פרק כד
א לְדָוִד תּוּשְׁבַּחְתָּא לַיָי הָא אַרְעָא וּבִרְיָתָהָא תֵּבֵל וּדְיָתְבִין בָּהּ:
ב מְטוּל דִי הוּא עַל יַמַיָא שַׁוֵי שִׁתְסָהָא וְעַל נַהַרְוָתָא אַתְקְנָאָה:
ג מַן יִסַק לְטוּר בֵּית מַקְדְשָׁא דַייָ וּמַן יְקוּם בַּאֲתַר קוּדְשַׁיָא:
ד דְכֵי אַיְדַיָא וּבְרִיר רַעְיוֹנָא דְלָא אוֹמֵי עַל שִׁקְרָא לְחַיָבָא נַפְשֵׁיהּ וְלָא קָאֵם לְנִכְלָא:
ה יְקַבֵּל בִּרְכָתָא מִן קֳדָם יְיָ וְצִדְקָתָא מֵאֱלָהָא דְפוּרְקָנֵיהּ:
ו דְנָן דָרָא דְתָבְעִין לֵיהּ דְבָעִין סְבַר אַפּוֹי יַעֲקֹב לְעָלְמִין:
ז זְקֻפוּ תַרְעֵי בֵית מַקְדְשָׁא רֵישֵׁיכוֹן וְאִזְדְקָפוּ מַעֲלָנֵי עַלְמָא וְיֵעוּל מֶלֶךְ יַקִירָא:
ח מַן הוּא דֵיכֵי מַלְכָּא יַקִירָא יְיָ עָשִׁין וְגִבַּר יְיָ מָרֵי גְבוּרְתָּא וְעָבַד קְרָבָא:
ט זְקוּפוּ תַרְעֵי גִנְתָא דְעֵדֶן רֵישֵׁיכוֹן וְאִזְדְקָפוּ מַעֲלָנֵי עַלְמָא וְיֵעוּל מַלְכָּא יַקִירָא:
י מַן הוּא דֵיכֵי מַלְכָּא יַקִירָא יְיָ צְבָאוֹת הוּא מַלְכָּא יַקִירָא לְעָלְמִין: