מעגל החיים · תפילה לחולה
מִזְמוֹר לְדָוִד, יהוה רֹעִי לֹא אֶחְסָר׃ בִּנְאוֹת דֶּֽשֶׁא יַרְבִּיצֵֽנִי, עַל־מֵי מְנֻחוֹת יְנַהֲלֵֽנִי׃ נַפְשִׁי יְשׁוֹבֵב, יַנְחֵֽנִי בְמַעְגְּלֵי־צֶֽדֶק לְמַֽעַן שְׁמוֹ׃ גַּם כִּי־אֵלֵךְ בְּגֵיא צַלְמָֽוֶת לֹא־אִירָא רָע, כִּי־אַתָּה עִמָּדִי, שִׁבְטְךָ וּמִשְׁעַנְתֶּֽךָ הֵֽמָּה יְנַחֲמֻֽנִי׃ תַּעֲרֹךְ לְפָנַי שֻׁלְחָן נֶֽגֶד צֹרְרָי, דִּשַּֽׁנְתָּ בַשֶּֽׁמֶן רֹאשִׁי, כּוֹסִי רְוָיָה׃ אַךְ טוֹב וָחֶֽסֶד יִרְדְּפֽוּנִי כָּל־יְמֵי חַיָּי, וְשַׁבְתִּי בְּבֵית־יהוה לְאֹֽרֶךְ יָמִים׃
לְדָוִד, בָּרְכִי נַפְשִׁי אֶת־יהוה, וְכָל־קְרָבַי אֶת־שֵׁם קָדְשׁוֹ׃ בָּרְכִי נַפְשִׁי אֶת־יהוה, וְאַל־תִּשְׁכְּחִי כָּל־גְּמוּלָיו׃ הַסֹּלֵֽחַ לְכָל־עֲוֹנֵֽכִי, הָרֹפֵא לְכָל־תַּחֲלוּאָֽיְכִי׃ הַגּוֹאֵל מִשַּֽׁחַת חַיָּֽיְכִי, הַמְעַטְּרֵֽכִי חֶֽסֶד וְרַחֲמִים׃ הַמַּשְׂבִּֽיעַ בַּטּוֹב עֶדְיֵךְ, תִּתְחַדֵּשׁ כַּנֶּֽשֶׁר נְעוּרָֽיְכִי׃ עֹשֵׂה צְדָקוֹת יהוה, וּמִשְׁפָּטִים לְכָל־עֲשׁוּקִים׃ יוֹדִֽיעַ דְּרָכָיו לְמֹשֶׁה, לִבְנֵי יִשְׂרָאֵל עֲלִילוֹתָיו׃ רַחוּם וְחַנּוּן יהוה, אֶֽרֶךְ אַפַּֽיִם וְרַב־חָֽסֶד׃ לֹא־לָנֶֽצַח יָרִיב, וְלֹא לְעוֹלָם יִטּוֹר׃ לֹא כַחֲטָאֵֽינוּ עָֽשָׂה לָֽנוּ, וְלֹא כַעֲוֹנֹתֵֽינוּ גָּמַל עָלֵֽינוּ׃ כִּי כִגְבֹֽהַּ שָׁמַֽיִם עַל־הָאָֽרֶץ, גָּבַר חַסְדּוֹ עַל־יְרֵאָיו׃ כִּרְחֹק מִזְרָח מִמַּעֲרָב, הִרְחִיק מִמֶּֽנּוּ אֶת־פְּשָׁעֵֽינוּ׃ כְּרַחֵם אָב עַל־בָּנִים, רִחַם יהוה עַל־יְרֵאָיו׃ כִּי־הוּא יָדַע יִצְרֵֽנוּ, זָכוּר כִּי־עָפָר אֲנָֽחְנוּ׃ אֱנוֹשׁ כֶּחָצִיר יָמָיו, כְּצִיץ הַשָּׂדֶה כֵּן יָצִיץ׃ כִּי רֽוּחַ עָבְרָה־בּוֹ וְאֵינֶֽנּוּ, וְלֹא־יַכִּירֶֽנּוּ עוֹד מְקוֹמוֹ׃ וְחֶֽסֶד יהוה מֵעוֹלָם וְעַד־עוֹלָם עַל־יְרֵאָיו, וְצִדְקָתוֹ לִבְנֵי בָנִים׃ לְשֹׁמְרֵי בְרִיתוֹ, וּלְזֹכְרֵי פִקֻּדָיו לַעֲשׂוֹתָם׃ יהוה בַּשָּׁמַֽיִם הֵכִין כִּסְאוֹ, וּמַלְכוּתוֹ בַּכֹּל מָשָֽׁלָה׃ בָּרְכוּ יהוה מַלְאָכָיו, גִּבֹּֽרֵי כֹֽחַ עֹשֵׂי דְבָרוֹ, לִשְׁמֹֽעַ בְּקוֹל דְּבָרוֹ׃ בָּרְכוּ יהוה כָּל־צְבָאָיו, מְשָׁרְתָיו עֹשֵׂי רְצוֹנוֹ׃ בָּרְכוּ יהוה כָּל־מַעֲשָׂיו, בְּכָל־מְקֹמוֹת מֶמְשַׁלְתּוֹ, בָּרְכִי נַפְשִׁי אֶת־יהוה׃
לַמְנַצֵּֽחַ לְדָוִד מִזְמוֹר, יהוה חֲקַרְתַּֽנִי וַתֵּדָע׃ אַתָּה יָדַֽעְתָּ שִׁבְתִּי וְקוּמִי, בַּֽנְתָּה לְרֵעִי מֵרָחוֹק׃ אָרְחִי וְרִבְעִי זֵרִֽיתָ, וְכָל־דְּרָכַי הִסְכַּֽנְתָּה׃ כִּי אֵין מִלָּה בִּלְשׁוֹנִי, הֵן יהוה יָדַֽעְתָּ כֻלָּהּ׃ אָחוֹר וָקֶֽדֶם צַרְתָּֽנִי, וַתָּֽשֶׁת עָלַי כַּפֶּֽכָה׃ פְּלִיאָה דַֽעַת מִמֶּֽנִּי, נִשְׂגְּבָה לֹא־אֽוּכַל לָהּ׃ אָנָה אֵלֵךְ מֵרוּחֶֽךָ, וְאָֽנָה מִפָּנֶֽיךָ אֶבְרָח׃ אִם־אֶסַּק שָׁמַֽיִם שָׁם אָֽתָּה, וְאַצִּֽיעָה שְּׁאוֹל הִנֶּֽךָּ׃ אֶשָּׂא כַנְפֵי־שָֽׁחַר, אֶשְׁכְּנָה בְּאַחֲרִית יָם׃ גַּם־שָׁם יָדְךָ תַנְחֵֽנִי, וְתֹאחֲזֵֽנִי יְמִינֶֽךָ׃ וָאֹמַר אַךְ־חֹֽשֶׁךְ יְשׁוּפֵֽנִי, וְלַֽיְלָה אוֹר בַּעֲדֵֽנִי׃ גַּם־חֹֽשֶׁךְ לֹא־יַחְשִׁיךְ מִמֶּֽךָּ, וְלַֽיְלָה כַּיּוֹם יָאִיר, כַּחֲשֵׁיכָה כָּאוֹרָה׃ כִּי־אַתָּה קָנִֽיתָ כִלְיֹתָי, תְּסֻכֵּֽנִי בְּבֶֽטֶן אִמִּי׃ אוֹדְךָ עַל כִּי נוֹרָאוֹת נִפְלֵֽיתִי, נִפְלָאִים מַעֲשֶֽׂיךָ, וְנַפְשִׁי יֹדַֽעַת מְאֹד׃ לֹא־נִכְחַד עָצְמִי מִמֶּֽךָּ, אֲשֶׁר־עֻשֵּֽׂיתִי בַסֵּֽתֶר, רֻקַּֽמְתִּי בְּתַחְתִּיּוֹת אָֽרֶץ׃ גָּלְמִי רָאוּ עֵינֶֽיךָ, וְעַל־סִפְרְךָ כֻּלָּם יִכָּתֵֽבוּ, יָמִים יֻצָּֽרוּ, וְלוֹ אֶחָד בָּהֶם׃ וְלִי מַה־יָּקְרוּ רֵעֶֽיךָ אֵל, מֶה עָצְמוּ רָאשֵׁיהֶם׃ אֶסְפְּרֵם מֵחוֹל יִרְבּוּן, הֱקִיצֹֽתִי וְעוֹדִי עִמָּךְ׃ אִם־תִּקְטֹל אֱלֽוֹהַּ רָשָׁע, וְאַנְשֵׁי דָמִים סֽוּרוּ מֶֽנִּי׃ אֲשֶׁר יֹמְרֽוּךָ לִמְזִמָּה, נָשׂוּא לַשָּׁוְא עָרֶֽיךָ׃ הֲלוֹא־מְשַׂנְאֶֽיךָ יהוה אֶשְׂנָא, וּבִתְקוֹמְמֶֽיךָ אֶתְקוֹטָט׃ תַּכְלִית שִׂנְאָה שְׂנֵאתִים, לְאֹיְבִים הָֽיוּ לִי׃ חָקְרֵֽנִי אֵל וְדַע לְבָבִי, בְּחָנֵֽנִי וְדַע שַׂרְעַפָּי׃ וּרְאֵה אִם־דֶּרֶךְ־עֹֽצֶב בִּי, וּנְחֵֽנִי בְּדֶֽרֶךְ עוֹלָם׃
תְּפִלָּה לְעָנִי כִי־יַעֲטֹף, וְלִפְנֵי יהוה יִשְׁפֹּךְ שִׂיחוֹ׃ יהוה שִׁמְעָה תְפִלָּתִי, וְשַׁוְעָתִי אֵלֶֽיךָ תָבוֹא׃ אַל־תַּסְתֵּר פָּנֶֽיךָ מִמֶּֽנִּי בְּיוֹם צַר לִי, הַטֵּה־אֵלַי אָזְנֶֽךָ, בְּיוֹם אֶקְרָא מַהֵר עֲנֵֽנִי׃
אָנָּא יהוה רוֹפֵא כָל בָּשָׂר, רַחֵם עָלַי, וּסְעָדֵֽנִי בְּחַסְדְּךָ הַגָּדוֹל עַל עֶֽרֶשׂ דְּוָי, כִּי אֻמְלַל אָֽנִי. שְׁלַח לִי תְּרוּפָה וּתְעָלָה, בְּתוֹךְ שְׁאָר חוֹלֵי יִשְׂרָאֵל. רְפָא אֶת מַכְאוֹבִי, וְחַדֵּשׁ כַּנֶּֽשֶׁר נְעוּרָי. תֵּן בִּינָה לָרוֹפֵא, וְיִגְהֶה מִמֶּֽנִּי מְזוֹרִי, וַאֲרוּכָתִי מְהֵרָה תִצְמָח. שְׁמַע תְּפִלָּתִי, וְהוֹסֵף יָמִים עַל יָמַי, וַאֲכַלֶּה שְׁנוֹתַי בַּנְּעִימִים, לְמַֽעַן אוּכַל לַעֲבֹד אוֹתְךָ, וְלִשְׁמֹר פִּקּוּדֶֽיךָ בְּלֵב שָׁלֵם. הֲבִינֵֽנִי וְאֵדְעָה, כִּי לִשְׁלוֹמִי מַר לִי מָר. וְאַל אֶמְאַס אֶת מוּסָרְךָ, וּבְתוֹכַחְתְּךָ אַל אָקוּץ.
אֱלֽוֹהַּ סְלִיחוֹת, חַנּוּן וְרַחוּם אֶֽרֶךְ אַפַּֽיִם וְרַב חָֽסֶד, מוֹדֶה אֲנִי לְפָנֶֽיךָ בְּלֵב נִשְׁבָּר וְנִדְכֶּה כִּי חָטָֽאתִי, וְהָרַע בְּעֵינֶֽיךָ עָשִֽׂיתִי. הִנֵּה נִחַֽמְתִּי עַל רָעָתִי, וָאָשׁוּב בִּתְשׁוּבָה שְׁלֵמָה לְפָנֶֽיךָ. עָזְרֵֽנִי אֱלֹהֵי יִשְׁעִי, וְלֹא אָשׁוּב לְכִסְלָה, וְאֶתְהַלֵּךְ לְפָנֶֽיךָ בֶּאֱמֶת וּבְתָמִים. שַׂמֵּֽחַ נֶֽפֶשׁ עַבְדֶּֽךָ, כִּי־אֵלֶֽיךָ אֲדֹנָי, נַפְשִׁי אֶשָּׂא׃ רְפָאֵֽנִי יהוה וְאֵרָפֵא, הוֹשִׁיעֵֽנִי וְאִוָּשֵֽׁעָה, כִּי תְהִלָּתִי אָֽתָּה: אָמֵן וְאָמֵן.