פרק לח
א תֻּשְׁבַּחְתָּא לְדָוִד דָכְרָנָא טָבָא עַל יִשְׂרָאֵל:
ב יְיָ לָא בְרוּגְזָךְ תְּכַסֵן יָתִי וְלָא בְרִתְחָךְ תִּרְדֵי יָתִי:
ג מְטוּל דְגִירָךְ אִתַּחֲתָן עֲלָי וּשְׁרָת עֲלַי מְחַת יְדָךְ:
ד לֵית אָסוּ בְּגוּשְׁמִי מִן קֳדָם רוּגְזָךְ לֵית שְׁלָם בְּאֵבָרַי מִן קֳדָם חוֹבִי:
ה אֲרוּם חוֹבַי עֲבַרוּ רֵישִׁי הֵיךְ מְטוּל יַקִיר יְקַרוּ מִנִי:
ו סְרִיאוּ מְאִיסוּ הַלְבְּשׁוּשַׁי מִן קֳדָם טִפְּשׁוּתִי:
ז עֲקִימֵית שֵׁחַיֵת עַד לַחֲדָא כָּל יוֹמָא חַכִּיר הַלְכִית:
ח אֲרוּם כְּסָלַי אִתְמַלְיָן קְדִיחֲתָא וְלֵית אָסוּ בְּגוּשְׁמִי:
ט פָּגִית וְאִתְמַכְיִת עַד לַחֲדָא רְגִישִׁית מִנַהֲמוּתָא דְלִבִּי:
י יְיָ לְקִבְלָךְ כָּל רַגִיגְתִּי וְתִנְחֲתִי מִנָךְ לָא מִטַמְרָא:
יא לִבְבִי צְמַרְמַר שַׁבְקַנִי חֵילִי וּנְהוֹר עֵינֵי בְּרַם הִנוּן לֵיתֵיהוֹן עִמִי:
יב רְחִימַי וְחַבְרַי מִקֳבֵל מַכְתָּשִׁי קָמוּ וּקְרִיבַי מֵרָחֵיק קָיְמִין:
יג וַעֲבַדוּ פַּחִין תָּבְעֵי נַפְשִׁי וּבָעֵי בִּישׁוּתִי מַלִילוּ שִׁקְרָא וְנִכְלָא כָּל יוֹמָא מְרַנְנִין:
יד וַאֲנָא הֵיךְ חָרְשָׁא לָא אֶשְׁמַע וְהֵיךְ אִלְמָנָא דְלָא פְתַח פּוּמֵיהּ:
טו וְהַוֵיתִי כִּגְבַר דְלָא שְׁמַע מֵעַלְמָא וְלָא אִית בְּפוּמֵיהּ מַכְסִנְיָתָא:
טז אֲרוּם קֳדָמָךְ יְיָ צַלֵיתִי אַנְתְּ תְּקַבֵּל יְיָ אֱלָהִי:
יז אֲרוּם אֲמַרֵית דִלְמָא יֶחֱדוּן עֲלַי בְּאִזְדַעְזָעוּת רִגְלִי עֲלַי אִיתְרַבְרַבוּ:
יח אֲרוּם אֲנָא לִתְבִירָא מְעַתַּד וְכֵיבִי לְקִבְלִי תְדִירָא:
יט אֲרוּם חוֹבִי אַתְנֵי אִתְיְצֵף מִן חֶטְאִי:
כ וּבַעֲלֵי דְבָבַי חַיֵי אֲלִימוּ וְסַגִיאִין סָנְאַי עַל שִׁקְרָא:
כא וּפָרְעִין בִּישְׁתָּא חֲלַף טָבְתָא מַסְטְנָן לִי חִלוּפִי דִרְדַפֵית טָב:
כב לָא תִשְׁבְּקִינַנִי יְיָ אֱלָהִי לָא תַּרְחִיק מִינִי:
כג זְרִיז לְסִיוּעִי יְיָ פּוּרְקָנִי: