אור ברסלב
סידור קורן השלם; אשכנז ימי החול › בקשות אישיות

סידור קורן השלם; אשכנז

ימי החול · בקשות אישיות

אמירות לאחר התפילה

פרשת המן

יְהִי רָצוֹן מִלְּפָנֶֽיךָ, יהוה אֱלֹהֵֽינוּ וֵאלֹהֵי אֲבוֹתֵֽינוּ, שֶׁתַּזְמִין פַּרְנָסָה לְכָל עַמְּךָ בֵּית יִשְׂרָאֵל, וּפַרְנָסָתִי וּפַרְנָסַת אַנְשֵׁי בֵיתִי בִּכְלָלָם, בְּנַֽחַת וְלֹא בְצַֽעַר, בְּכָבוֹד וְלֹא בְּבִזּוּי, בְּהֶתֵּר וְלֹא בְאִסּוּר, כְּדֵי שֶׁנּוּכַל לַעֲבֹד עֲבוֹדָתֶֽךָ וְלִלְמֹד תּוֹרָתֶֽךָ, כְּמוֹ שֶׁזַּֽנְתָּ לַאֲבוֹתֵֽינוּ מָן בַּמִּדְבָּר, בְּאֶֽרֶץ צִיָּה וַעֲרָבָה:

וַיֹּֽאמֶר יהוה אֶל־מֹשֶׁה, הִנְנִי מַמְטִיר לָכֶם לֶֽחֶם מִן־הַשָּׁמָֽיִם, וְיָצָא הָעָם וְלָקְטוּ דְּבַר־יוֹם בְּיוֹמוֹ, לְמַֽעַן אֲנַסֶּֽנּוּ הֲיֵלֵךְ בְּתוֹרָתִי אִם־לֹא׃ וְהָיָה בַּיּוֹם הַשִּׁשִּׁי, וְהֵכִֽינוּ אֵת אֲשֶׁר־יָבִֽיאוּ, וְהָיָה מִשְׁנֶה עַל אֲשֶׁר־יִלְקְטוּ יוֹם יוֹם׃ וַיֹּֽאמֶר מֹשֶׁה וְאַהֲרֹן אֶל־כָּל־בְּנֵי יִשְׂרָאֵל, עֶֽרֶב וִידַעְתֶּם כִּי יהוה הוֹצִיא אֶתְכֶם מֵאֶֽרֶץ מִצְרָֽיִם׃ וּבֹֽקֶר וּרְאִיתֶם אֶת־כְּבוֹד יהוה, בְּשָׁמְעוֹ אֶת־תְּלֻנֹּתֵיכֶם עַל־יהוה, וְנַֽחְנוּ מָה כִּי תַלִּֽינוּ עָלֵֽינוּ׃ וַיֹּֽאמֶר מֹשֶׁה, בְּתֵת יהוה לָכֶם בָּעֶֽרֶב בָּשָׂר לֶאֱכֹל וְלֶֽחֶם בַּבֹּֽקֶר לִשְׂבֹּֽעַ, בִּשְׁמֹֽעַ יהוה אֶת־תְּלֻנֹּתֵיכֶם אֲשֶׁר־אַתֶּם מַלִּינִם עָלָיו, וְנַֽחְנוּ מָה, לֹא־עָלֵֽינוּ תְלֻנֹּתֵיכֶם כִּי עַל־יהוה׃ וַיֹּֽאמֶר מֹשֶׁה אֶל־אַהֲרֹן, אֱמֹר אֶל־כָּל־עֲדַת בְּנֵי יִשְׂרָאֵל, קִרְבוּ לִפְנֵי יהוה כִּי שָׁמַע אֵת תְּלֻנֹּתֵיכֶם׃ וַיְהִי כְּדַבֵּר אַהֲרֹן אֶל־כָּל־עֲדַת בְּנֵי־יִשְׂרָאֵל, וַיִּפְנוּ אֶל־הַמִּדְבָּר, וְהִנֵּה כְּבוֹד יהוה נִרְאָה בֶּעָנָן׃

וַיְדַבֵּר יהוה אֶל־מֹשֶׁה לֵּאמֹר׃ שָׁמַֽעְתִּי אֶת־תְּלוּנֹּת בְּנֵי יִשְׂרָאֵל, דַּבֵּר אֲלֵהֶם לֵאמֹר בֵּין הָעַרְבַּיִם תֹּאכְלוּ בָשָׂר וּבַבֹּֽקֶר תִּשְׂבְּעוּ־לָֽחֶם, וִידַעְתֶּם כִּי אֲנִי יהוה אֱלֹהֵיכֶם׃ וַיְהִי בָעֶֽרֶב, וַתַּֽעַל הַשְּׂלָו וַתְּכַס אֶת־הַמַּחֲנֶה, וּבַבֹּֽקֶר הָיְתָה שִׁכְבַת הַטָּל סָבִיב לַמַּחֲנֶה׃ וַתַּֽעַל שִׁכְבַת הַטָּל, וְהִנֵּה עַל־פְּנֵי הַמִּדְבָּר דַּק מְחֻסְפָּס, דַּק כַּכְּפֹר עַל־הָאָֽרֶץ׃ וַיִּרְאוּ בְנֵי־יִשְׂרָאֵל וַיֹּאמְרוּ אִישׁ אֶל־אָחִיו מָן הוּא, כִּי לֹא יָדְעוּ מַה־הוּא, וַיֹּֽאמֶר מֹשֶׁה אֲלֵהֶם, הוּא הַלֶּֽחֶם אֲשֶׁר נָתַן יהוה לָכֶם לְאָכְלָה׃ זֶה הַדָּבָר אֲשֶׁר צִוָּה יהוה, לִקְטוּ מִמֶּֽנּוּ אִישׁ לְפִי אָכְלוֹ, עֹֽמֶר לַגֻּלְגֹּֽלֶת מִסְפַּר נַפְשֹׁתֵיכֶם, אִישׁ לַאֲשֶׁר בְּאָהֳלוֹ תִּקָּֽחוּ׃ וַיַּעֲשׂוּ־כֵן בְּנֵי יִשְׂרָאֵל, וַיִּלְקְטוּ הַמַּרְבֶּה וְהַמַּמְעִיט׃ וַיָּמֹֽדּוּ בָעֹֽמֶר, וְלֹא הֶעְדִּיף הַמַּרְבֶּה וְהַמַּמְעִיט לֹא הֶחְסִיר, אִישׁ לְפִי־אָכְלוֹ לָקָֽטוּ׃ וַיֹּֽאמֶר מֹשֶׁה אֲלֵהֶם, אִישׁ אַל־יוֹתֵר מִמֶּֽנּוּ עַד־בֹּֽקֶר׃ וְלֹא־שָׁמְעוּ אֶל־מֹשֶׁה, וַיּוֹתִֽרוּ אֲנָשִׁים מִמֶּֽנּוּ עַד־בֹּֽקֶר, וַיָּֽרֻם תּוֹלָעִים וַיִּבְאַשׁ, וַיִּקְצֹף עֲלֵהֶם מֹשֶׁה׃ וַיִּלְקְטוּ אֹתוֹ בַּבֹּֽקֶר בַּבֹּֽקֶר אִישׁ כְּפִי אָכְלוֹ, וְחַם הַשֶּֽׁמֶשׁ וְנָמָס׃ וַיְהִי בַּיּוֹם הַשִּׁשִּׁי לָקְטוּ לֶֽחֶם מִשְׁנֶה, שְׁנֵי הָעֹֽמֶר לָאֶחָד, וַיָּבֹֽאוּ כָּל־נְשִׂיאֵי הָעֵדָה וַיַּגִּֽידוּ לְמֹשֶׁה׃ וַיֹּֽאמֶר אֲלֵהֶם, הוּא אֲשֶׁר דִּבֶּר יהוה, שַׁבָּתוֹן שַׁבַּת־קֹֽדֶשׁ לַיהוה מָחָר, אֵת אֲשֶׁר־תֹּאפוּ אֵפוּ וְאֵת אֲשֶׁר־תְּבַשְּׁלוּ בַּשֵּֽׁלוּ, וְאֵת כָּל־הָעֹדֵף הַנִּֽיחוּ לָכֶם לְמִשְׁמֶֽרֶת עַד־הַבֹּֽקֶר׃ וַיַּנִּֽיחוּ אֹתוֹ עַד־הַבֹּֽקֶר כַּאֲשֶׁר צִוָּה מֹשֶׁה, וְלֹא הִבְאִישׁ וְרִמָּה לֹא־הָיְתָה־בּוֹ׃ וַיֹּֽאמֶר מֹשֶׁה אִכְלֻֽהוּ הַיּוֹם כִּי־שַׁבָּת הַיּוֹם לַיהוה, הַיּוֹם לֹא תִמְצָאֻֽהוּ בַּשָּׂדֶה׃ שֵֽׁשֶׁת יָמִים תִּלְקְטֻֽהוּ, וּבַיּוֹם הַשְּׁבִיעִי שַׁבָּת לֹא יִהְיֶה־בּוֹ׃ וַיְהִי בַּיּוֹם הַשְּׁבִיעִי יָצְאוּ מִן־הָעָם לִלְקֹט, וְלֹא מָצָֽאוּ׃ וַיֹּֽאמֶר יהוה אֶל־מֹשֶׁה, עַד־אָֽנָה מֵאַנְתֶּם לִשְׁמֹר מִצְוֹתַי וְתוֹרֹתָי׃ רְאוּ כִּי־יהוה נָתַן לָכֶם הַשַּׁבָּת, עַל־כֵּן הוּא נֹתֵן לָכֶם בַּיּוֹם הַשִּׁשִּׁי לֶֽחֶם יוֹמָֽיִם, שְׁבוּ אִישׁ תַּחְתָּיו, אַל־יֵֽצֵא אִישׁ מִמְּקֹמוֹ בַּיּוֹם הַשְּׁבִיעִי׃ וַיִּשְׁבְּתוּ הָעָם בַּיּוֹם הַשְּׁבִעִי׃ וַיִּקְרְאוּ בֵית־יִשְׂרָאֵל אֶת־שְׁמוֹ מָן, וְהוּא כְּזֶֽרַע גַּד לָבָן, וְטַעְמוֹ כְּצַפִּיחִת בִּדְבָשׁ׃ וַיֹּֽאמֶר מֹשֶׁה זֶה הַדָּבָר אֲשֶׁר צִוָּה יהוה, מְלֹא הָעֹֽמֶר מִמֶּֽנּוּ לְמִשְׁמֶֽרֶת לְדֹרֹתֵיכֶם, לְמַֽעַן יִרְאוּ אֶת־הַלֶּֽחֶם אֲשֶׁר הֶאֱכַֽלְתִּי אֶתְכֶם בַּמִּדְבָּר, בְּהוֹצִיאִי אֶתְכֶם מֵאֶֽרֶץ מִצְרָֽיִם׃ וַיֹּֽאמֶר מֹשֶׁה אֶל־אַהֲרֹן, קַח צִנְצֶֽנֶת אַחַת וְתֶן־שָֽׁמָּה מְלֹא־הָעֹֽמֶר מָן, וְהַנַּח אֹתוֹ לִפְנֵי יהוה לְמִשְׁמֶֽרֶת לְדֹרֹתֵיכֶם׃ כַּאֲשֶׁר צִוָּה יהוה אֶל־מֹשֶׁה, וַיַּנִּיחֵֽהוּ אַהֲרֹן לִפְנֵי הָעֵדֻת לְמִשְׁמָֽרֶת׃ וּבְנֵי יִשְׂרָאֵל אָכְלוּ אֶת־הַמָּן אַרְבָּעִים שָׁנָה, עַד־בֹּאָם אֶל־אֶֽרֶץ נוֹשָֽׁבֶת, אֶת־הַמָּן אָכְלוּ עַד־בֹּאָם אֶל־קְצֵה אֶֽרֶץ כְּנָֽעַן׃ וְהָעֹֽמֶר עֲשִׂרִית הָאֵיפָה הוּא׃

אַתָּה־הוּא יהוה לְבַדֶּֽךָ, אַתָּ עָשִֽׂיתָ אֶת־הַשָּׁמַֽיִם וּשְׁמֵי הַשָּׁמָֽיִם וְכָל־צְבָאָם, הָאָֽרֶץ וְכָל אֲשֶׁר עָלֶֽיהָ, הַיַּמִּים וְכָל אֲשֶׁר בָּהֶם, וְאַתָּה מְחַיֶּה אֶת כֻּלָּם: וְאַתָּה הוּא שֶׁעָשִֽׂיתָ נִסִּים וְנִפְלָאוֹת גְּדוֹלוֹת תָּמִיד עִם אֲבוֹתֵֽינוּ. גַּם בַּמִּדְבָּר הִמְטַֽרְתָּ לָהֶם לֶֽחֶם מִן הַשָּׁמַֽיִם, וּמִצּוּר הַחַלָּמִישׁ הוֹצֵֽאתָ לָהֶם מַֽיִם, וְגַם נָתַֽתָּ לָהֶם כָּל צָרְכֵיהֶם, וְשִׂמְלָתָם לֹא בָּלְתָה מֵעֲלֵיהֶם.

כֵּן בְּרַחָמֶֽיךָ הָרַבִּים וּבַחֲסָדֶֽיךָ הָעֲצוּמִים תְּזוּנֵֽנוּ וּתְפַרְנְסֵֽנּוּ וּתְכַלְכְּלֵֽנוּ וְתַסְפִּיק כָּל צָרְכֵּֽנוּ וְצָרְכֵי עַמְּךָ בֵּית יִשְׂרָאֵל הַמְּרֻבִּים בְּמִלּוּי וּבְרֶֽוַח בְּלִי טֹֽרַח וְעָמָל גָּדוֹל מִתַּֽחַת יָדְךָ הַנְְּקִיָּה, וְלֹא מִתַּֽחַת יְדֵי בָּשָׂר וָדָם.

יְהִי רָצוֹן מִלְּפָנֶֽיךָ, יהוה אֱלֹהַי וֵאלֹהֵי אֲבוֹתַי, שֶׁתָּכִין לִי וּלְאַנְשֵׁי בֵיתִי כָּל מַחְסוֹרֵֽנוּ, וְתַזְמִין לָֽנוּ כָּל צָרְכֵּֽנוּ, לְכָל יוֹם וָיוֹם מֵחַיֵּֽינוּ דֵּי מַחְסוֹרֵֽנוּ, וּלְכָל שָׁעָה וְשָׁעָה מִשְּׁעוֹתֵֽינוּ דֵּי סִפּוּקֵֽנוּ, וּלְכָל עֶֽצֶם מֵעֲצָמֵֽינוּ דֵּי מִחְיָתֵֽנוּ, כְּיָדְךָ הַטּוֹבָה וְהָרְחָבָה וְלֹא כְּמִּעוּט מִפְעָלֵֽינוּ, וְקֹֽצֶר חֲסָדֵֽינוּ, וּמִזְּעֵיר גְּמוּלוֹתֵֽינוּ. וְיִהְיוּ מְזוֹנוֹתַי וּמְזוֹנוֹת אַנְשֵׁי בֵיתִי וְזַרְעִי וְזֶֽרַע זַרְעִי, מְסוּרִים בְּיָדְךָ וְלֹא בְּיַד בָּשָׂר וָדָם.

תפילה על הפרנסה

אָנָּא הָאֵל הַמֵּכִין פַּרְנָסָה לְכָל בְּרִיָּה, וּמַזְמִין מַלְבּוּשׁ לְכָל נִבְרָא, וְשׁוֹלֵֽחַ לָהֶם מִחְיָה, שֶׁתִּתֶּן לִי מִחְיָתִי בְּשֹֽׁפִי, שֶׁתְּכַלְכְּלֵֽנִי וּתְפַרְנְסֵֽנִי לִי וּלְכָל אַנְשֵׁי בֵיתִי וּלְכָל יִשְׂרָאֵל פַּרְנָסָה טוֹבָה שֶׁל כָּבוֹד, בְּנַֽחַת וְלֹא בְּצַֽעַר, בְּהֶתֵּר וְלֹא בְּאִסּוּר, בְּכָבוֹד וְלֹא בְּבִזּוּי. פַּרְנָסָה שֶׁלֹּא תִּהְיֶה בָּהּ שׁוּם בּוּשָׁה וּכְלִמָּה, פַּרְנָסָה שֶׁלֹּא תַּצְרִיכֵֽנִי בָּהּ לִידֵי מַתְּנַת בָּשָׂר וָדָם, כִּי אִם לְיָדְךָ הַמְּלֵאָה וְהָרְחָבָה, פַּרְנָסָה שֶׁאוּכַל לַעֲסֹק בְּתוֹרָתְךָ הַקְּדוֹשָׁה וְהַטְּהוֹרָה וְהַתְּמִימָה, וְטֶֽרֶף נָקִי וּמְזֻמָּן וּמְזוֹנוֹתַי וּמְזוֹנוֹת אַנְשֵׁי בֵיתִי וְכָל צָרְכֵּֽנוּ, קֹֽדֶם שֶׁנִּצְטָרֵךְ לָהֶם, כְּדֵי שֶׁיִּהְיֶה לִבִּי פָּנוּי בְּלִי טִרְדָּה לַעֲסֹק בְּדִבְרֵי תּוֹרָה וּלְקַיֵּם הַמִּצְוֹת, וְלֵישֵׁב בְּשָׁלוֹם עַל שֻׁלְחָנִי בְּכָבוֹד עִם כָּל בְּנֵי בֵּיתִי. וְשֶׁלֹּא אֲצַפֶּה לְשֻׁלְחָן שֶׁל אֲחֵרִים, וְשֶׁלֹּא אֶצְטָרֵךְ לְהִשְׁתַּעְבֵּד לְשׁוּם אָדָם, וְשֶׁלֹּא יְהֵא עָלַי שׁוּם עֹל בָּשָׂר וָדָם, כִּי אִם עֹל מַלְכוּתְךָ לְעָבְדְּךָ בְּלֵבָב שָׁלֵם. וּבִגְדֵי כָּבוֹד יִהְיוּ לְבוּשֵֽׁינוּ, בִּיקָר וְלֹא בְּבֹֽשֶׁת פָּנִים. וְהַצִּילֵֽנוּ מִן עֲנִיּוּת וּמִדַּלּוּת וְשִׁפְלוּת, וְאֶזְכֶּה לְהַכְנִיס אוֹרְחִים וְלִגְמֹל חֶֽסֶד לְכָל אָדָם. וְהַזְמֵן לִי לַעֲשׂוֹת צְדָקָה לְהָרְאוּיִים לָהּ, וְלֹא אֶכָּשֵׁל בִּבְנֵי אָדָם שֶׁאֵינָם הֲגוּנִים, אָמֵן.

פרשת היראה

וְעַתָּה יִשְׂרָאֵל, מָה יהוה אֱלֹהֶֽיךָ שֹׁאֵל מֵעִמָּךְ, כִּי אִם־לְיִרְאָה אֶת־יהוה אֱלֹהֶֽיךָ לָלֶֽכֶת בְּכָל־דְּרָכָיו וּלְאַהֲבָה אֹתוֹ, וְלַעֲבֹד אֶת־יהוה אֱלֹהֶֽיךָ בְּכָל־לְבָבְךָ וּבְכָל־נַפְשֶֽׁךָ׃ לִשְׁמֹר אֶת־מִצְוֹת יהוה וְאֶת־חֻקֹּתָיו, אֲשֶׁר אָנֹכִי מְצַוְּךָ הַיּוֹם, לְטוֹב לָךְ׃ הֵן לַיהוה אֱלֹהֶֽיךָ הַשָּׁמַֽיִם וּשְׁמֵי הַשָּׁמָֽיִם, הָאָֽרֶץ וְכָל־אֲשֶׁר־בָּהּ׃ רַק בַּאֲבֹתֶֽיךָ חָשַׁק יהוה לְאַהֲבָה אוֹתָם, וַיִּבְחַר בְּזַרְעָם אַחֲרֵיהֶם, בָּכֶם מִכָּל־הָעַמִּים, כַּיּוֹם הַזֶּה׃ וּמַלְתֶּם אֵת עָרְלַת לְבַבְכֶם, וְעָרְפְּכֶם לֹא תַקְשׁוּ עוֹד׃ כִּי יהוה אֱלֹהֵיכֶם הוּא אֱלֹהֵי הָאֱלֹהִים וַאֲדֹנֵי הָאֲדֹנִים, הָאֵל הַגָּדֹל הַגִּבֹּר וְהַנּוֹרָא, אֲשֶׁר לֹא־יִשָּׂא פָנִים וְלֹא יִקַּח שֹֽׁחַד׃ עֹשֶׂה מִשְׁפַּט יָתוֹם וְאַלְמָנָה, וְאֹהֵב גֵּר לָֽתֶת לוֹ לֶֽחֶם וְשִׂמְלָה׃ וַאֲהַבְתֶּם אֶת־הַגֵּר, כִּי־גֵרִים הֱיִיתֶם בְּאֶֽרֶץ מִצְרָֽיִם׃ אֶת־יהוה אֱלֹהֶֽיךָ תִּירָא, אֹתוֹ תַעֲבֹד, וּבוֹ תִדְבָּק וּבִשְׁמוֹ תִּשָּׁבֵֽעַ׃ הוּא תְהִלָּתְךָ וְהוּא אֱלֹהֶֽיךָ, אֲשֶׁר־עָשָׂה אִתְּךָ אֶת־הַגְּדֹלֹת וְאֶת־הַנּוֹרָאֹת הָאֵֽלֶּה אֲשֶׁר רָאוּ עֵינֶֽיךָ׃ בְּשִׁבְעִים נֶֽפֶשׁ יָרְדוּ אֲבֹתֶֽיךָ מִצְרָֽיְמָה, וְעַתָּה שָׂמְךָ יהוה אֱלֹהֶֽיךָ כְּכוֹכְבֵי הַשָּׁמַֽיִם לָרֹב׃

וְאָהַבְתָּ אֵת יהוה אֱלֹהֶֽיךָ, וְשָׁמַרְתָּ מִשְׁמַרְתּוֹ וְחֻקֹּתָיו וּמִשְׁפָּטָיו וּמִצְוֹתָיו כָּל־הַיָּמִים׃ וִידַעְתֶּם הַיּוֹם, כִּי לֹא אֶת־בְּנֵיכֶם אֲשֶׁר לֹא־יָדְעוּ וַאֲשֶׁר לֹא־רָאוּ אֶת־מוּסַר יהוה אֱלֹהֵיכֶם, אֶת־גָּדְלוֹ אֶת־יָדוֹ הַחֲזָקָה וּזְרֹעוֹ הַנְּטוּיָה׃ וְאֶת־אֹתֹתָיו וְאֶת־מַעֲשָׂיו אֲשֶׁר עָשָׂה בְּתוֹךְ מִצְרָֽיִם, לְפַרְעֹה מֶֽלֶךְ־מִצְרַֽיִם וּלְכָל־אַרְצוֹ׃ וַאֲשֶׁר עָשָׂה לְחֵיל מִצְרַֽיִם לְסוּסָיו וּלְרִכְבּוֹ, אֲשֶׁר הֵצִיף אֶת־מֵי יַם־סוּף עַל־פְּנֵיהֶם בְּרָדְפָם אַחֲרֵיכֶם, וַיְאַבְּדֵם יהוה עַד הַיּוֹם הַזֶּה׃ וַאֲשֶׁר עָשָׂה לָכֶם בַּמִּדְבָּר, עַד־בֹּאֲכֶם עַד־הַמָּקוֹם הַזֶּה׃ וַאֲשֶׁר עָשָׂה לְדָתָן וְלַאֲבִירָם בְּנֵי אֱלִיאָב בֶּן־רְאוּבֵן, אֲשֶׁר פָּצְתָה הָאָֽרֶץ אֶת־פִּֽיהָ וַתִּבְלָעֵם וְאֶת־בָּתֵּיהֶם וְאֶת־אָהֳלֵיהֶם, וְאֵת כָּל־הַיְקוּם אֲשֶׁר בְּרַגְלֵיהֶם בְּקֶֽרֶב כָּל־יִשְׂרָאֵל׃ כִּי עֵינֵיכֶם הָרֹאֹת אֵת כָּל־מַעֲשֵׂה יהוה הַגָּדֹל, אֲשֶׁר עָשָׂה׃ וּשְׁמַרְתֶּם אֶת־כָּל־הַמִּצְוָה אֲשֶׁר אָנֹכִי מְצַוְּךָ הַיּוֹם, לְמַֽעַן תֶּחֶזְקוּ וּבָאתֶם וִירִשְׁתֶּם אֶת־הָאָֽרֶץ אֲשֶׁר אַתֶּם עֹבְרִים שָֽׁמָּה לְרִשְׁתָּהּ׃ וּלְמַֽעַן תַּאֲרִֽיכוּ יָמִים עַל־הָאֲדָמָה אֲשֶׁר נִשְׁבַּע יהוה לַאֲבֹתֵיכֶם לָתֵת לָהֶם וּלְזַרְעָם, אֶֽרֶץ זָבַת חָלָב וּדְבָשׁ׃

יְהִי רָצוֹן מִלְּפָנֶֽיךָ, יהוה אֱלֹהַי וֵאלֹהֵי אֲבוֹתַי, שֶׁתִּטַּע אַהֲבָתְךָ וְיִרְאָתְךָ בְּלִבִּי וּבְלֵב כָּל יִשְׂרָאֵל עַמְּךָ, לְיִרְאָה אֶת שִׁמְךָ הַגָּדוֹל הַגִּבּוֹר וְהַנּוֹרָא בְּכָל לְבָבֵֽנוּ וּבְכָל נַפְשֵֽׁנוּ, יִרְאַת הָרוֹמְמוּת שֶׁל אֵין סוֹף בָּרוּךְ הוּא, וְיִתְעַלֶּה שִׁמְךָ. כִּי גָדוֹל אַתָּה וְנוֹרָא שְׁמֶֽךָ, אָמֵן סֶֽלָה.

פרשת התשובה

וְהָיָה כִי־יָבֹֽאוּ עָלֶֽיךָ כָּל־הַדְּבָרִים הָאֵֽלֶּה, הַבְּרָכָה וְהַקְּלָלָה אֲשֶׁר נָתַֽתִּי לְפָנֶֽיךָ, וַהֲשֵׁבֹתָ אֶל־לְבָבֶֽךָ בְּכָל־הַגּוֹיִם אֲשֶׁר הִדִּיחֲךָ יהוה אֱלֹהֶֽיךָ שָֽׁמָּה׃ וְשַׁבְתָּ עַד־יהוה אֱלֹהֶֽיךָ וְשָׁמַעְתָּ בְקֹלוֹ, כְּכֹל אֲשֶׁר־אָנֹכִי מְצַוְּךָ הַיּוֹם, אַתָּה וּבָנֶֽיךָ בְּכָל־לְבָבְךָ וּבְכָל־נַפְשֶֽׁךָ׃ וְשָׁב יהוה אֱלֹהֶֽיךָ אֶת־שְׁבוּתְךָ וְרִחֲמֶֽךָ, וְשָׁב וְקִבֶּצְךָ מִכָּל־הָעַמִּים אֲשֶׁר הֱפִיצְךָ יהוה אֱלֹהֶֽיךָ שָֽׁמָּה׃ אִם־יִהְיֶה נִדַּחֲךָ בִּקְצֵה הַשָּׁמָֽיִם, מִשָּׁם יְקַבֶּצְךָ יהוה אֱלֹהֶֽיךָ וּמִשָּׁם יִקָּחֶֽךָ׃ וֶהֱבִיאֲךָ יהוה אֱלֹהֶֽיךָ אֶל־הָאָֽרֶץ אֲשֶׁר־יָרְשׁוּ אֲבֹתֶֽיךָ וִירִשְׁתָּהּ, וְהֵיטִבְךָ וְהִרְבְּךָ מֵאֲבֹתֶֽיךָ׃ וּמָל יהוה אֱלֹהֶֽיךָ אֶת־לְבָבְךָ וְאֶת־לְבַב זַרְעֶֽךָ, לְאַהֲבָה אֶת־יהוה אֱלֹהֶֽיךָ בְּכָל־לְבָבְךָ וּבְכָל־נַפְשְׁךָ, לְמַֽעַן חַיֶּֽיךָ׃ וְנָתַן יהוה אֱלֹהֶֽיךָ אֵת כָּל־הָאָלוֹת הָאֵֽלֶּה עַל־אֹיְבֶֽיךָ וְעַל־שֹׂנְאֶֽיךָ אֲשֶׁר רְדָפֽוּךָ׃ וְאַתָּה תָשׁוּב וְשָׁמַעְתָּ בְּקוֹל יהוה, וְעָשִֽׂיתָ אֶת־כָּל־מִצְוֹתָיו אֲשֶׁר אָנֹכִי מְצַוְּךָ הַיּוֹם׃ וְהוֹתִירְךָ יהוה אֱלֹהֶֽיךָ בְּכֹל מַעֲשֵׂה יָדֶֽךָ, בִּפְרִי בִטְנְךָ וּבִפְרִי בְהֶמְתְּךָ וּבִפְרִי אַדְמָתְךָ, לְטֹבָה, כִּי יָשׁוּב יהוה לָשׂוּשׂ עָלֶֽיךָ לְטוֹב כַּאֲשֶׁר־שָׂשׂ עַל־אֲבֹתֶֽיךָ׃ כִּי תִשְׁמַע בְּקוֹל יהוה אֱלֹהֶֽיךָ, לִשְׁמֹר מִצְוֹתָיו וְחֻקֹּתָיו הַכְּתוּבָה בְּסֵֽפֶר הַתּוֹרָה הַזֶּה, כִּי תָשׁוּב אֶל־יהוה אֱלֹהֶֽיךָ בְּכָל־לְבָבְךָ וּבְכָל־נַפְשֶֽׁךָ׃

יְהִי רָצוֹן מִלְּפָנֶֽיךָ, יהוה אֱלֹהַי וֵאלֹהֵי אֲבוֹתַי, שֶׁתַּחְתֹּר חֲתִירָה מִתַּֽחַת כִּסֵּא כְבוֹדֶֽךָ לְהַחֲזִיר בִּתְשׁוּבָה שְׁלֵמָה לְכָל פּוֹשְׁעֵי עַמְּךָ בֵּית יִשְׂרָאֵל, וּבִכְלָלָם תַּחֲזִירֵֽנִי בִּתְשׁוּבָה שְׁלֵמָה לְפָנֶֽיךָ, כִּי יְמִינְךָ פְּשׁוּטָה לְקַבֵּל שָׁבִים וְרוֹצֶה אַתָּה בִּתְשׁוּבָה, אָמֵן סֶֽלָה.

שמירה נגד עין הרע

נֶֽגַע צָרַֽעַת כִּי תִהְיֶה בְּאָדָם וְהוּבָא אֶל־הַכֹּהֵן׃ נַֽחְנוּ נַעֲבֹר חֲלוּצִים לִפְנֵי יהוה אֶֽרֶץ כְּנָֽעַן וְאִתָּֽנוּ אֲחֻזַּת נַחֲלָתֵֽנוּ מֵעֵֽבֶר לַיַּרְדֵּן׃ נָבִיא מִקִּרְבְּךָ מֵאַחֶֽיךָ כָּמֹֽנִי יָקִים לְךָ יהוה אֱלֹהֶֽיךָ, אֵלָיו תִּשְׁמָעוּן׃ נָהָר פְּלָגָיו יְשַׂמְּחוּ עִיר־אֱלֹהִים, קְדֹשׁ מִשְׁכְּנֵי עֶלְיוֹן: נָחִֽיתָ כַצֹּאן עַמֶּֽךָ בְּיַד־מֹשֶׁה וְאַהֲרֹן: נֶֽגֶד אֲבוֹתָם עָשָׂה פֶֽלֶא בְּאֶֽרֶץ מִצְרַֽיִם שְׂדֵה־צֹֽעַן: נַֽפְתִּי מִשְׁכָּבִי מֹר אֲהָלִים וְקִנָּמוֹן: נֵר יהוה נִשְׁמַת אָדָם חֹפֵשׂ כָּל־חַדְרֵי־בָֽטֶן: נֹֽפֶת תִּטֹּֽפְנָה שִׂפְתוֹתַֽיִךְ כַּלָּה דְּבַשׁ וְחָלָב תַּֽחַת לְשׁוֹנֵךְ וְרֵֽיחַ שַׂלְמֹתַֽיִךְ כְּרֵֽיחַ לְבָנוֹן: נֻֽדוּ מִתּוֹךְ בָּבֶל וּמֵאֶֽרֶץ כַּשְׂדִּים צֵֽאוּ, וִהְיוּ כְּעַתּוּדִים לִפְנֵי־צֹאן: נֹשְׁקֵי קֶֽשֶׁת מַיְמִינִים וּמַשְׂמִאלִים בָּאֲבָנִים וּבַחִצִּים בַּקָּֽשֶׁת מֵאֲחֵי שָׁאוּל מִבִּנְיָמִן:

רִבּוֹנוֹ שֶׁל עוֹלָם, הַצֵּל עַמְּךָ בֵּית יִשְׂרָאֵל מִכָּל מִינֵי כִּשּׁוּפִים וּמִכָּל מִינֵי עַֽיִן הָרָע, וּכְשֵׁם שֶׁפָּרַֽשְׂתָּ כְּנָפֶֽיךָ עַל אֲבוֹתֵֽינוּ שֶׁבַּמִּדְבָּר, שֶׁלֹּא שָׁלַט עֲלֵיהֶם עֵינָא בִּישָׁא דְּבִלְעָם בֶּן בְּעוֹר, כֵּן תִּפְרֹס כְּנָפֶֽיךָ עָלֵֽינוּ בְּרַחֲמֶֽיךָ הָרַבִּים לִהְיוֹתֵֽנוּ מְכֻסִּים (בְּמִכְסֶה וּבְהַנְהָגָה) בִּשְׁמוֹתֶֽיךָ הַקְּדוֹשִׁים מִכָּל עֵינָא בִּישָׁא.

אַתָּה סֵֽתֶר לִי מִצַּר תִּצְּרֵֽנִי רָנֵּי פַלֵּט תְּסוֹבְבֵֽנִי סֶֽלָה:

תוכן העניינים

סידור קורן השלם; אשכנז

טוען…

אור ברסלב
תרומה

מקלידים לפחות שתי אותיות

מתעלם מניקוד ומכתיב מלא או חסר, ומבין גם לפי משמעות↑↓ מעבר · Enter פתיחה