פרק סג
א תּוּשְׁבַּחְתָּא לְדָוִד בְּעִדָן מֶהֱוֵי בְּמַדְבְּרָא דִי בִּתְחוּם שֵׁבֶט יְהוּדָה:
ב אֱלָהָא תּוּקְפִי אַנְתְּ אֲקוּם בְּצַפְרָא קֳדָמָךְ צַחֲיָת לָךְ נַפְשִׁי רָגִיג לָךְ בִּסְרִי בְּאַרְעָא צַדְיָא וּמְשַׁלְהֵי מִדְלֵית מוֹי:
ג הֵיכְנָא בַּאֲתַר קוּדְשָׁא חֲמִיתָךְ זַכֵּי יָתִי לְמֶחֱמֵי עוּשְׁנָךְ וִיקָרָךְ:
ד אֲרוּם טָב הוּא חַסְדָךְ דְתַעְבֵּד לְצַדִיקַיָא לְעַלְמָא דְאָתֵי מִן חַיֵי דִיהַבְתָּא לְרַשִׁיעַיָא בְּעַלְמָא הָדֵין בְגִין כֵּן סִפְוָתִי יְשַׁבְּחוּנָךְ:
ה הֵיכְנָא אֲבָרְכִנָךְ בְּחַיַי בְּעַלְמָא הָדֵין בְּשׁוּם מֵימְרָךְ אֶפְרוֹס יְדַי בִּצְלוֹ לְעַלְמָא דְאָתֵי:
ו הֵיךְ תְּרַב וּדְהַן תִּסְבַּע נַפְשִׁי וְסִפְוָן דְתוּשְׁבְּחָן יְשַׁבַּח פּוּמִי:
ז אִין אִדְכַּרְתִּיךְ עַל דַרְגָשִׁי בְּמַטַרְתָּ אֲרַנֵן בְּמֵימְרָךְ:
ח אֲרוּם הֲוֵיתָא סָעִיד לִי וּבִטְלַל שְׁכִנְתָּךְ אֲבוּעַ:
ט אִדְבָקַת נַפְשִׁי בָּתַר אוֹרַיְיתָךְ בִּי סַעֲדַת יְמִינָךְ:
י וְהִנוּן לִקְבוּרְתָּא יִתְבְּעוּן נַפְשִׁי יַעֲלוּן בְּאַרְעִית אַרְעָא:
יא יְדַחֲלוּנֵיהּ מְטוּל מְחַת סַיְפָא מוֹהֲבֵית תְּעָלַיָא יֶהֱווּן:
יב וּמַלְכָּא יֶחְדֵי בְּמֵימַר אֱלָהָא יְשַׁבַּח כָּל דִי מְקַיֵים בְּמֵימְרֵיהּ אֲרוּם יְסַרְנֵק פּוּמְהוֹן כָּל דְמַלְלֵי שִׁקְרָא: