פרק י
א אִתְגְזַרַת נַפְשִׁי בְּחַיָי אֶשְׁבּוֹק עֲלַי מִלַי אֲמַלֵל בִּמְרִירוּת נַפְשִׁי:
ב אֵימַר לֶאֱלָהָא לָא תְחַיְבִנַנִי אוֹדַע יָתִי מְטוּל מַהּ תִּנְצֵי עִמִי:
ג הֲתַקִין קֳדָמָךְ אֲרוּם תִּטְלוֹם אֲרוּם תְּרַחֵק לְעוּת יְדָךְ וְעַל מִלְכַת דְרַשִׁיעֵי אוֹפַעְתָּ:
ד הַעַיְנִין כְּבַר בִּשְׂרָא לָךְ אִין כְּמֶחֱמֵי בַּר נָשׁ תֶּחֱמֵי:
ה הַכְּיוֹמֵי בַּר נָשׁ יוֹמַיִךְ אִין שְׁנַיִךְ הֵיךְ יוֹמֵי גַבְרָא:
ו אֲרוּם תִּבְעֵי לְעַוְיָתִי וּלְחוֹבִי תִּתְבַּע:
ז עַל מַנְדְעָךְ אֲרוּם לָא אִתְחַיֵב וְלֵית מִן יְדָךְ פָּצֵי:
ח יְדָךְ צַיְרוּנִי וַעֲבַדוּ יָתִי כַּחֲדָא חֲזוֹר חֲזוֹר וְסַלְעַמְתָּא יָתִי:
ט אִדְכַּר כְּדוּן אֲרוּם אֵיךְ טִנָא עֲבַדְתַּנִי וּלְעַפְרָא תְּתִיבִנַנִי:
י הֲלָא הֵיךְ חֶלְבָּא סַנֵנְתָּא יָתִי וְהֵיךְ גוּבְנִין קְדַשְׁתָּא יָתִי:
יא מַשְׁכָא וּבִסְרָא אַלְבִּשְׁתַּנִי וּבְגַרְמַיָא וְגִדַיָא אַשְׁתֵּיתַנִי:
יב חַיֵי וְחִסְדָא עֲבַדְתָּא עִמִי וְדָכְרָנָךְ נְטַרַת רוּחִי:
יג וְאִלֵין אֲטֵישְׁתָּא בְּלִבָּךְ יְדַעֵית אֲרוּם דָא גַבָּךְ:
יד אִין חָבֵית וּנְטַרְתַּנִי וּמִן חוֹבֵי לָא תְזַכִּנַנִי:
טו אִין חָבֵית חֲבַל עֲלַי מִן דִינָא רַבָּא וּזְכִיתִי לָא אֶזְקוֹף רֵישִׁי מִן קֳדָם חַיָבַיָא דְאֶסְבַּע חִסוּדָא וְאֶחֱמֵי סִגוּפִי:
טז וַאֲרִים יְדֵיהּ הֵיךְ אַרְיָא תְצוּר יָתִי וּתְתוּב תְּדַיֵן בִּי:
יז תְּחַדֵת סָהֲדָיִךְ לְקִבְּלִי וְתַסְגֵי רוּגְזָךְ בַּהֲדִי מִתְחַלְפָן מַחְוָתָא מִתְחַיְלִין גַבִּי:
יח וּלְמָא מִן רַחֲמָא אַפַקְתַּנִי אִתְנְגִיד וְעַיְנָא לָא תִסְכִּנַנִי:
יט הֵיכְמָה דְלָא הֲוֵיתִי אֱהֵי מִן כְּרֵיסָא לְבֵי קְבוּרְתָּא אֶתְּעַל:
כ הֲלָא קַלִילִין יוֹמַי וּפַסְקָן וְשַׁוֵי עֲלַי וַאֲנוּחַ זְעֵיר:
כא עַד דְלָא אֵיזֵל וְלָא אֲתוּב לְאַרְעָא חֲשׁוֹכָא וְטוּלָא דְמוֹתָא:
כב אַרְעָא דְתִימוֹרָהָא הֵיךְ קְבַל טוּלֵי מוֹתָא וְלָא סִדְרֵי יְתּוּב בְּנֵי נָשָׁא וּמְפַעְפְעָא הֵיךְ קְבֵל: