פרק קמג
א שְׁבָחָא לְדָוִד יְיָ שְׁמַע צְלוֹתִי אֲצֵית לְתַחֲנוּנָי בְּקוּשְׁטָךְ עֲנֵי יָתִי בְּצִדְקָתָךְ:
ב וְלָא תֵעוּל לְבֵית דִינָא עִם עַבְדָךְ אֲרוּם לָא יִזְכֵי קֳדָמָךְ כָּל דְחָי:
ג אֲרוּם רָדֵף בְּעֵל דְבָבָא נַפְשִׁי דִכְדֵךְ לְאַרְעָא חַיָתִי אוֹתְבַנִי בַּחֲשׁוֹכַיָא הֵיךְ שְׁכִיבֵי עַלְמָא הָדֵין:
ד בְּאִשְׁתַּלְהֲיוֹת עֲלַי רוּחִי בְּגוּשְׁמִי יִשְׁתַּעֲמֵם לִבִּי:
ה אִדְכַּרִית יוֹמִין מִלְקַדְמִין רְנַנֵית בְּכוּלְהוֹן עוֹבָדָךְ בְּעוֹבָדֵי אַיְדָךְ אֲמַלֵל:
ו פְּרִיסֵית אַיְדִי בִצְלוֹ קֳדָמָךְ נַפְשִׁי הֵיךְ אַרְעָא דְצַחֲיָא לְמַיָא מוֹדִיקָא לָךְ לְעָלְמִין:
ז סַרְהַב עֲנֵי יָתִי יְיָ רְגִיגַת לָךְ רוּחִי לָא תְסַלֵק שְׁכִנְתָּךְ מִנִי וְאִתְמְתִילֵית עִם נָחֲתֵי גוֹב בֵית קְבוּרְתָּא:
ח אַשְׁמִיעַ יָתִי בִּצְפַר טוּבָךְ אֲרוּם בְּמֵימְרָךְ סִבְרֵית אוֹדַע יְתִי אוֹרַח דְנָן דַאֲהַלֵךְ אֲרוּם לְוָתָךְ זְקַפֵית נַפְשִׁי בִּצְלוֹ:
ט פְּצֵי יָתִי מִבַּעֲלֵי דְבָבַי יְיָ מֵימְרָךְ מַנֵיתִי לְפָרִיק:
י אַלֵף יָתִי לְמֶעְבַּד רְעוּתָךְ אֲרוּם אַנְתְּ אֱלָהִי רוּחַ קוּדְשָׁךְ טָבָא תְּדַבֵּר יָתִי בְּאַרְעָא תְּרִיץ:
יא מִן בִּגְלַל שְׁמָךְ יְיָ תְּקַיְמִנַנִי בְּצִדְקָךְ אַפֵּק מִן עָקְתָא נַפְשִׁי:
יב וּבְחַסְדָךְ תְּמַגֵר בַּעֲלֵי דְבָבִי וּתְהוֹבַד כָּל מְעִיקֵי נַפְשִׁי אֲרוּם אֲנָא עַבְדָךְ: