פרק קטז
א רְחִימֵת אֲרוּם שְׁמַע יְיָ יַת קָלִי בָּעוּתִי:
ב אֲרוּם אַצְלֵי אוּדְנֵיהּ לִי וּבְיוֹמַי אֲנָא קָרֵי:
ג אַקִיפוּ יָתִי מְרָעֵי מוֹתָא וְעִיקְתִין דְשֵׁיוֹל אַשְׁכְּחוּנִי עִיקְתָא וְדָבוֹנָא אֶשְׁכָּח:
ד וּבִשְׁמָא דַייָ אֶקְרֵי בְּבָעוּ יְיָ שַׁזִיב נַפְשִׁי:
ה חַנָנָא יְיָ וְזַכָּאָה וֵאלָהָנָא מְרַחֵם:
ו נָטֵר שַׁרְגוּגַיָא יְיָ אִתְמַסְכְּנֵית וְלִי חֲמֵי לְמִפְרוֹק:
ז תּוּבִי נַפְשִׁי לְבֵית מְנֻחַיְכִי אֲרוּם מֵימְרָא דַייָ גְמַל טוּבָא עֲלַיְכִי:
ח אֲרוּם פְּצִיתָא נַפְשִׁי מִקְטוֹל יַת עַיְנִי מִן דִמְעֲתָא יַת רִגְלִי מִן לְאִדָחָיָא:
ט אֶתְהַלֵךְ קֳדָם יְיָ בְּאַרְעַת חַיַיָא:
י הֵימְנֵית אֲרוּם אֲמַלֵל בִּכְנִישַׁת צַדִיקֵי אֲנָא שַׁבְּחִית לַחֲדָא:
יא אֲנָא אֲמַרֵית בְּמֶעֱרְקִי כָּל בְּנֵי נָשָׁא מְכַדְבִין:
יב מָה אֲתִיב קֳדָם יְיָ כָּל גְמוּלָן טָבָן דִילֵיהּ גְמִילִין חִנוּן עֲלָי:
יג כַּסָא דְפוּרְקָנַיָא אֲסוֹבַר לְעַלְמָא דְאָתֵי וּבִשְׁמָא דַייָ אֶקְרֵי:
יד נִדְרַי קֳדָם יְיָ אֲשַׁלֵם אֲתַנֵי כְדוֹן נִסוֹי לְכָל עַמֵיהּ:
טו יַקִיר קֳדָם יְיָ מִיתוּתָא דְמִשְׁתַּלְחָא לַחֲסִידוֹי:
טז בְּבָעוּ יְיָ אֲרוּם אֲנָא עַבְדָךְ אֲנָא עַבְדָךְ בַּר אַמְתָךְ שֵׁרִיתָא לְשׁוּלְשְׁלְוָתָי:
יז לָךְ אֶדְבַּח דְבַח נִכְסְתָא וּבִשְׁמָא דַייָ אֶקְרֵי:
יח נִדְרַי קֳדָם יְיָ אֲשַׁלֵם אֲתַנֵי כְדוּן נִסוֹי לְכָל עַמֵיהּ:
יט בְּדָרָתָא דִי בְּבֵית מַקְדַשׁ אֱלָהָנָא בִּמְצָעַיְכִי יְרוּשְׁלֵם הַלְלוּיָהּ: