פרק כ
א וַאֲתִיב צוֹפַר דְמִן נַעֲמָה וַאֲמַר:
ב מְטוּל דְרַעֲיוֹנַי מְתִיבָן לִי וּמְטוּל דִרְגִישְׁתִּי בִי:
ג מַרְדוּתָא דִכְסוּפִי אֶשְׁמַע וְהֵיךְ פּוּחָא מִן בְּיוּנְתִּי יְתִיבִינַנִי:
ד הֲדָא יְדַעְתָּא מִן אַוְלָא מִן עִדָן דְאִשְׁתְּוֵי בַּר נָשׁ עֲלַוֵי אַרְעָא:
ה אֲרוּם בּוּעַת רַשִׁיעֵי שִׁצִיָת בַּעֲגָל וְחֶדְוַת דִילָטוֹר עַד שַׁעֲתָא:
ו אִין יִסַק לְצֵית שְׁמַיָא זְוּקְפֵיהּ וְרֵישֵׁיהּ לַעֲנָנָא יִמְטֵי:
ז הֵיךְ רַעְיֵהּ לְעַלְמָא יְהוֹבֵד חָמוֹי יֵימְרוּן הָאן הוּא:
ח הֵיךְ חֶלְמָא יְטוּס וְלָא יַשְׁכְּחוּנֵיהּ יִגְלֵי הֵיךְ חָזוּתָא דְלֵילְיָא:
ט עֵינָא סְקַרְתֵּיהּ וְלָא תוֹסִיף וְלָא תוּב תִּסְכְּנֵיהּ אַתְרֵיהּ:
י בְּנוֹי יְרַעֲעוּן מִסְכְּנִין וִידוֹי מְשַׁלְמָן תְּקוֹף צַעֲרֵיהּ:
יא גַרְמוֹי אִתְמְלִיאוּ חֵילֵיהּ וּבַהֲדֵיהּ עַל עַפְרָא תִשְׁכּוּב:
יב אִין מִתְבַּסְמָא בְּפוּמֵיהּ בִּישְׁתָּא יְכַדְבִנָהּ תְּחוֹת לִישָׁנֵיהּ:
יג יְחוּס עֲלָה וְלָא יִשְׁבְּקִנָהּ וִיכַסִנָה בִּמְצַע מוֹרִיגֵיהּ:
יד מֵיכְלֵיהּ בִּמְעוֹי אִתְהֲפִיךְ אַרְסָא דְחוּרְמָנִין בְּגַוֵיהּ:
טו נִכְסִין דְסַלְעֵם יְפַלֵט יָתֵיהּ מִכְּרֵסֵיהּ יְתָרְכִנֵיהּ אֱלָהָא:
טז רֵישֵׁי חוּרְמָנַיָא יִינַק תִּקְטְלִנֵיהּ לְשַׁן חִוְיָא:
יז לָא יִזְכֵּי לְמֶחֱמֵי בִטְיָפֵי נְהַרְוָת נַחֲלַיָא דְמִן דוּבְשָׁא וּלְוָי (וּלְוָאֵי):
יח מֵתִיב לֵאוּת חוּרְנָא וְלָא יִגְמַר כִּדְעֻתְרֵיהּ מִתְיְהֵב שַׁלְחוּפֵיהּ וְלָא יְדוֹץ:
יט אֲרוּם רָעַע עִסְקָא דְמִסְכֵּנִין בֵּיתָא אֲנַס וְלָא בְנָא יָתֵיהּ:
כ אֲרוּם לָא יְדַע דִיהֵי שָׁלֵיו בִּכְרֵסֵיהּ בְּגוּשְׁמֵיהּ לָא יִשְׁתֵּזֵב:
כא לֵית מְשֵׁזֵב לְמֵכְלֵיהּ מְטוּל הֵיכְנָא לָא יוֹרִיךְ טוּבֵיהּ:
כב תִּתְמְלֵי סַאֲתֵיהּ יִתְפְּרַע מַנֵיהּ כָּל אַיְדָא דְלָעֵי תֵיתִנֵיהּ:
כג יְהֵי לְמִמְלֵי כְרֵסֵיהּ יְגָרֵי בֵיהּ תְּקוֹף רוּגְזֵיהּ וְיָחַת עָלוֹי מִטְרֵין בְּשַׁלְדֵיהּ:
כד יֶעְרוֹק מִן זְיָנֵי פַרְזְלָא תְּשַׁלְחֲפִנֵיהּ קַשְׁתָּא דְכַרְכוֹמָא:
כה שְׁלַף וּנְפַק מִתֵּיקָהּ וּבַרְקָא מִמְרִירְתֵּיהּ יַהֲלוֹךְ עֲלוֹי דְחִילַיָא:
כו כָּל חֲשׁוֹכָא טְמִיעַ לְטַשְׁיוּתֵיהּ תִּגְמְרִנֵיהּ נוּר דְגֵהִנָם דְלָא נְפִיחַ יִשְׁרֵי מְשֵׁזֵב בְּמַשְׁכְּנֵיהּ:
כז יְפַרְסְמוּן אַנְגְלֵי מְרוֹמָא סוּרְחָנֵיהּ וְדַיָרֵי אַרְעָא יְקוּמוּן לְמַבְאָשָׁא לֵיהּ:
כח יְטַלְטֵל עִבּוּר בַּיְתֵיהּ מִשְׁחֵיהּ וְחַמְרֵיהּ מִזְדַלְפָן בְּיוֹמָא דְרוּגְזֵיהּ:
כט דֵין חוּלַק בַּר נָשׁ רַשִׁיעָא מִן קֳדָם יְיָ וְאַחְסָנַת מֵימְרֵיהּ מִן קֳדָם אֱלָהָא: