ברכות · סדר חנוכת הבית
מִזְמוֹר שִׁיר־חֲנֻכַּת הַבַּֽיִת לְדָוִד׃ אֲרוֹמִמְךָ יהוה כִּי דִלִּיתָֽנִי, וְלֹא־שִׂמַּֽחְתָּ אֹיְבַי לִי׃ יהוה אֱלֹהָי, שִׁוַּֽעְתִּי אֵלֶֽיךָ וַתִּרְפָּאֵֽנִי׃ יהוה, הֶעֱלִֽיתָ מִן־שְׁאוֹל נַפְשִׁי, חִיִּיתַֽנִי מִיָּרְדִי־בוֹר׃ זַמְּרוּ לַיהוה חֲסִידָיו, וְהוֹדוּ לְזֵֽכֶר קָדְשׁוֹ׃ כִּי רֶֽגַע בְּאַפּוֹ, חַיִּים בִּרְצוֹנוֹ, בָּעֶֽרֶב יָלִין בֶּֽכִי וְלַבֹּֽקֶר רִנָּה׃ וַאֲנִי אָמַֽרְתִּי בְשַׁלְוִי, בַּל־אֶמּוֹט לְעוֹלָם׃ יהוה, בִּרְצוֹנְךָ הֶעֱמַֽדְתָּה לְהַרְרִי עֹז, הִסְתַּֽרְתָּ פָנֶֽיךָ הָיִֽיתִי נִבְהָל׃ אֵלֶֽיךָ יהוה אֶקְרָא, וְאֶל־אֲדֹנָי אֶתְחַנָּן׃ מַה־בֶּֽצַע בְּדָמִי, בְּרִדְתִּי אֶל שָֽׁחַת, הֲיוֹדְךָ עָפָר, הֲיַגִּיד אֲמִתֶּֽךָ׃ שְׁמַע־יהוה וְחָנֵּֽנִי, יהוה הֱיֵה־עֹזֵר לִי׃ הָפַֽכְתָּ מִסְפְּדִי לְמָחוֹל לִי, פִּתַּֽחְתָּ שַׂקִּי, וַתְּאַזְּרֵֽנִי שִׂמְחָה׃ לְמַֽעַן יְזַמֶּרְךָ כָבוֹד וְלֹא יִדֹּם, יהוה אֱלֹהַי, לְעוֹלָם אוֹדֶֽךָּ׃
מִזְמוֹר לְדָוִד, יהוה מִי־יָגוּר בְּאָהֳלֶֽךָ, מִי־יִשְׁכֹּן בְּהַר קָדְשֶֽׁךָ׃ הוֹלֵךְ תָּמִים וּפֹעֵל צֶֽדֶק, וְדֹבֵר אֱמֶת בִּלְבָבוֹ׃ לֹא־רָגַל עַל־לְשֹׁנוֹ, לֹא־עָשָׂה לְרֵעֵֽהוּ רָעָה, וְחֶרְפָּה לֹא־נָשָׂא עַל־קְרֹבוֹ׃ נִבְזֶה בְּעֵינָיו נִמְאָס, וְאֶת־יִרְאֵי יהוה יְכַבֵּד, נִשְׁבַּע לְהָרַע וְלֹא יָמִר׃ כַּסְפּוֹ לֹא־נָתַן בְּנֶֽשֶׁךְ, וְשֹֽׁחַד עַל־נָקִי לֹא־לָקָח, עֹֽשֵׂה אֵֽלֶּה, לֹא יִמּוֹט לְעוֹלָם׃
רִבּוֹן הָעוֹלָם, הַשְׁקִֽיפָה מִמְּעוֹן קָדְשְׁךָ, וְקַבֵּל בְּרַחֲמִים וּבְרָצוֹן אֶת תְּפִלַּת בָּנֶֽיךָ וְתַחֲנוּנָם, אֲשֶׁר הִתְאַסְּפוּ פֹּה לַחֲנֹךְ אֶת הַבַּֽיִת הַזֶּה וּלְהַקְרִיב לְפָנֶֽיךָ אֶת תּוֹדָתָם עַל כָּל הַחֶֽסֶד וְהָאֱמֶת אֲשֶׁר עָשִֽׂיתָ אִתָּם. אָנָּא חַסְדְּךָ מֵאִתָּם אַל יָמוּשׁ, וּבְרִית שְׁלוֹמְךָ אַל תָּמוּט. הָגֵן בְּעַד בֵּית מְגוּרֵיהֶם, לֹא תְאֻנֶּה אֵלָיו רָעָה, וְנֶֽגַע וְצַֽעַר לֹא יִקְרְבוּ אֵלָיו, וְלֹא יִשָּׁמַע קוֹל צְוָחָה בְּתוֹכוֹ. זַכֵּה אֶת בְּנֵי הַבַּֽיִת לָשֶֽׁבֶת בְּמִשְׁכָּנָם בְּאַחֲוָה וְרֵעוּת, לְאַהֲבָה וּלְיִרְאָה אוֹתְךָ וּלְדָבְקָה בָךְ, לַהֲגוֹת בְּתוֹרָתְךָ וּלְקַיֵּם מִצְוֹתֶֽיהָ.
הָרֵק בִּרְכוֹתֶֽיךָ עַל בַּֽעַל הַבַּֽיִת. בָּרֵךְ יהוה חֵילוֹ, וּפֹֽעַל יָדָיו תִּרְצֶה׃ הַרְחִיקֵֽהוּ מִידֵי עֲבֵרָה וְעָוֹן, וִיהִי נָעֳמְךָ עָלָיו, וּמַעֲשֵׂה יָדָיו כּוֹנְנֵֽהוּ. יְהִי נָא חַסְדְּךָ אֶת אִשְׁתּוֹ, צוֹפִיָּה הֲלִיכוֹת בֵּיתָהּ: וְתֵדַע כִּי, אִשָּׁה יִרְאַת־יהוה הִיא תִתְהַלָּל׃ (הוֹפַע עַל בְּנֵיהֶם וּבְנוֹתֵיהֶם רֽוּחַ חָכְמָה וּבִינָה, הַדְרִיכֵם בִּנְתִיב מִצְוֹתֶֽיךָ, וְכָל־רוֹאֵיהֶם יַכִּירוּם כִּי הֵם זֶֽרַע בֵּרַךְ יהוה, בְּרוּכִים בַּתּוֹרָה וּבְיִרְאַת שָׁמַֽיִם.) שָׁמְרֵם מִכָּל רָע, שְׁמֹר אֶת נַפְשָׁם, וִיקֻיַּם בָּהֶם: בָּרוּךְ אַתָּה בְּבֹאֶֽךָ, וּבָרוּךְ אַתָּה בְּצֵאתֶֽךָ: וְכַאֲשֶׁר זָכִֽינוּ לַחֲנֹךְ אֶת הַבַּֽיִת הַזֶּה עַתָּה, כֵּן נִזְכֶּה גַם יַֽחַד לִרְאוֹת חֲנֻכַּת הַבַּֽיִת הַגָּדוֹל וְהַקָּדוֹשׁ בִּירוּשָׁלַֽיִם עִירְךָ, קִרְיַת מוֹעֲדֵֽינוּ, בִּמְהֵרָה בְיָמֵֽינוּ, אָמֵן.