קטעים מתוך חי בן־מקיץ· רבנו אברהם אבן עזרא [הראב"ע]
[תחום האש]
וְאַחֲרֵי הַגְּבוּל הַזֶּה אֵשׁ אוֹכֵלָה / אֶל הַשָּׁמַיִם עוֹלָה,/ גֶּחָלֶיהָ בוֹעֲרִים / וּרְשָׁפֶיהָ סוֹעֲרִים / לְהָבֶיהָ כַחֲרָבִים / וּשְׁבִיבֶיהָ כַכּוֹכָבִים, / לֹא יְכַבּוּהָ הַגְּשָׁמִים / וְלֹא יִשְׁטְפוּהָ הַיַּמִּים./ הַסְּלָעִים יִמַּסּוּ מִמְּדוּרוֹתֶיהָ / וְהַצּוּרִים יָזוּבוּ מִשַּׁלְהֲבוֹתֶיהָ.
אָנֹכִי כַּאֲשֶׁר רָאִיתִי אוֹתָהּ / וְחָזִיתִי דְמוּתָהּ,/ רָפוּ יָדַי וְכָשְׁלוּ בִרְכַּי / וְעָשֲׁשׁוּ מִכַּעַס עֵינַי / וְנָפְלוֹ מִפַּחַד פָּנַי / וְלֹא יָכֹלְתִּי לַעֲמֹד,/ כִּי נַפְשִׁי נִבְהֲלָה מְאֹד./ וַיִּגַּשׁ הָאִישׁ אֵלַי / וַיַּעֲמִידֵנִי עַל רַגְלַי / וַיֹּאמֶר אֵלַי / “אַל תִּירָא וְאַל יֵרַךְ לְבָבָךְ / כִּי תֵלֵךְ בְּמוֹ אֵשׁ לֹא תִכָּוֶה וְלֶהָבָה לֹא תִבְעַר בָּךְ!” / וַיַּעֲבֹר עַל פָּנַי / וַיֹּאמֶר “בּוֹא, בְּרוּךְ יְיָ!” / וַיִּקָּחֵנִי מְהֵרָה / וַיַּעֲבִירֵנִי בַמְּדוּרָה./ וָאֵרֶא הַלֶּהָבִים לְפָנֵינוּ מֻשָּׂקִים / וְהַשְּׁבִיבִים סְבִיבוֹתֵינוּ דוֹלְקִים / וְהָרְשָׁפִים אוֹתָנוּ מַקִּיפִים –/ וַאֲנַחְנוּ שְׁלֵמִים וְאֵין אָנוּ נִשְׂרָפִים.