צותך פי אלג̇נאן פאתקית אד̇ אנא עריאן פאכ̇תבית

יא קאל מן אכ̇ברך אנך עריאן אמן אלשג̇ר אלתי אמרתך לא תאכל מנהא אכלת

יב קאל אדם אלאמראה אלתי ג̇עלתהא מעי הי אעטתני מן אלשג̇רה פאכלת

יג קאל אללה ללאמראה מא ד̇א צנעת קאלת אלת̇עבאן אגואני פאכלת

יד קאל אללה ללת̇עבאן אד̇ צנעת הד̇א בעלם פאנת מלעון מן ג̇מיע אלבהאים וג̇מיע וחש אלצחרא ועלי צדרך תסלך ותראבא תאכל טול איאם חיותך

טו ועדאוה אג̇עלהא בינך ובין אלאמראה ובין נסלך ובין נסלהא והו ישדכ̇ך אלראס ואנת תלד̇גה אלעקב

טז וקאל ללאמרה לאכת̇רן מן משקתך וחמלתך במשקה תלדין אלאולאד ואלי בעלך יכון קיאדך והו אלמתסלט עליך באלאכ̇תיאר

יז וקאל לאדם אד̇ קבלת קול זוג̇תך פאכלת מן אלשג̇רה אלתי אמרתך קאילא לא תאכל מנהא מלעונה אלארץ̇ בסבבך במשקה תאכל מנהא טול איאם חיותך

יח ושוכא ודרדרא תנבת לך ותאכל עשב אלצחרא

יט בערק וג̇הך תאכל אלטעאם אלי רג̇ועך אלי אלארץ̇ אלתי אכ̇ד̇ת מנהא לאנך תראב ואלי אלתראב תעוד

כ וסמי אדם אסם זוג̇תה חוה לאנהא כאנת אם כל חי נאטק מאית

כא וצנע אללה לאדם ולזוג̇תה ת̇יאב בדן ואלבסהמא

כב ת̇ם קאל אללה הוד̇א אדם קד צאר כואחד מנא פי מערפה אלכ̇יר ואלשר ואלאן כילא ימד ידה פיאכ̇ד̇ מן שג̇רה אלחיוה איצ̇א ויאכל ויחיא אלי אלדהר

כג פטרדה אללה מן ג̇נאן עדן ליפלח אלארץ̇ אלתי אכ̇ד̇ מנהא

כד ולמא טרד אדם אסכן מן שרקי ג̇נאן עדן אלמלאיכה ולמע סיף מתקלב ליחפט̇ו טריק שג̇רה אלחיוה

פרק ד

א ואן אדם ואקע חוה זוג̇תה פחמלת וולדת קין פקאלת קד רזקת רג̇לא מן ענד אללה

ב ת̇ם עאודת וולדת אכ̇אה הבל וכאן הבל ראעי גנם וקין כאן יפלח אלארץ̇

ג פלמא כאן בעד איאם אתי קין מן ת̇מר אלארץ̇ בהדיה ללה

ד והבל אתי הו איצ̇א מן בכור גנמה ומן סמאנהא פקבל אללה הבל והדיתה

ה וקין והדיתה לם יקבלהמא ואשתד עלי קין ג̇דא ווקע וג̇הה חיאא

ו וקאל אללה לקין לם אשתד עליך ולם וקע וג̇הך

ז אלא אן ג̇ודת קבלת ואד̇ לם תג̇וד פאינמא אתג̇הת כ̇טאך ראבץ̇ ואליך קיאדה ואנת אלמסלט עליה באלאכ̇תיאר

ח ת̇ם קאול קין הבל אכ̇אה פלמא כאנא פי אלצחרא קאם קין אלי הבל אכ̇יה פקתלה

ט פקאל אללה מקררא אין הבל אכ̇וך קאל לא אעלם אחאפט̇ אכ̇י אנא

י פקאל לה מא ד̇א צנעת צות דם אכ̇יך צארך̇ אלי מן אלארץ̇

יא ואלאן אנת מלעון מן אלארץ̇ אלתי פתחת פאהא וקבלת דם אכ̇יך מן ידך

יב באן תפלח אלארץ̇ ולא תעוד אן תעטיך קואהא נאיעא ונאידא תכון פי אלארץ̇

יג קאל קין ללה ד̇נבי אעט̇ם מן אן יגפר

יד פאן טרדתני אליום ען וג̇ה אלארץ̇ הל מן בין ידיך אנסתר ואן כנת נאיעא ונאידא פי אלארץ̇ כאן כל מן וג̇דני יקתלני

טו קאל אללה לד̇לך כל מן קתל קין יקאד בה כת̇ירא פג̇על אללה לקין איה לילא יקתלה כל מן וג̇דה

טז פכ̇רג̇ קין מן בין ידי אללה פאקאם בבלד נוד שרקי עדן

יז וואקע קין זוג̇תה פחמלת וולדת חנוך ת̇ם אנה בנא קריה פסמאהא באסם אבנה חנוך

יח ת̇ם ולד לחנוך עירד ועירד אולד מחויאל ומחויאל אולד מתושאל ומתושאל אולד למך

יט ואתכ̇ד̇ לה למך זוג̇תין אסם אחדאהמא עדה ואלאכ̇רי צלה

כ פולדת עדה יבל והו כאן אול מן סכן אלאכ̇ביה ומלך מאשיה

כא ואסם אכ̇יה יובל והו כאן אול מן חמל אלטנבור ואלקיתאר

כב וצלה הי איצ̇א ולדת תובל קין והו כאן אול ציקל לג̇מיע צנעה אלנחאס ואלחדיד וכאנת אכ̇תה נעמה

כג פקאל למך לנסאה ואת̇קא יא עדה ויא צלה אסמעא קולי יא נסא למך אנצתא מקאלתי אתריאני קתלת רג̇לא בשג̇תי או צביא בג̇ראחתי

כד פאן כאן כת̇ירא יקאד בקין פבלמך אכת̇ר ואכת̇ר

כה ואן אדם ואקע איצ̇א זוג̇תה פולדת אבנא ואסמתה שת קאלת קד רזקני אללה נסלא אכ̇ר בדל הבל אד̇ קתלה קין

כו ולשת הו איצ̇א אולד אבן וסמאה אנוש חיניד̇ תבד̇לת אלדעוה באסם אללה

פרק ה

א הד̇א כתאב שרח תאליד אדם פי יום כ̇לקה אללה בשבהה מסלטא צנעה

ב ד̇כרא ואנת̇א כ̇לקהמא ובארך פיהמא ודעא אסמהמא אדם פי יום כ̇לקהמא

ג כד̇אך למא עאש אדם מאיה ות̇לת̇ין סנה אולד אבנא בשבהה בצורתה וסמאה שת

ד פעאש בעד ד̇לך ת̇מאן מאיה סנה אולד פיהא בנין ובנאת

ה פצאר ג̇מיע עמרה תסע מאיה ות̇לת̇ין סנה ת̇ם מאת

ו ולמא עאש שת מאיה וכ̇מס סנין אולד אנוש

ז ועאש בעד ד̇לך ת̇מאן מאיה סנה וסבע סנין אולד פיהא בנין ובנאת

ח פצאר ג̇מיע עמרה תסע מאיה ואת̇נתי עשרה סנה ת̇ם מאת

ט ולמא עאש אנוש תסעין סנה אולד קינן

י ועאש אנוש בעד ד̇לך ת̇מאן מאיה סנה וכ̇מס עשרה סנה אולד פיהא בנין ובנאת

יא פצאר ג̇מיע עמרה תסע מאיה סנה וכ̇מס סנין ת̇ם מאת

יב ולמא עאש קינן סבעין סנה אולד מהללאל

יג ועאש קינן בעד ד̇לך ת̇מאן מאיה וארבעין סנה אולד פיהא בנין ובנאת

יד פצאר ג̇מיע עמרה תסע מאיה סנה ועשר סנין ת̇ם מאת

טו ולמא עאש מהללאל כ̇מס וסתין סנה אולד ירד

טז ועאש בעד ד̇לך ת̇מאן מאיה סנה ות̇לת̇ין סנה אולד פיהא בנין ובנאת

יז פצאר ג̇מיע עמרה ת̇מאן מאיה סנה וכ̇מס ותסעין סנה ת̇ם מאת

יח ולמא עאש ירד מאיה ואת̇נתין וסתין סנה אולד חנוך

יט ועאש בעד ד̇לך ת̇מאן מאיה סנה אולד פיהא בנין ובנאת

כ פצאר ג̇מיע עמרה תסע מאיה ואת̇נתין וסתין סנה ת̇ם מאת

כא ולמא עאש חנוך כ̇מס וסתין סנה אולד מתושלח

כב וסלך חנוך פי טאעה אללה בעד מא אולד מתושלח ת̇לת̇ מאיה סנה אולד פיהא בנין ובנאת

כג פצאר ג̇מיע עמרה ת̇לת̇ מאיה סנה וכ̇מס וסתין סנה

כד ולמא סלך חנוך פי טאעה אללה תופי וקבצ̇ה אללה

כה ולמא עאש מתושלח מאיה וסבעה ות̇מאנין סנה אולד למך

כו ועאש בעד ד̇לך סבע מאיה את̇נתין ות̇מאנין סנה אולד פיהא בנין ובנאת

כז פצאר ג̇מיע עמרה תסע מאיה סנה ותסע וסתין סנה ת̇ם מאת

כח ולמא עאש למך מאיה את̇נתין ות̇מאנין סנה אולד אבנא

כט וסמאה נוחא קאילא הד̇א יעזינא מן אעמאלנא ומן משקה אידינא פי אלארץ̇ אלתי לענהא אללה

ל ועאש בעד ד̇לך כ̇מס מאיה וכ̇מס ותסעין סנה אולד פיהא בנין ובנאת

לא פצאר ג̇מיע עמרה סבע מאיה סנה וסבע וסבעין סנה ת̇ם מאת

לב ולמא צאר נוח אבן כ̇מס מאיה סנה אולד שם וחם ויפת

פרק ו

א ולמא אבתדא אלנאס אן יכת̇רו עלי וג̇ה אלארץ̇ וולד להם בנאת

ב ראו בנו אלאשראף בנאת אלעאמה אנהן חסאן פאתכ̇ד̇ו להם נסא מן ג̇מיע מא אכ̇תארוה

ג פקאל אללה לא ינגמד ד̇אתי פי הולא אלנאס אלי אלדהר אד̇ הם בשריון ותכון מדתהם מאיה ועשרין סנה

ד וכאן אלג̇באברה פי אלארץ̇ פי ד̇לך אלזמאן ובעד ד̇לך איצ̇א כאנו ידכ̇לון בנו אלאשראף אלי בנאת אלעאמה חראמא פילדן להם הם אלג̇באברה אלד̇ין מן אלדהר ד̇וו אלאסמא

ה פלמא ראי אללה אן קד כת̇ר שר אלנאס פי אלארץ̇ וג̇מיע כ̇אטר אפכאר קלובהם רד̇י מחץ̇ טול אלזמאן

ו תואעדהם אללה במא צנעהם פי אלארץ̇ ואוצל אלמשקה אלי קלובהם

ז באן קאל אללה אמחו אלנאס אלד̇ין כ̇לקתהם ען וג̇ה אלארץ̇ מן אנסאן אלי בהימה אלי דביב ואלי טאיר אלסמא אד̇ תואעדתהם במא כ̇לקתהם

ח ונוח וג̇ד חט̇אא ענד אללה

ט הד̇א שרח תאליד נוח וכאן נוח רג̇לא צאלחא צחיחא פי אג̇יאלה פי טאעה אללה סלך נוח

י ואולד נוח ת̇לת̇ה בנין שם וחם ויפת

יא ואנפסדת אלארץ̇ בין ידי אללה ואמתלת אלארץ̇ ט̇למא

יב ולמא ראהא אללה אד̇ אנפסדת באן אפסד כל בשרי טריקה עליהא

יג קאל אללה לנוח קד דנא אג̇ל כל בשרי בין ידי אד̇ אמתלת אלארץ̇ ט̇למא מן קבלהם והאנא מהלכהם מנהא

יד אצנע לך תאבותא מן כ̇שב אלשמשאר ואצנעהא טבקאת וקפרהא מן דאכ̇ל ומן כ̇ארג̇ באלקפר

טו והד̇א מקדאר מא תצנעהא ת̇לת̇ מאיה ד̇ראע טולהא וכ̇מסין ערצ̇הא ות̇לת̇ין סמכהא

תוכן העניינים

תפסיר רס"ג

טוען…

אור ברסלב
תרומה

מקלידים לפחות שתי אותיות

מתעלם מניקוד ומכתיב מלא או חסר, ומבין גם לפי משמעות↑↓ מעבר · Enter פתיחה