פרק כא
א לְשַׁבָּחָא תּוּשְׁבַּחְתָּא לְדָוִד:
ב יְיָ בְעָשְׁנָךְ יֶחְדֵי מְלַךְ מְשִׁיחָא וּבְפוּרְקָנָךְ כְּמָא יְרַנֵן לַחֲדָא:
ג רִגְגַת נַפְשֵׁיהּ יְהַבְתְּ לֵיהּ וּפֵרוּשׁ סִפְוָתֵיהּ לָא כְלֵיתָא לְעָלְמִין:
ד אֲרוּם תְקַדְמִנֵיהּ בִּרְכָן טָבָן תְּשַׁוֵי עַל רֵישֵׁיהּ כְּלִיל דְהַב סְנִינָא:
ה חַיֵי עַלְמָא שָׁאַל מִנָךְ יְהַבְתָּ לֵיהּ נָגְדָא דְיוֹמַיָא לְעַלְמֵי עָלְמִין:
ו סַגִי יְקָרֵיהּ בְּפוּרְקָנָךְ תּוּשְׁבַּחְתָּא וְשִׁבְהוֹרָא תְשַׁוֵי עֲלוֹי:
ז מְטוּל דִי תְשַׁוִנֵיהּ בִּרְכַן לְעָלְמִין תְּחַדִנֵיהּ בְּחֶדְוָתָא דִי מִן קֳדָמָךְ:
ח מְטוּל דִמְלַךְ מְשִׁיחָא סַבִּיר בַּיָי וּבְחִסְדָא דְעִלָאָה לָא יְזוּעַ:
ט תַּדְבֵּק מְחַת אַיְידָךְ לְכָל בַּעֲלֵי דְבָבָךְ פּוּרְעֲנוּת יְמִינָךְ תִּשְׁכַּח לְכָל סָנְאָךְ:
י תְּשַׁוִינוּן הֵיךְ אַתּוּן נוּרָא לְעִדָנֵי רוּגְזָךְ יְיָ בְּרִגְזֵיהּ יְסַלְעֲמִנוּן וְתֵיכְלִנוּן בִּעוּר גֵיהִנָם:
יא בְּנֵיהוֹן מֵאַרְעָא תְהוֹבַד וְזַרְעִיתְהוֹן מִבְּנֵי נָשָׁא:
יב מְטוּל דַחֲשִׁילוּ עֲלָךְ בִּישְׁתָא חֲשִׁיבוּ מַחְשְׁבָן בִּישִׁין וְלָא יְכִלוּנָךְ:
יג מְטוּל דְשַׁוִיתִנוּן לְעַמָךְ כְּתַף חַד בְּאַטוּנֵי מַשְׁכְּנָךְ תְּתַקֵן אוֹרְחֵהוֹן קֳדָמֵיהוֹן:
יד אִזְדְקַף יְיָ בְּעוּשְׁנָךְ נְשַׁבָּחָא וּנְדוּץ בִּגְבוּרְתָּךְ: