פרק סז
א לְשַׁבָּחָא בִּנְגִינָתָא תּוּשְׁבַּחְתָּא וְשִׁירָתָא:
ב אֱלָהָא יָחוּס עֲלָנָא וִיבָרְכִנָנָא יִנְהַר זִיו אַנְפּוֹי עִמָנָא לְעַלְמִין:
ג לְהוֹדָעָא בְּאַרְעָא אוֹרְחָתָךְ בְּכָל עַמְמַיָא פּוּרְקָנָךְ:
ד יוֹדוּן קֳדָמָךְ עַמְמַיָא אֱלָהָא יוֹדוּן קֳדָמָךְ עַמְמַיָא כּוּלְהוֹן:
ה יֶחְדוּן וִידוּצוּן אוּמַיָא אֲרוּם תָּדֵין עַמַיָא בְּתִירוּצָא וְאוּמַיָא בְּאַרְעָא תַדְבְּרִינוּן לְעַלְמִין:
ו יוֹדוּן קֳדָמָךְ עַמַיָא אֱלָהָא יוֹדוּן קֳדָמָךְ עַמַיָא כוּלְהוֹן:
ז אַרְעָא יַהֲבַת אִבָּהּ יְבָרֵךְ יָתָן אֱלָהָא אֱלָהָנָא:
ח יְבָרֵךְ יָתָן אֱלָהָא וְיִדְחֲלוּן יָתֵיהּ כָּל סְיָפֵי אַרְעָא: