תפסיר רס"ג· רב סעדיה גאון
דברים
פרק א
א הד̇ה אלכלמאת אלתי כלם בהא מוסי בני אסראיל פי עבר אלארדן פי בריה אלבידא מקאבל אלקלזם בין פארן ובין תופל ולבן וחצרת וד̇י אלד̇הב
ב עלי מסאפה אחד עשר יומא מן חרב עלי טריק ג̇בל שעיר אלי רקים ברנע
ג פלמא כאן פי אלסנה אלארבעין פי אליום אלאול מן אלשהר אלחאדי עשר כלם מוסי בני אסראיל בג̇מיע מא אמרה אללה אליהם
ד בעד פתחה בלד סיחון מלך אלאמוריין אלמקים פי חשבון ועוג מלך אלבת̇ניה אלמקים פי עשתרות פי אד̇רעאת
ה פי עבר אלארדן פי בלד מואב אמען מוסי פי ביאן הד̇ה אלתוריה קאילא
ו אללה רבנא קאל לנא פי חרב חסבכם אלמקאם פי הד̇א אלג̇בל
ז ולו וארחלו ואדכ̇לו אלי ג̇בל אלאמורי וג̇מיע ג̇יראנה פי אלגור ואלג̇בל ואלסהל ואלדארום וסאחל אלבחר בלד אלכנעאניין ואללבנאן אלי נהר אלכביר נהר אלפראת
ח ואנט̇רו קד ג̇עלת אלבלד בין ידיכם אצעדו וחוזוהא כמא קסם אללה לאבאיכם אברהים ואסחק ויעקוב אן יעטיהם ולנסלהם בעדהם
ט וקלת לכם פי ד̇לך אלוקת לא אסתטיע וחדי אן אחתמלכם
י אד̇ אללה רבכם כת̇רכם פהוד̇אכם אליום ככואכב אלסמא כת̇רה
יא ואסל אללה אלאה אבאיכם אן יזיד פיכם מת̇לכם אלף מרה ויבארך פיכם כמא ועדכם
יב כיף אחתמל וחדי ת̇קלכם וקצצכם וכ̇צאמאתכם
יג האתו לכם ברג̇אל חכמא פהמא מערופין לאסבאטכם אצירהם ריסא עליכם
יד פאג̇בתמוני וקלתם מא אצלח אן יעמל הד̇א אלאמר אלד̇י קלתה
טו פאכ̇ד̇ת מן אסבאטכם רג̇אלא חכמא מערופין פג̇עלתהם ריסא עליכם ריסא אלוף וריסא מיין וריסא כ̇מסין וריסא עשראת וערפא עלי אסבאטכם
טז ואמרת חכאמכם פי ד̇לך אלוקת קאילא אסמעו פי מא בין אכ̇ותכם ואחכמו באלעדל בין כל רג̇ל ואכ̇יה וצ̇יפה
יז לא תחאבו אלוג̇וה פי אלחכם ואסמעו פי אלצגיר כאלכביר ולא תחד̇רו אחדא פאן אלחכם הו ללה ואי אמר צעב עליכם אדפעוה אלי חתי אנט̇ר פיה
יח ואוציתכם פי ד̇לך אלוקת בג̇מיע אלאמור אלתי יג̇ב אן תצנעוהא
יט ת̇ם רחלנא מן חרב וסרנא תלך אלבריה אלעט̇ימה אלמכ̇ופה אלתי ראיתמוהא עלי טריק ג̇בל אלאמוריין כמא אמרנא אללה רבנא חתי ג̇ינא אלי רקים ברנע
כ פקלת לכם קד ג̇יתם אלי ג̇בל אלאמורי אלד̇י אללה רבנא מעטינאה
כא אנט̇ר קד ג̇על אללה רבך אלבלד בין ידיך אצעד פחזה כמא ועדך אללה אבאיך לא תכ̇ף ולא תרעד
כב ותקדם אלי כת̇יר מנכם פקלתם נבעת̇ ברג̇אל בין ידינא ירומו לנא אלבלד וירדון עלינא ג̇ואבא ען אלטריק אלד̇י נצעד פיה ואלקרי אלתי נדכ̇ל אליהא
כג פחסן ד̇לך ענדי פאכ̇ד̇ת מנכם את̇ני עשר רג̇לא רג̇לא ואחדא מן כל סבט
כד פולו וצעדו אלי אלג̇בל וג̇או אלי ואדי אלענקוד וראמוה
כה ואכ̇ד̇ו מעהם מן ת̇מר אלארץ̇ ואחדרוה אלינא ורדו עלינא ג̇ואבא וקאלו אן אלבלד אלד̇י אללה רבנא מעטינאה לג̇יד
כו פלם תשאו אלצעוד אליה וכ̇אלפתם אמר אללה רבכם
כז ותכ̇רסתם פי אכ̇ביתכם וקלתם מן שנאה אללה לנא אכ̇רג̇נא מן בלד מצר ליסלמנא פי יד אלאמוריין פינפד̇ונא
כח אלי אין נחן צאעדון ואכ̇ותנא אמאסו קלובנא בקולהם אן אלקום אכת̇ר וארפע מנא ואן קראהם כבאר וחצינה תדאני אלסמא חתי בני אלג̇באברה ראינאהם ת̇ם
כט פקלת לכם לא תראהבוהם ולא תכ̇אפוהם
ל אללה רבכם אלסאיר נורה בין ידיכם הוא יחארב ענכם כג̇מיע מא צנע במצר בחצ̇רתכם
לא וכמא ראית פי אלבר אן אללה רבך חמלך כמא יחמל אלמר ולדה אשפאקא פי כל טריק סרתם פיהא אלי אן ג̇יתם אלי הד̇א אלמוצ̇ע
לב ופי הד̇א אלאמר אפלא תומנון באללה רבכם
לג אלסאיר נורה אמאמכם פי אלטריק ליצלח לכם מכאנא לנזולכם ובאלנאר לילה ליצ̇יכם אלטריק אלד̇י תסלכונה ובאל גמאם נהארא
לד פסמע אללה כלאמכם פסכ̇ט וקסם קאילא
לה אן ראי רג̇ל מן האולי אלנאס הד̇א אלג̇יל אלרדי אלבלד אלד̇י אקסמת באעטאיה לאבאיכם
לו סוי כלב בן יפנה פאנה יראה ולה אעטי אלבלד אלד̇י סלכה ולבניה למא אתבע טאעה אללה
לז איצ̇א עלי וג̇ד אללה בסבב מא חדת̇ אד̇ תאכ̇רתם קאילא איצ̇א אנת לא תדכ̇לה
לח יהושע אבן נון אלקאים בין ידיך הו ידכ̇לה פשדדה פאנה יורת̇ה לבני אסראיל
לט ואטפאלכם אלד̇ין קלתם אנהם יכונון גנימה ובנוכם אלד̇ין הם אליום לא יערפון כ̇ירא ושרא הם ידכ̇לונה ולהם אעטיה פיחוזונה
מ ואמא אנתם פולו וארחלו פי אלבר אלי טריק בחר אלקלזם
מא פאג̇בתמוני וקלתם קד אכ̇טאנא ללה ונחן נצעד פנחארב כמא אמרנא אללה רבנא פתקלד כל ואחד מנכם אלאת חרבה ובאדרתם לתצעדו אלי אלג̇בל
מב פקאל אללה לי לא תצעדו ולא תחארבוהם פאני ליס נורי מעכם לילא תנסדמו בין ידי אעדאיכם
מג פקלת לכם ד̇לך ולא קבלתם בל כ̇אלפתם אללה ותוקחתם עלי צעוד אלי אלג̇בל
מד פכ̇רג̇ אלאמוריין אלמקימון פי ד̇לך אלג̇בל תלקאכם פכלבוכם כמא ילסע אלנחל וחטמוכם פי שעיר אלי חרמה
מה פרג̇עתם באכין בין ידי אללה פלם יסמע צותכם ולא אג̇אבכם
מו פאקמתם פי רקים מדה טוילה שביהה בסאיר מא אקמתם
פרק ב
א ת̇ם ולינא ורחלנא פי אלבר אלי טריק בחר אלקלזם כמא אמרני אללה ואסתדרנא ג̇בל שעיר מדה טוילה
ב ת̇ם כלמני אללה תכלימא
ג חסבכם מן אלאחאטה בהד̇א אלג̇בל ולו ענה שמאלא
ד ומר לקומך וקל להם אנכם ג̇איזון פי תכ̇ם אכ̇ותכם בני עשו אלמקימין בשעיר פסיכ̇אפונכם פאחד̇רו ג̇דא
ה לא תתחרשו בהם פאני ליס מעטיכם מן בלדהם ולא וטי קדם לאן וראת̇ה לעשו אעטית ג̇בל שעיר
ו בל אשתרו מנהם טעאמא בת̇מן פכלוה ומאא פאשרבוה
ז לאן אללה רבך קד בארך לך פי ג̇מיע אעמאלך ואחסן עליך ענד מסירך פי אלבר אלעט̇ים פהד̇ה ארבעון סנה אללה רבך מעך לם יעוזך שיא
ח פג̇זנא אכ̇ותנא בני עשו אלמקימין בשעיר מן טריק אלבידא ואילת ועציון גבר וולינא ורחלנא טריק בריה מואב
ט פקאל אללה לי לא תחאצר אלמואביין ולא תתחרש בהם פאני לא אעטיכם מן בלדהם חוזא אן לבני לוט ג̇עלת עאר וראת̇ה
י וכאן אלמהיבון אקאם בהם קבלהם קום כביר ורפיע וכת̇יר כאלג̇בארין
יא והם יחסבון אלשג̇עא כאלג̇ברין ואלמואביון יסמונהם מהיבין
יב ואמא פי שעיר פאקאם אלחוריון קבל בני עשו חתי אתו פקרצ̇והם ואנפד̇והם מן בין אידיהם ואקאמו פי מכאנהם כמא צנע אלאסראיל בבעץ̇ חוזה אלד̇י אעטאהם אללה
יג אלאן קומו אעברו ואדי זרד פעברנאה
יד וכאנת ג̇מלה אלאיאם מנד̇ סרנא מן רקים ברנע אלי אן עברנא ואדי זרד ת̇מאניה ות̇לת̇ין סנה אלי אן פני ג̇מיע אלקום אלמחארבין מן אלעסכר כמא קסם אללה עליהם
טו וואפה מן ענד אללה חלת בהם לאהאמתהם אלי אן פנו
טז פלמא פני ג̇מיעהם מן בין אלאמה
יז קאל אללה לי תכלימא
יח אנת ג̇איז אליום תכ̇ם מואב אלד̇י הו עאר
יט פתקרב מן בני עמון פלא תחאצרהם ולא תתחרש בהם פאני לא אעטיך מן בלדהם חוזא אד̇ ג̇עלתהא לבני לוט חוזא
כ והי תחסב איצ̇א מן בלד אלג̇בארין לאן אלג̇באברה אקאמו בהא קבלהם ואלעמאניון יסמונהם ד̇וי אלהמם
כא קום כביר ורפיע כאלג̇בארין אנפד̇הם אללה מן בין אידיהם פקרצ̇והם וג̇לסו מכאנהם
כב כמא צנע לבני עשו אלמקימין בשעיר אד̇ אנפד̇ אלחוריין מן בין ידיהם פקרצ̇והם ואקאמו מכאנהם אלי הד̇א אליום
כג ואלעוין אלמקימון ברפח אלי גזה ואלדמיאטיון אלד̇ין כ̇רג̇ו מן דמיאט קרצ̇והם ואקאמו מכאנהם
כד פקומו ארחלו ואעברו ואדי ארנון אנט̇ר קד אסלמת פי ידך סיחון מלך חשבון אלאמורי ובלדה פאבדי בקרצ̇ה ותחרש במחארבתה
כה ומן הד̇א אליום אבתדי באיקאע פזעך וכ̇ופך פי קלוב אלאמם אלד̇ין תחת ג̇מיע אלסמא פאד̇א הם סמעו בכ̇ברך רג̇זו וארתעדו מן בין ידיך
כו פבעת̇ת ברסל מן בריה קדמות אלי סיחון מלך חשבון באלסלאם ואלכלאם
כז אעבר פי בלדך פי אלטריק אלג̇אדה אסיר ולא אמיל ימנה ולא יסרה
כח טעאמא תמירני בת̇מן פאכלה ומאא תביעני בת̇מן פאשרבה ואעבר ברג̇לי פקט
כט כמא צנע בי בעץ̇ ד̇לך בנו עשו אלמקימון בשעיר ואלמואביון אלמקימון בעאר אלי אן אעבר אלארדן אלי אלבלד אלד̇י אללה רבנא מעטינאה
ל פלם ישא סיחון מלך חשבון אג̇אזתנא פי בלדה לאן אללה רבך צעב רוחה ואיד קלבה לכי יסלמה פי ידך כמא תרי אליום
לא פקאל אללה לי אנט̇ר קד בדית אן אסלם סיחון ובלדה פי ידך פאבד בקרצ̇ה וחז בלדה
לב פכ̇רג̇ סיחון תלקאנא הו וג̇מיע קומה ללחרב אלי יהץ
לג פאסלמה אללה רבנא פי אידינא פקתלנאה ובניה וסאיר קומה
לד פפתחנא ג̇מיע קראה פי ד̇לך אלוקת ואתלפנא מן כל קריה אלרהט ואלנסא ואלאטפאל לם נבק שרידא
לה וגנמנא כל בהימה וסלב אלקרי אלתי פתחנא
לו מן ערער אלד̇י עלי שאטי ואדי ארנון ואלקריה אלתי פי אלואדי ואלי ג̇רש לם תבק קריה מנעת מנא בל אלכל אסלמה אללה רבנא בין ידינא
לז עדא בלד בני עמון פאנך לם תקרבה פג̇מיע שאטי ואדי יבק וקרי אלג̇בל וסאיר מא נהאנא ענה אללה רבנא
פרק ג
א ת̇ם ולינא פצעדנא טריק אלבת̇ניה פכ̇רג̇ עוג מלך אלבת̇ניה תלקאנא הו וג̇מיע קומה ללחרב אלי אד̇רעאת
ב פקאל אללה לי לא תכ̇פה פאני קד אסלמתה פי ידך וג̇מיע קומה ובלדה פאצנע בה כמא צנעת בסיחון מלך אלאמורי אלמקים בחשבון
ג פאסלם אללה רבנא פי ידנא איצ̇א עוג מלך אלבת̇ניה וקומה פקתלנאהם חתי לם נבק מנהם שרידא
ד ופתחנא ג̇מיע קראה פי ד̇לך אלוקת ולם תבק קריה לם נאכ̇ד̇הא מנהם מן ד̇לך סתין קריה עלי כ̇ט אלמוג̇ב ממלכה עוג פי אלבת̇ניה
ה כל הד̇ה קרי חצינה בסור שאמך̇ ומצארע ונג̇ור סוי קרי אלרבץ̇ פאנהא כת̇ירה ג̇דא
ו וכמא צנענא בסיחון מלך חשבון כד̇אך אתלפנא מן כל קריה אלרהט ואלנסא ואלאטפאל
ז וכל בהימה וסלב אלקרי גנמנאהא
ח פחצל לנא פי ד̇לך אלוקת בלד מלכי אלאמוריין אללד̇ין פי חד̇א ג̇אנב אלארדן מן ואדי ארנון אלי ג̇בל חרמון
ט אלד̇י יסמונה אלצידאניון שריון ואלאמוריון שניר
י וג̇מיע קרי אלסהל ואלג̇רש ואלבת̇ניה אלי סלכה ואד̇רעאת הי איצ̇א ממלכה עוג פי אלבתניה
יא לאנה בקי מן באקיה אלג̇באברה הוד̇א לה סריד מן חדיד פי אלראביה אלתי לבני עמאן טולה תסעה ד̇רע וערצ̇ה ארבעה ד̇רע בד̇ראע אלמלך
יב והד̇א אלבלד אלד̇י חזנאה פי ד̇לך אלוקת פמן ערער אלתי עלי ואדי ארנון ונצף ג̇בל אלג̇רש וקראה דפעת ד̇לך אלי אלראובניין ואלגדיין
יג ובאקי ג̇רש וג̇מיע אלבת̇ניה ממלכה עוג דפעתה אלי נצף סבט אלמנשה וג̇מיע כ̇ט אלמוג̇ב ואלבת̇ניה יסמיאן בלד אלשג̇עא
יד ויאיר אבן מנשה אכ̇ד̇ ג̇מיע אלמוג̇ב אלי חד אלג̇שוריין ואלמעכתיין פסמאהא באסמה סואד יאיר אלי יומנא הד̇א
טו ולמכיר דפעת אלג̇רש
טז ודפעת אלי אלראובניין ואלגדיין מן אלג̇רש אלי ואדי ארנון ווסט אלואדי וחדה אלי ואדי יבק תכ̇ם בני עמאן
יז ואלגור ואלארדן וחדה מן ג̇ינסר אלי בחר אלגור ואלבחירה אלמיתה ומצב אלקלעה שרקיא
יח פאמרת האולי מנכם פי ד̇לך אלוקת קאילא אד̇ אללה רבכם קד אעטאכם הד̇א אלבלד פחזתמוה פאעברו מג̇רדין בין ידי אכ̇ותכם בני אסראיל כל ד̇וי חיל
יט עדא נסאכם ואטפאלכם ומאשיתכם פאני עאלם אן לכם מאשיה כת̇ירה פליקימו פי קראכם אלתי אעטיתכם
כ אלי אן יקר אללה אכ̇ותכם מת̇לכם פיחוזו הם איצ̇א אלבלד אלד̇י אללה רבכם מעטיהם פי ד̇אך ג̇אנב אלארדן פתרג̇עו כל אמר אלי חוזה אלד̇י אעטיתכם
כא ואמרת יהושע פי ד̇לך אלוקת וקלת לה עינאך קד ראת ג̇מיע מא צנע אללה בהד̇ין אלמלכין כד̇אך יצנע אללה בג̇מיע אלממאלך אלתי אנת ג̇איז אליהא
כב פלא תכ̇אפוהם אן אללה רבכם מחארב ענכם
כג ת̇ם תחננת בין ידי אללה פי ד̇לך אלוקת קאילא
כד אללהם יא רב אנת אבתדית אן תרי עבדך עט̇מתך וקדרתך אלשדידה לאן אי אלאה פי אלסמא ופי אלארץ̇ יצנע כצנאיעך וג̇בארותך
כה אסאלך אן אג̇וז ואנט̇ר אלי ד̇לך אלבלד אלד̇י פי ד̇אך ג̇אנב אלארדן וד̇לך אלג̇בל אלג̇יד ואללבנאן
כו פוג̇ד אללה עלי בסבבכם ולם יסמע לי בל קאל לי חסבך ולא תזד פי מסאלתי פי הד̇א אלבאב
כז לכן אצעד אלי ראס אלקלעה וארפע עיניך אלי אלגרב ואלשמאל ואלג̇נוב ואלשרק ואנט̇רהא בעיניך פאנך לא תג̇וז הד̇א אלארדן
כח ומר יהושע ושדדה ואידה פאנה יעבר בין ידי האולי אלקום וינחלהם אלבלד אלד̇י תראה
כט ת̇ם ג̇לסנא פי אלואדי ממא ילי בית פעור
פרק ד
א ואלאן יא אסראיל אסמע אלרסום ואלאחכאם אלתי אנא מעלמכם לתעמלו בהא לכי תחיו ותדכ̇לו ותחוזו אלבלד אלד̇י אללה אלאה אבאיכם מעטיכם
ב לא תזידו שיא עלי מא אמרכם בה ולא תנקצו מנה ואחפט̇ו וצאיא אללה רבכם אלתי אנא אמרכם בהא
ג עיונכם ראת ג̇מיע מא צנע אללה בפעור אלצנם אן כל רג̇ל אתבעה אנפד̇ה אללה רבכם מן בינכם
ד ואנתם אללאזמון טאעה אללה רבכם כלכם אחיא אליום
ה אנט̇רו קד עלמתכם רסומא ואחכאמא כמא אמרני אללה רבי לתצנעוהא פי אלבלד אלד̇י אנתם צאירון אליה לתחוזוה
ו פאחפט̇והא ואעמלו בהא פאנהא חכמתכם ופהמכם בחצ̇רה אלאמם אד̇א הם סמעו הד̇ה אלרסום יקולו יקינא אן הד̇א אלקביל אלכביר שעב חכים פהים
ז לאן אית אמה כבירה להא אלאה קריב אליהא כאלאלאה רבנא מנא מתי מא דעונאה
ח ואית אמה כבירה להא רסום ואחכאם עאדלה כג̇מיע הד̇ה אלתוריה אלתי אנא תאליהא עליכם אליום
ט וכ̇אצה אחתרס ואחפט̇ נפסך ג̇דא כילא תנסא אלכלאם אלד̇י ראתה עינאך ויזול מן קלבך טול איאם חיאתך בל ערפה לאבנך ואבן אבנך
י פי יום וקפת בין ידי אללה רבך ענד חרב חין קאל אללה לי אג̇מע לי אלקום חתי אסמעהם כלאמי לכי יתעלמו אן יכ̇אפוני טול אלאיאם אלתי הם מקימון עלי אלארץ̇ ויעלמו בניהם
יא פתקדמתם ווקפתם אספאל אלג̇בל ואלג̇בל משתעל באלנאר אלי כבד אלסמא יחיט בה סואד אלגמאם ואלצ̇באב
יב פכלמכם אללה מן לדן אלנאר פכנתם סאמעין אלכלאם ושבהא לא תרון סוי אלצות פקט
יג ואכ̇ברכם בעהדה אלד̇י אמרכם אן תעמלו בה והי אלעשר כלמאת וכתבהא עלי לוחי אלחג̇ארה
יד ואמרני אללה פי ד̇לך אלוקת באן אעלמכם רסומא ואחכאמא תעמלוא בהא פי אלבלד אלד̇י אנתם צאירון אליה לתחוזוה
טו פאחד̇רו ג̇דא עלי נפוסכם פאנכם לם תרו שבהא פי יום כ̇אטבכם אללה פי חרב מן וסט אלנאר
טז לילא תפסדון פתצנעון לכם פסלא עלי שכל כל שכ̇ץ מן ד̇כר או אנתי
יז או שכל מן בהאים אלארץ̇ או שכל מן אלטאיר ד̇י אלג̇נאח אלד̇י יטיר פי אלסמא
יח או שכל ממא ידב עלי אלארץ̇ או שכל מן אלסמך אלד̇י פי אלמא תחת אלארץ̇
יט כילא תרפע עיניך אלי אלסמא פתנט̇ר אלשמס ואלקמר ואלכואכב וג̇מיע נג̇ום אלסמא פתזול ותסג̇ד להא ותעבדהא אלתי בת̇ נורהא אללה רבך לג̇מיע אלשעוב אלד̇ין תחת ג̇מיע אלסמא
כ ואנתם אצטפאכם אללה ואכ̇רג̇כם מן שביה בכור אלחדיד מן מצר לתכונו לה שעב צפוה כהד̇א אליום
כא ואד̇ קד וג̇ד אללה עלי בסבבכם וקסם לילא אעבר אלארדן ולא אדכ̇ל אלבלד אלג̇יד אלד̇י מעטיך אללה רבך נחלה
כב ואנא מאית פי הד̇א אלבלד לא אעבר אלארדן ואנתם עאברוה פתחוזון ד̇לך אלבלד אלג̇יד
כג פאחד̇רו אן תנסו עהד אללה רבכם אלד̇י עהדה מעכם פתצנעו לכם פסלא שבה כל מא נהאך ענה אללה רבך
כד לאן עקאב אללה רבך נאר אכלה הו אלטאיק אלמעאקב
כה ואד̇א אולדתם בנין ובני בנין ועתקתם פי אלבלד פאפסדתם באן עמלתם פסלא מן כל שבה ופעלתם אלשר בין אללה רבכם ואסכ̇טתמוה
כו קד אשהדת עליכם מן אליום אלסמא ואלארץ̇ אנכם סתבידון סריעא מן אלבלד אלד̇י אנתם עאברון אלארדן אליה לתחוזוה ולא תטול מדתכם פיה בל אנפאד̇א תנפד̇ון
כז ויבדדכם אללה פי מא בין אלאמאם ותבקון רהט ד̇ו אחצא פימא בין אלאמם אלד̇ין יסוקכם אללה אלי ת̇ם
כח ותכ̇דמון ת̇ם אלהה מן צנעה אידי אלנאס מן חג̇ר וכ̇שב מא לא תבצר ולא תסמע ולא תאכל ולא תשתם
כט פאטלבו מן ת̇ם אללה רבכם תג̇דוה ואלתמסה מכ̇לצא בכל קלבך ונפסך
ל ואד̇א צ̇אק בך ונאלך ג̇מיע הד̇ה אלאמור פי אכ̇ר תלך אלאיאם תב אלי אללה רבך ואקבל אמורה
לא לאן אללה רבך טאיק רחים לא יכ̇ליך ולא יהלכך ולא ינסא עהד אבאיך אלד̇י קסם בה להם
לב ואלאן פסל ען אלאיאם אלאואיל אלתי סלפת מן קבלך מן יום כ̇לק אללה אדם עלי אלארץ̇ ומן טרף אלסמא אלי טרפה הל כאן קט מת̇ל הד̇א אלאמר אלעטיים או סמע מת̇לה
לג והל סמעת אמה צות אללה מכלמהא מן דאכיל אלנאר כמא סמעת אנת פעאשת
לד או רפע אללה עלמא באן טיהר פתכ̇לץ לה אמה מן בין אכ̇רי באעלאם ואיאת ובראהין ומלחמה ויד שדידה וד̇ראע ממדודה ומכ̇אוף כבירה כמא צנע לכם אללה רבכם במצר בחצ̇רתכם
לה פאנת יג̇ב עליך אן תעלם אן אללה הו אלאה לא גירה ולא סואה
לו ומן אלסמא אסמעך צותה ליודבך ועלי אלארץ̇ אוראך נארה אלעט̇ימה וסמעת כלאמה מן דאכ̇ל אלנאר
לז וד̇לך בעד מא אחב אבאך ואכ̇תאר נסלהם מן בעדהם ואכ̇רג̇ך ברצ̇איה בקולה אלעט̇ימה מן מצר
לח ליקרץ̇ אממא אכבר ואעט̇ם מנך מן בין ידיך וידכ̇לך ויעטיך בלדהם נחלה כמא תרי אליום
לט פאעלם ד̇לך וארדדה פי קלבך אן אללה הו אלאלאה פי אלסמאואת אלעליא ואלארץ̇ אלספלי לא סואה
מ ואחפט̇ רסומה ווצאיאה אלתי אמרך בהא אליום לכי יכ̇אר לך ולבניך מן בעדך ותטול מדתך פי אלבלד אלד̇י אללה רבך מעטיך טול אלזמאן
מא חיניד̇ אפרד מוסי ת̇לאת̇ קרי פי ג̇אנב אלארדן אלשרקי
מב ליהרב אליהא כל קאתל יקתל צאחבה בגיר קצד והו גיר שאני לה מן אמס ומא קבלה פיהרב אלי ואחדה מנהא פיחיא
מג פבצר פי אלסהל מן אלבריה מן בלד ראבן וראמות פי אלג̇רש מן בלד גד וגולן אלבת̇ניה מן בלד מנשה