פרק נב
א לְשַׁבָּחָא שִׂכְלָא טָבָא עַל יְדוֹי דְדָוִד:
ב כַּד אֱתֵי דוֹאֵג אֱדוֹמָאָה וְתַנֵי לְשָׁאוּל וַאֲמַר לֵיהּ אֲתָא דָוִד לְבֵית אֲחִימֶלֶךְ:
ג מַה תִּשְׁתַּבַּח בְּלִישָׁנָא בִישָׁא גִבַּר לְמִשְׁדֵי אֲדַם זַכָּאָה חִסְדָא דֶאֱלָהָא כָּל יוֹמָא:
ד אִתְרְגוּשְׁתָּא תְּחַשֵׁב בְּלִיבְבָךְ לִישְׁנָךְ הֵיךְ אִזְמֵל חָרִיף עָבִיד מִלֵי מַלְשִׁינוּתָא:
ה רְחֵימְתָּא בִּישׁ מִן טַב שִׁקְרָא מַלְמַלְלָא צִדְקְתָא לְעַלְמִין:
ו רְחַמְתָּא כָּל מִלֵי סַלְעֲמִיתָא לִישְׁנָא דִנְכִילוּ:
ז לְחוֹד אֱלָהָא יִתְרְעִינָךְ לְעַלְמִין יִתְבְּרִינָךְ וִיטַלְטְלִינָךְ מִלְמִיתַּב בְּמַשְׁכְּנָא וְיִתְלְשִׁינָךְ מִן אֲרַע חַיַיָא לְעָלְמִין:
ח וְיֶחְמוּן צַדִיקַיָא בְּפוּרְעָנוּתָא דְרַשִׁיעַיָא וִידַחֲלוּ מִן קֳדָם יְיָ וְאַמְטוּלְתֵּיהּ יִגְחֲכוּן:
ט וְיֵימְרוּן הָא גַבְרָא דְלָא שַׁוֵי מֵימְרָא דַייָ עוּשְׁנֵיהּ סְבַר בְּעָתְרֵיהּ עֲשִׁין בְּמָמוֹנֵיהּ:
י וַאֲנָא הֵיךְ אִילָן זֵיתָא עַבּוּף בְּבֵית מַקְדַשׁ אֱלָהָא סַבְרֵת בְּחִסְדָא דֶאֱלָהָא לְעָלְמֵי עָלְמִין:
יא אוֹדֵי קֳדָמָךְ לַעֲלַם אֲרוּם עֲבַדְתָּ פּוּרְעָנוּת דִינִי וְאַמְתִּין שְׁמָךְ אֲרוּם טָב קֳבֵל חֲסִידָיִךְ: