תפסיר רס"ג· רב סעדיה גאון
ויקרא
פרק א
א ת̇ם דעא אללה במוסי פכ̇אטבה אללה מן כ̇בא אלמחצ̇ר קאילא
ב כלם בני אסראיל קאילא אי אנסאן קרב מנכם קרבאנא ללה מן אלבהאים פמן אלגנם ואלבקר תקרבוה
ג אן כאן קרבאנה צעידה מן אלבקר ד̇כרא צחיחא יקרבה וליקדמה אלי באב כ̇בא אלמחצ̇ר עלי מא ירתצ̇י ענה בין ידי אללה
ד ויסנד ידה עלי ראסה וירצ̇י ענה ויגפר לה
ה ויד̇בח אלרת̇ בין ידי אללה וליקדם בנו הרון אלאימה אלדם וירשה ענד אלמד̇בח מסתדירא אלד̇י ענד באב כ̇בא אלמחצ̇ר
ו ויסלך̇ אלצעידה ויעצ̇הא אעצ̇אא
ז וישעל בנו הרון אלאמאם נארא עלי אלמד̇בח וינצ̇דו עליהא חטבא
ח וינצ̇ד בנו הרון אלאמאם אלאעצ̇א ואלראס ואלקצבה עלי אלחטב אלד̇י עלי אלנאר אלתי עלי אלמד̇בח
ט וג̇ופה ואכארעה יגסלהא באלמא ויקתר אלאמאם אלכל עלי אלמד̇בח צעידה הי קרבאן מקבול מרצ̇י ללה
י ואן כאן קרבאנה מן אלגנם מן אלצ̇אן או מן אלמאעז צעידה פליקרבה ד̇כרא צחיחא
יא ויד̇בחה אלי ג̇אנב אלמד̇בח שמאליא בין ידי אללה וירש בנו הרון אלאימה דמה עלי אלמד̇בח מסתדירא
יב ויעצ̇ה אעצ̇אא וראסה וקצבתה וינצ̇דהא אלאמאם עלי אלחטב אלד̇י עלי אלנאר אלתי עלי אלמד̇בח
יג ואלג̇וף ואלאכארע יגסלהא באלמא ויקדם אלאמאם אלכל ויקתרה עלי אלמד̇בח צעידה קרבאן מרצ̇י ללה
יד ואן כאן קרבאנה צעידה ללה מן אלטאיר פליקרבה מן אלשפאנין או מן פראך̇ אלחמאם
טו ויקדמה אלאמאם אלי אלמד̇בח ויפצל ראסה ת̇ם יקתרה עלי אלמד̇בח וימצ̇י דמה עלי חאיט אלמד̇בח
טז וינזע חוצלתה מע קאנסתה ויטרחהא לזק אלמד̇בח שרקיא מוצ̇ע אלרמאד
יז ויפצלה מן אג̇נחתה ולא יפרזה ת̇ם יקתרה אלאמאם עלי אלמד̇בח עלי אלחטב אלד̇י עלי אלנאר הי צעידה קרבאן מרצ̇י ללה
פרק ב
א ואי אנסאן קרב קרבאן הדיה ללה וכאן קרבאנה סמידא פליצב עליה דהנא ויג̇על עליה לבאנא
ב ויאת בהא אלי בעץ̇ בני הרון אלאימה ויקבץ̇ מנהא מלו קבצ̇תה מן סמידהא ומן דהנהא מע ג̇מיע לבאנהא ויקתר פוחהא ד̇לך עלי אלמד̇בח קרבאן מקבול מרצ̇י ללה
ג ואלפאצ̇ל מנהא להרון ובניה מן כ̇ואץ אלאקדאס מן קראבין אללה
ד ואן קרבת הדיה מן כ̇בז אלתנור פלתכן ג̇ראדק סמיד פטיר מלת̇ות̇ה בדהן ורקאק פטיר ממסוחה בדהן
ה ואן כאן קרבאנך הדיה עלי אלטאבק פלתכן פטירא מן סמיד מלת̇ות̇ בדהן
ו ואת̇רדהא ת̇רדה וצב עליהא דהנא בד̇לך תכון הדיה
ז ואן כאן קרבאנך הדיה מן צנעה אלטנג̇יר פלתעמל סמידא בדהן
ח פלתאת באלהדיה אלתי קד עמלת מן אחדי הד̇ה ללה ויקדמהא אלי אלאמאם יקדמהא אלי אלמד̇בח
ט וירפע מנהא פוחהא ויקתרה עלי אלמד̇בח קרבאן מקבול מרצ̇י ללה
י ואלפאצ̇ל מנהא להרון ובניה מן כ̇ואץ אלאקדאס מן קראבין אללה
יא ג̇מיע אלהדאיא אלתי תקרבונהא ללה לא תעמל כ̇מירא לאן כל כ̇מיר וכל עסל לא תקרבו מנהמא קרבאנא מחרקא ללה
יב לכן קרבאנא אולא תקרבונהמא ללה ואלי אלמד̇בח לא יצעדא לקבול מרצ̇י
יג וג̇מיע קרבאן הדאיאך אמלחהא במלח ולא תעטל אלמלח פאנה עהד רבך מן הדיתך ומע סאיר קראבינך פקרב מלחא
יד ואן קרבת הדיה בכור ללה פפריכא מקלו באלנאר ג̇רישא מן אלהרף קרבהא
טו ואג̇על עליהא דהנא וציר עליהא לבאנא כד̇אך היא הדיה
טז ויקתר אלאמאם פוחהא מן ג̇רישהא ודהנהא מע ג̇מיע לבאנהא קרבאנא ללה
פרק ג
א ואן כאן קרבאנה ד̇בח סלאמה מן אלבקר ד̇כרא או אנת̇י פליקרבה צחיחא בין ידי אללה
ב ויסנד ידה עלי ראס קרבאנה ויד̇בחה ענד באב כ̇בא אלמחצ̇ר וירשו בנו הרון אלאימה אלדם עלי אלמד̇בח מסתדירא
ג ויקרב מן ד̇בח אלסלאמה קרבאנא ללה אלת̇רב אלמגטי אלג̇וף וסאיר אלשחם אלד̇י עלי אלג̇וף
ד ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכלי ינזעהא
ה ויקתר ד̇לך בני הרון עלא אלמד̇בח עלא אלצעידה אלתי עלא אלחטב אלד̇י עלא אלנאר קרבאן מקבול מרצ̇י ללה
ו ואן כאן קרבאנה מן אלגנם ד̇בח סלאמה ללה ד̇כרא או אנת̇י פצחיחא יקרבה
ז פאן כאן קרבאנה מן אלצ̇אן פליקדמה בין ידי אללה
ח ויסנד ידה עלי ראסה ויד̇בחה ענד באב כ̇בא אלמחצ̇ר וירש בנו הרון דמה עלי אלמד̇בח מסתדירא
ט ויקרב מנה קרבאנא ללה שחמה ואלאליה צחיחה יקלעהא אמאם אלעצאץ אלשחם אלמגטי אלג̇וף וסאיר אלשחם אלד̇י עליה
י ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכלי ינזעהא
יא פיקתר ד̇לך אלאמאם עלי אלמד̇בח קרבאן מחרק ללה
יב ואן כאן קרבאנה מן אלמאעז פליקרבה בין ידי אללה
יג ויסנד ידה עלי ראסה ויד̇בחה בין ידי כ̇בא אלמחצ̇ר וירשו בנו הרון דמה עלי אלמד̇בח מסתדירא
יד ויקרב מנה קרבאנה קרבאנא ללה אלת̇רב אלמגטי אלג̇וף וסאיר אלשחם אלד̇י עלי אלג̇וף
טו ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכלי ינזעהא
טז ויקתרהא קרבאנא מחרקא מרצ̇יא מקבולא כל שחם כד̇אך ללה
יז רסם אלדהר עלי מר אג̇יאלכם פי ג̇מיע מסאכנכם כל שחם וכל דם לא תאכלוהמא
פרק ד
א ת̇ם כלם אללה מוסי תכלימא
ב מר בני אסראיל קאילא אי אנסאן אכ̇טא בסהו פי שי מן פראיץ̇ אללה אלתי לא תעמל פעמל ואחדה מנהן
ג אן אכ̇טא אלאמאם אלממסוח עלי סביל כ̇טא אלנאס פליקרב עלי כ̇טיתה אלתי אכ̇טאהא רת̇א מן אלבקר צחיחא ללה לד̇כוה
ד ויאת באלרת̇ אלי באב כ̇בא אלמחצ̇ר בין ידי אללה ויסנד ידה עלי ראסה ויד̇בחה בין ידי אללה
ה ויאכ̇ד̇ אלאמאם אלממסוח מן דמה פידכ̇לה אלי כ̇בא אלמחצ̇ר
ו ויגמס אצבעה פיה וינצ̇ח מנה סבע מראר בין ידי אללה קבאלה סג̇ף אלקדס
ז ת̇ם יצ̇ע מן אלדם עלי ארכאן מד̇בח בכ̇ור אלאצמאג אלד̇י בין ידי אללה פי כ̇בא אלמחצ̇ר ובאקי אלדם יצבה ענד אסאס מד̇בח אלצעידה אלד̇י עלי באב כ̇בא אלמחצ̇ר
ח וג̇מיע שחם אלרת̇ אלד̇כוה ינזעה מנה אלת̇רב אלמגטי אלג̇וף וסאיר אלשחם אלד̇י עלי אלג̇וף
ט ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכלי ינזעהא
י כמא ירפע מן ת̇ור ד̇בח אלסלאמה ויקתרהא אלאמאם עלי מד̇בח אלצעידה
יא וג̇לד אלת̇ור וג̇מיע לחמה מע ראסה ואכארעה ובטנה ופרת̇ה
יב ויכ̇רג̇ ג̇מיע ד̇לך כ̇ארג̇ אלעסכר אלי מוצ̇ע טאהר אלי מטרח אלרמאד ויחרקה מע חטב באלנאר עלי מטרח אלרמאד יחרק
יג פאן אכ̇טא ג̇מע מן ג̇מיע אסראיל וגאב אמר מן עיון אלג̇וק פיעמל ואחדה מן פראיץ̇ אללה אלתי לא תעמל פאת̇מו
יד ת̇ם ערפת אלכ̇טיה אלתי אכ̇טאוהא פליקרב אלג̇וק רת̇א מן אלבקר ללד̇כוה ויאת בה בין ידי כ̇בא אלמחצ̇ר
טו ויסנד שיוך̇ אלג̇מע אידיהם עלי ראס אלרת̇ בין ידי אללה ויד̇בח אלרת̇ בין ידי אללה
טז וידכ̇ל אלאמאם אלממסוח מן דמה אלי כ̇בא אלמחצ̇ר
יז ויגמם אצבעה פיה וינצ̇ח מנה סבע מראת בין ידי אללה קבאלה אלסג̇ף
יח ומנה יצב עלי ארכאן אלמד̇בח אלד̇י בין ידי אללה אלד̇י פי כ̇בא אלמחצ̇ר ובאקיה יצבה ענד אסאס מד̇בח אלצעידה אלד̇י פי באב כ̇בא אלמחצ̇ר
יט וג̇מיע שחמה ירפעה מנה ויקתר עלי אלמד̇בח
כ ויעמל בה כמא עמל בת̇ור ד̇כוה אלאמאם כד̇אך יעמל בה ויסתגפר ענהם ויגפר להם
כא ויכ̇רג̇ אלת̇ור כ̇ארג̇ אלעסכר פיחרקה כמא אחרק אלת̇ור אלאול הו ד̇כוה אלג̇וק
כב אן אכ̇טא שריף פיעמל ואחדה מן פראיץ̇ אללה אלתי לא תעמל בסהו פאת̇ם
כג ת̇ם עלם בכ̇טיתה אלתי אכ̇טאהא פליאת בקרבאנה עתודא מן אלמאעז ד̇כרא צחיחא
כד ויסנד ידה עלי ראסה ויד̇בחה פי מוצ̇ע יד̇בח אלצעידה בין ידי אללה כד̇לך מא יכון ד̇כוה
כה ויאכ̇ד̇ אלאמאם מן דם אלד̇כוה באצבעה ויג̇עלה עלי ארכאן מד̇בח אלצעידה וסאיר דמה יצבה ענד אסאסה
כו וג̇מיע שחמה יקתרה עלי אלמד̇בח כשחם ד̇בח אלסלאמה ויסתגפר ענה אלאמאם מן כ̇טיתה פיגפר לה
כז ואן אכ̇טא אנסאן מן עואם אלבלד סהוא פעמל ואחדה מן פראיץ̇ אללה אלתי לא תעמל פאת̇ם
כח ת̇ם ערף בכ̇טיתה אלתי אכ̇טא פליאת בקרבאנה מן אלמאעז צחיחה אנת̇י עלי כ̇טיתה אלתי אכ̇טא
כט ויסנד ידה עלי ראסהא ויד̇בחהא פי מוצ̇ע אלצעידה
ל ויאכ̇ד̇ אלאמאם מן דמהא באצבעה ויג̇על עלי ארכאן מד̇בח אלצעידה וסאיר דמהא יצבה ענד אסאס אלמד̇בח
לא וג̇מיע שחמהא ינזעה כמא ינזע שחם אלמאעז מן ד̇בח אלסלאמה ויקתרה אלאמאם עלי אלמד̇בח מקבול מרצ̇י ללה ויסתגפר לה אלאמאם פיגפר לה
לב ואן הו ג̇א בקרבאנה מן אלצ̇אן ללד̇כוה פליאת בהא אנת̇י צחיחה
לג ויסנד ידה עלי ראסהא ויד̇בחהא ללד̇כוה פי מוצ̇ע אלצעידה
לד ויאכ̇ד̇ אלאמאם מן דמהא באצבעה ויג̇על עלי ארכאן מד̇בח אלצעידה וסאיר דמהא יצבה ענד אסאסה
לה וג̇מיע שחמהא ינזעה כמא ינזע שחם אלצ̇אן מן ד̇בח אלסלאמה ויקתרה אלאמאם עלי אלמד̇בח עלי קראבין אללה ויסתגפר ענה אלאמאם ען כ̇טיתה אלד̇י אכ̇טא פיגפר לה
פרק ה
א ואי אנסאן אכ̇טא באן סמע צות חרג̇ והו שאהד או ראי ד̇לך או עלם בה ולם יכ̇בר פקד חמל וזרה
ב או אנסאן דני בשי מן אלאמור אלנג̇סה או בנבילה וחש נג̇ס או בנבילה בהימה נג̇סה או בנבילה שי מן אלדביב אלנג̇ס וגאב ד̇לך ענה פהו נג̇ס ואת̇ם
ג או דני בנג̇אסה אנסאן בשי מן נג̇אסתה ממא סבילה אן ינג̇ס בהא פגאב ענה פאת̇ם והוא עאלם במא פעל ואת̇ם
ד או אנסאן חלף בלפט̇ שפתיה לאסאה או לאחסאן עלי ג̇מיע מא לפט̇ אלאנסאן בימין וגאב ד̇לך ענה ת̇ם עלם במא פעל ואת̇ם בואחדה מן הד̇ה
ה פאד̇א את̇ם בואחדה מנהא ת̇ם אקר במא אכ̇טא
ו פליאת בקרבאנה ללה עלי כ̇טיתה אלד̇י אכ̇טא אנת̇י מן אלגנם נעג̇ה או שאה ללד̇כוה ויסתגפר ענה אלאמאם מן כ̇טיתה
ז פאן לם תנל ידה מקדאר שאה פליאת בקרבאנה עלי מא אכ̇טא שפנינין או פרכ̇י חמאם ללה אחדהמא ללד̇כוה ואלאכ̇ר ללצעידה
ח פאד̇א אתי בהמא אלי אלאמאם פליקרב אלד̇י ללד̇כוה אולא ויפצל ראסה ממא ילי קפאה ולא יפרז
ט וינצ̇ח מן דם אלד̇כוה עלי חאיט אלמד̇בח ואלפאצ̇ל מן אלדם ימצל עלי אסאס אלמד̇בח לאנהא ד̇כוה
י ואלת̇אני יעמלה צעידה כאלסירה ויסתגפר ענה אלאמאם ען כ̇טיתה אלתי אכ̇טא ויגפר לה
יא ואן לם תנל ידה ת̇מן שפנינין או פרכ̇י חמאם פליאת בקרבאנה עלי מא אכ̇טא עשר אלויבה סמיד ללד̇כוה ולא יצב עליהא דהנא ולא יג̇על עליהא לבאנא לאנהא ד̇כוה
יב פאד̇א אתי בהא אלי אלאמאם וקבץ̇ אלאמאם מנהא מלו קבצ̇תה פוחהא פקתרה עלי אלמד̇בח מע קראבין אללה כד̇אך תציר ד̇כוה
יג ויסתגפר ענה אלאמאם ען כ̇טיתה אלתי אכ̇טא בואחדה מן הד̇ה ויגפר לה ותציר ללאמאם כסאיר אלהאדיא
יד ת̇ם כלם אללה מוסי תכלימא
טו אי אנסאן נכת̇ נכת̇א ואכ̇טא בסהו בשי מן אקדאס אללה פליאת בקרבאנה ללה כבשא צחיחא מן אלגנם בקימתה מת̇אקיל פצ̇ה במת̇קאל אלקדס ללקראבין
טז ואלד̇י אכ̇טא בה מן אלקדס יגרם מת̇לה וכ̇מסה יזד עליה ויעטה ללאמאם ואלאמאם יסתגפר עליה בכבש אלקרבאן פיגפר לה
יז ואי אנסאן אכ̇טא פעמל ואחדה מן פראיץ̇ אללה אלתי לא תעמל ולם יעלם באנה קד את̇ם וחמל וזרה
יח פליאת בכבש צחיח מן אלגנם בקימתה ללקרבאן אלי אלאמאם ויסתגפר ענה אלאמאם ען סהוה אלד̇י סהא והו לא יעלם פיגפר לה
יט הו קרבאן אלאת̇ם ען את̇מה אלד̇י את̇ם ללה
כ ת̇ם כלם אללה מוסי קאילא
כא אי אנסאן אכ̇טא ונכת̇ נכת̇א באללה פג̇חד צאחבה ודיעה או מעאמלה או גצב או גשם צאחבה
כב או וג̇ד צ̇אלה וג̇חדהא וחלף עלי באטל עלי כ̇לה מן ג̇מיע מא יעמל אלאנסאן פיכ̇טא בהא
כג פאד̇א הו אכ̇טא ואת̇ם פלירד אלגצב אלד̇י גצבה או אלגשם אלד̇י גשמה או אלודיעה אלתי אודעת ענדה או אלצ̇אלה אלתי וג̇דהא
כד או מא סוי ד̇לך ממא חלף עליה באטלא פלירדה בראסה ויזד עליה אכ̇מאסה ויעטה לאלד̇י הו לה פי יום אעתראפה בד̇נבה
כה וליאת בקרבאנה ללה כבשא צחיחא מן אלגנם בקימתה ללקרבאן אלי אלאמאם
כו ויסתגפר ענה אלאמאם בין ידי אללה ויגפר לה עלי איה כ̇לה מן ג̇מיע מא יעמל פיאת̇ם בהא
פרק ו
א ת̇ם כלם אללה מוסי קאילא
ב מר הרון ובניה קאילא הד̇ה שריעה אלצעידה הי אלצעידה תוצ̇ע עלי וקיד אלמד̇בח טול אלליל אלי אלגדאה ונאר אלמד̇בח תסתוקד עליה
ג וילבס אלאמאם קמיצא מן עשר וסראויל עשר ילבס עלי בדנה וירפע אלרמאד אלד̇י תאכל אלנאר אלצעידה עלי אלמד̇בח ויצירה לזק אלמד̇בח
ד ת̇ם יסלך̇ ת̇יאבה וילבס ת̇יאבא אכ̇ר ויכ̇רג̇ אלרמאד אלי כ̇ארג̇ אלעסכר אלי מוצ̇ע טאהר
ה ואלנאר אלתי עלי אלמד̇בח תסתוקד פיה ולא תטפא וישעל עליהא אלאמאם חטבא פי כל גדאה וינצ̇ד עליהא אלצעידה ויקתר עליהא שחום אלסלאמה
ו כד̇אך אלנאר דאימא תוקד עלי אלמדבח ולא תטפא
ז והד̇ה שריעה אלהדיה אן יקדמהא בנו הרון בין ידי אללה בין ידי אלמד̇בח
ח וירפע מנהא בקבצ̇תה מן סמידהא ודהנהא וג̇מיע לבאנהא אלד̇י עליהא פיקתר פוחהא עלי אלמד̇בח מקבול מרצ̇י ללה
ט ואלפאצ̇ל מנהא יאכלה הרון ובנוה פטירא תוכל פי מוצ̇ע מקדס פי צחן כ̇בא אלמחצ̇ר יאכלוהא
י לא תכ̇בז כ̇מירא ג̇עלתהא קסמהם מן קראבני מן כ̇ואץ אלאקדאס הי כאלד̇כוה וקרבאן אלאת̇ם
יא כל ד̇כר מן בני הרון יאכלהא רסם אלדהר לאג̇אלכם מן קראבין אללה כל מן לאמסהא תקדס
יב ת̇ם כלם אללה מוסי קאילא
יג הד̇א קרבאן הרון ובניה אלד̇י יקרבה ללה מן יום מסחה עשר אלויבה סמידא הדיה דאימא נצפהא באלגדאה ונצפהא באלעשי
יד עלי טאבק באלדהן תעמל סתותיה תאת בהא רפכ̇ה ת̇רדא תקרבהא מקבול מרצ̇י ללה
טו וכד̇לך אלאמאם אלמסתכ̇לף בעדה מן בניה יצנעהא רסם אלדהר ללה ג̇מלה תקתר
טז וסאיר הדאיא אלאמאם ג̇מלה תקתר ולא תוכל
יז וכלם אללה מוסי תכלימא
יח מר להרון ולבניה קאילא הד̇ה שריעה אלד̇כוה פי מוצ̇ע תד̇בח פיה אלצעידה תד̇בח אלד̇כוה בין ידי אללה אד̇ הי מן כ̇ואץ אלאקדאס
יט אלאמאם אלמד̇כי בהא יאכלהא פי מוצ̇ע מקדס תוכל פי צחן כ̇בא אלמחצ̇ר
כ כל מן דני בלחמהא תקדס ואן אנתצ̇ח מן דמהא אלד̇י ינצ̇ח מנהא עלי ת̇וב פיגסל פי מוצ̇ע מקדס
כא ואנא אלכ̇זף אלד̇י תטבך̇ פיה יכסר פאן טבכ̇ת פי אנא נחאס פלידלך ויגסל באלמא
כב כל ד̇כר מן אלאימה יאכלהא אד̇ הי מן כ̇ואץ אלאקדאס
כג וכל ד̇כוה ידכ̇ל מן דמהא אלי כ̇בא אלמחצ̇ר ליסתגפר בה פי אלקדס פלא תוכל בל תחרק באלנאר
פרק ז
א והד̇ה שריעה קרבאן אלאת̇ם הו איצ̇א מן כ̇ואץ אלאקדאס
ב פי מוצ̇ע תד̇בח אלד̇כוה יד̇בח קרבאן אלאת̇ם ודמה ירש עלי אלמד̇בח מסתדירא
ג וג̇מיע שחמה ירפעה מנה אלאליה ואלת̇רב אלמגטי אלג̇וף
ד ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכליתין ינזעהא
ה ויקתרהא אלאמאם עלי אלמד̇בח קרבאנא ללה כד̇אך מא יציר קרבאן אלאת̇ם
ו כל ד̇כר מן אלאימה יאכלה ופי מוצ̇ע מקדס יוכל לאנה מן כ̇ואץ אלקדאס
ז כאלד̇כוה קרבאן אלאת̇ם שריעה ואחדה להמא אלאמאם אלד̇י יגפר בה לה יכון
ח ואלאמאם אד̇א קרב צעידה אנסאן פג̇לדהא בעד תקריבהא יכון לה
ט וכל הדיה ממא יכ̇בז פי אלתנור או יעמל פי טנג̇יר או עלי טאבק אי אמאם קרבהא לה תכון
י וכל הדיה מלת̇ות̇ה בדהן או ג̇אפה לג̇מיע בני הרון תכון לאלואחד כאלאכ̇ר
יא והד̇ה שריעה ד̇בח אלסלאמה אלד̇י יקרבה ללה
יב ואן קרבה עלי שכר פליקרב מעה ג̇ראדק פטיר מלת̇ות̇ה בדהן ורקאק פטיר ממסוחה בדהן וסמיד רפך̇ ג̇ראדק מלת̇ות̇ה בדהן
יג מע ג̇ראדק כ̇בז כ̇מיר יקרב קרבאנה מע ד̇בח שכר סלאמתה
יד פליקרב מן ד̇לך ואחדא מן כל קרבאן רפיעה ללה ללאמאם אלד̇י ינצ̇ח דם אלסלאמה לה יכון
טו ולחם ד̇בח שכר אלסלאמה פי יום קרבאנה יוכל לא יבק מנה אלי אלגדאה
טז ואן כאן ד̇בח קרבאנה נד̇רא או תברעא פליוכל פי יום תקריבה ומן אלגד פמא פצ̇ל מנה יוכל
יז ואלפאצ̇ל מן לחם אלד̇בח אלי אליום אלת̇אלת̇ פליחרק באלנאר
יח פאן אכל מנה פי אליום אלת̇אלת̇ פלא ירתצ̇י אלמקרב לה לא יחסב לה בל יכון כאלאכ̇ס ואי אנסאן אכל מנה פקד חמל וזרה