חגים ומועדים · סדר תפילת שחרית ליום הזיכרון
לַמְנַצֵּֽחַ עַל־מוּת לַבֵּן מִזְמוֹר לְדָוִד: אוֹדֶה יהוה בְּכָל־לִבִּי, אֲסַפְּרָה כָּל־נִפְלְאוֹתֶֽיךָ: אֶשְׂמְחָה וְאֶעֶלְצָה בָךְ, אֲזַמְּרָה שִׁמְךָ עֶלְיוֹן: בְּשׁוּב־אוֹיְבַי אָחוֹר, יִכָּשְׁלוּ וְיֹאבְדוּ מִפָּנֶֽיךָ: כִּי־עָשִֽׂיתָ מִשְׁפָּטִי וְדִינִי, יָשַֽׁבְתָּ לְכִסֵּא שׁוֹפֵט צֶֽדֶק: גָּעַֽרְתָּ גוֹיִם אִבַּֽדְתָּ רָשָׁע, שְׁמָם מָחִֽיתָ לְעוֹלָם וָעֶד: הָאוֹיֵב תַּמּוּ חֳרָבוֹת לָנֶֽצַח, וְעָרִים נָתַֽשְׁתָּ, אָבַד זִכְרָם הֵֽמָּה: וַיהוה לְעוֹלָם יֵשֵׁב, כּוֹנֵן לַמִּשְׁפָּט כִּסְאוֹ: וְהוּא יִשְׁפֹּט־תֵּבֵל בְּצֶֽדֶק, יָדִין לְאֻמִּים בְּמֵישָׁרִים: וִיהִי יהוה מִשְׂגָּב לַדָּךְ, מִשְׂגָּב לְעִתּוֹת בַּצָּרָה: וְיִבְטְחוּ בְךָ יוֹדְעֵי שְׁמֶֽךָ, כִּי לֹא־עָזַֽבְתָּ דֹרְשֶֽׁיךָ, יהוה: זַמְּרוּ לַיהוה יֹשֵׁב צִיּוֹן, הַגִּֽידוּ בָעַמִּים עֲלִילוֹתָיו: כִּי־דֹרֵשׁ דָּמִים אוֹתָם זָכָר, לֹא־שָׁכַח צַעֲקַת עֲנָוִים: חָנְנֵֽנִי יהוה רְאֵה עָנְיִי מִשֹּׂנְאָי, מְרוֹמְמִי מִשַּׁעֲרֵי־מָֽוֶת: לְמַֽעַן אֲסַפְּרָה כָּל־תְּהִלָּתֶֽיךָ, בְּשַׁעֲרֵי בַת־צִיּוֹן אָגִֽילָה בִּישׁוּעָתֶֽךָ: טָבְעוּ גוֹיִם בְּשַֽׁחַת עָשׂוּ, בְּרֶֽשֶׁת־זוּ טָמָֽנוּ נִלְכְּדָה רַגְלָם: נוֹדַע יהוה מִשְׁפָּט עָשָׂה, בְּפֹֽעַל כַּפָּיו נוֹקֵשׁ רָשָׁע, הִגָּיוֹן סֶֽלָה: יָשֽׁוּבוּ רְשָׁעִים לִשְׁאֽוֹלָה, כָּל־גּוֹיִם שְׁכֵחֵי אֱלֹהִים: כִּי לֹא לָנֶֽצַח יִשָּׁכַח אֶבְיוֹן, תִּקְוַת עֲנִיִּים תֹּאבַד לָעַד: קוּמָה יהוה אַל־יָעֹז אֱנוֹשׁ, יִשָּׁפְטוּ גוֹיִם עַל־פָּנֶֽיךָ: שִׁיתָה יהוה מוֹרָה לָהֶם, יֵדְעוּ גוֹיִם, אֱנוֹשׁ הֵֽמָּה סֶּֽלָה:
אָבִֽינוּ שֶׁבַּשָּׁמַֽיִם, אֵל אֱלֹהֵי הָרוּחוֹת לְכָל בָּשָׂר זְכֹר נָא אֶת הַנְּשָׁמוֹת הַזַּכּוֹת וְהַטְּהוֹרוֹת שֶׁל בָּנֵֽינוּ וּבְנוֹתֵֽינוּ אֲשֶׁר הֶעֱרוּ אֶת נַפְשָׁם לָמוּת מוֹת גִּבּוֹרִים בְּהֵחָלְצָם לְעֶזְרַת הָעָם וְהָאָֽרֶץ. מִנְּשָׁרִים קַֽלּוּ מֵאֲרָיוֹת גָּבֵֽרוּ בְּמִלְחַמְתָּם לְמַֽעַן שִׁחְרוּר עַמָּם וּמוֹלַדְתָּם. בַּעֲלוֹתָם עַל מִזְבַּח תְּקוּמַת יִשְׂרָאֵל בְּאֶֽרֶץ קָדְשׁוֹ הֵפִֽיחוּ רֽוּחַ עֹז וּגְבוּרָה בְּכָל בֵּית יִשְׂרָאֵל בָּאָֽרֶץ וּבַתְּפוּצוֹת וַיִּתְעוֹרֵר לִקְרַאת גְּאֻלָּתוֹ וּפְדוּת נַפְשׁוֹ. יִזְכְּרֵם אֱלֹהֵֽינוּ לְטוֹבָה עִם רִבְבוֹת אַלְפֵי קְדוֹשֵׁי יִשְׂרָאֵל וְגִבּוֹרָיו מִימֵי עוֹלָם בִּצְרוֹר הַחַיִּים יִצְרֹר אֶת נִשְׁמָתָם בְּגַן עֵֽדֶן תְּהֵא מְנוּחָתָם וְיָנֽוּחוּ בְּשָׁלוֹם עַל מִשְׁכָּבָם וְיַעַמְדוּ לְגוֹרָלָם לְקֵץ הַיָּמִין אָמֵן.
לְדָוִד בָּרוּךְ יהוה צוּרִי הַמְלַמֵּד יָדַי לַקְרָב, אֶצְבְּעוֹתַי לַמִּלְחָמָה: חַסְדִּי וּמְצוּדָתִי מִשְׂגַּבִּי וּמְפַלְטִי לִי מָגִנִּי וּבוֹ חָסִֽיתִי הָרוֹדֵד עַמִּי תַחְתָּי: יהוה מָה־אָדָם וַתֵּדָעֵֽהוּ, בֶּן־אֱנוֹשׁ וַתְּחַשְּׁבֵֽהוּ: אָדָם לַהֶֽבֶל דָּמָה יָמָיו כְּצֵל עוֹבֵר: יהוה הַט־שָׁמֶֽיךָ וְתֵרֵד גַּע בֶּהָרִים וְיֶעֱשָֽׁנוּ: בְּרוֹק בָּרָק וּתְפִיצֵם, שְׁלַח חִצֶּֽיךָ וּתְהֻמֵּם: שְׁלַח יָדֶֽיךָ מִמָּרוֹם פְּצֵֽנִי וְהַצִּילֵֽנִי מִמַּֽיִם רַבִּים מִיַּד בְּנֵי נֵכָר: אֲשֶׁר פִּיהֶם דִּבֶּר־שָׁוְא, וִימִינָם יְמִין שָֽׁקֶר: אֱלֹהִים שִׁיר חָדָשׁ אָשִֽׁירָה לָּךְ, בְּנֵֽבֶל עָשׂוֹר אֲזַמְּרָה־לָּךְ: הַנּוֹתֵן תְּשׁוּעָה לַמְּלָכִים הַפּוֹצֶה אֶת־דָּוִד עַבְדּוֹ מֵחֶֽרֶב רָעָה: פְּצֵֽנִי וְהַצִּילֵֽנִי מִיַּד בְּנֵי־נֵכָר אֲשֶׁר־פִּיהֶם דִּבֶּר־שָׁוְא וִימִינָם יְמִין שָֽׁקֶר: אֲשֶׁר בָּנֵֽינוּ כִּנְטִעִים מְגֻדָּלִים בִּנְעוּרֵיהֶם בְּנוֹתֵֽינוּ כְזָוִיֹּת מְחֻטָּבוֹת תַּבְנִית הֵיכָל: מְזָוֵֽינוּ מְלֵאִים מְפִיקִים מִזַּן אֶל־זַן צֹאונֵֽנוּ מַאֲלִיפוֹת מְרֻבָּבוֹת בְּחוּצוֹתֵֽינוּ: אַלּוּפֵֽינוּ מְסֻבָּלִים אֵין פֶּֽרֶץ וְאֵין יוֹצֵאת וְאֵין צְוָחָה בִּרְחֹבֹתֵֽינוּ: אַשְׁרֵי הָעָם שֶׁכָּֽכָה לּוֹ אַשְׁרֵי הָעָם שֶׁיהוה אֱלֹהָיו: