חגים ומועדים · הקפות לשמחת תורה
סדר הקפות
אַתָּה הָרְאֵֽתָ לָדַֽעַת, כִּי יהוה הוּא הָאֱלֹהִים, אֵין עוֹד מִלְּבַדּוֹ׃
לְעֹשֵׂה נִפְלָאוֹת גְּדֹלוֹת לְבַדּוֹ, כִּי לְעוֹלָם חַסְדּוֹ׃
אֵין־כָּמֽוֹךָ בָאֱלֹהִים, אֲדֹנָי, וְאֵין כְּמַעֲשֶֽׂיךָ׃
יְהִי כְבוֹד יהוה לְעוֹלָם, יִשְׂמַח יהוה בְּמַעֲשָׂיו׃
יְהִי שֵׁם יהוה מְבֹרָךְ, מֵעַתָּה וְעַד־עוֹלָם׃
יְהִי יהוה אֱלֹהֵֽינוּ עִמָּֽנוּ, כַּאֲשֶׁר הָיָה עִם־אֲבֹתֵֽינוּ אַל־יַעַזְבֵֽנוּ וְאַל־יִטְּשֵֽׁנוּ׃
וְאִמְרוּ, הוֹשִׁיעֵֽנוּ אֱלֹהֵי יִשְׁעֵֽנוּ, וְקַבְּצֵֽנוּ וְהַצִּילֵֽנוּ מִן־הַגּוֹיִם לְהֹדוֹת לְשֵׁם קָדְשֶֽׁךָ, לְהִשְׁתַּבֵּֽחַ בִּתְהִלָּתֶֽךָ׃
יהוה מֶֽלֶךְ, יהוה מָלָךְ, יהוה יִמְלֹךְ לְעֹלָם וָעֶד.
יהוה עֹז לְעַמּוֹ יִתֵּן, יהוה יְבָרֵךְ אֶת־עַמּוֹ בַשָּׁלוֹם׃
וְיִהְיוּ נָא אֲמָרֵֽינוּ לְרָצוֹן, לִפְנֵי אֲדוֹן כֹּל.
וַיְהִי בִּנְסֹֽעַ הָאָרֹן וַיֹּֽאמֶר מֹשֶׁה קוּמָה יהוה וְיָפֻֽצוּ אֹיְבֶֽיךָ, וְיָנֻֽסוּ מְשַׂנְאֶֽיךָ מִפָּנֶֽיךָ׃
קוּמָה יהוה לִמְנוּחָתֶֽךָ, אַתָּה וַאֲרוֹן עֻזֶּֽךָ׃
כֹּהֲנֶֽיךָ יִלְבְּשׁוּ־צֶֽדֶק, וַחֲסִידֶֽיךָ יְרַנֵּֽנוּ׃
בַּעֲבוּר דָּוִד עַבְדֶּֽךָ, אַל־תָּשֵׁב פְּנֵי מְשִׁיחֶֽךָ׃
וְאָמַר בַּיּוֹם הַהוּא הִנֵּה אֱלֹהֵֽינוּ זֶה קִוִּֽינוּ לוֹ, וְיוֹשִׁיעֵֽנוּ זֶה יהוה קִוִּֽינוּ לוֹ, נָגִֽילָה וְנִשְׂמְחָה בִּישׁוּעָתוֹ׃
מַלְכוּתְךָ מַלְכוּת כָּל־עֹלָמִים, וּמֶמְשַׁלְתְּךָ בְּכָל־דּוֹר וָדֹר׃
כִּי מִצִּיּוֹן תֵּצֵא תוֹרָה, וּדְבַר־יהוה מִירוּשָׁלִָֽם׃
אַב הָרַחֲמִים, הֵיטִֽיבָה בִרְצוֹנְךָ אֶת־צִיּוֹן, תִּבְנֶה חוֹמוֹת יְרוּשָׁלִָֽם׃
כִּי בְךָ לְבַד בָּטָֽחְנוּ, מֶֽלֶךְ אֵל רָם וְנִשָּׂא, אֲדוֹן עוֹלָמִים.
הקפה א'
אָנָּא יהוה הוֹשִֽׁיעָה נָּא, אָנָּא יהוה הַצְלִיחָה נָא׃ אָנָּא יהוה עֲנֵֽנוּ בְּיוֹם קָרְאֵֽנוּ. אֱלֹהֵי הָרוּחוֹת הוֹשִֽׁיעָה נָּא, בּוֹחֵן לְבָבוֹת הַצְלִיחָה נָא גּוֹאֵל חָזָק עֲנֵֽנוּ בְּיוֹם קָרְאֵֽנוּ.
הקפה ב'
דּוֹבֵר צְדָקוֹת הוֹשִֽׁיעָה נָּא, הָדוּר בִּלְבוּשׁוֹ הַצְלִיחָה נָא וָתִיק וְחָסִיד עֲנֵֽנוּ בְּיוֹם קָרְאֵֽנוּ.
הקפה ג'
זַךְ וְיָשָׁר הוֹשִֽׁיעָה נָּא, חַנּוּן וְרַחוּם הַצְלִיחָה נָא טוֹב וּמֵיטִיב עֲנֵֽנוּ בְּיוֹם קָרְאֵֽנוּ.
הקפה ד'
יוֹדֵֽעַ מַחֲשָׁבוֹת הוֹשִֽׁיעָה נָּא, כַּבִּיר כֹּֽחַ הַצְלִיחָה נָא לוֹבֵשׁ צְדָקוֹת עֲנֵֽנוּ בְּיוֹם קָרְאֵֽנוּ.
הקפה ה'
מֶֽלֶךְ עוֹלָמִים הוֹשִֽׁיעָה נָּא, נָאוֹר וְאַדִּיר הַצְלִיחָה נָא סוֹמֵךְ וְסוֹעֵד עֲנֵֽנוּ בְּיוֹם קָרְאֵֽנוּ.
הקפה ו'
עוֹזֵר דַּלִּים הוֹשִֽׁיעָה נָּא, פּוֹדֶה וּמַצִּיל הַצְלִיחָה נָא צוּר עוֹלָמִים עֲנֵֽנוּ בְּיוֹם קָרְאֵֽנוּ.
הקפה ז'
קָדוֹשׁ וְנוֹרָא הוֹשִֽׁיעָה נָּא, רַחוּם וְחַנּוּן הַצְלִיחָה נָא שׁוֹכֵן שְׁחָקִים עֲנֵֽנוּ בְּיוֹם קָרְאֵֽנוּ. תּוֹמֵךְ תְּמִימִים הוֹשִֽׁיעָה נָּא, תַּקִּיף לָעַד הַצְלִיחָה נָא תָּמִים בְּמַעֲשָׂיו עֲנֵֽנוּ בְּיוֹם קָרְאֵֽנוּ.