אור ברסלב
סידור ספרד שחרית לימות החול › בית יעקב

סידור ספרד

שחרית לימות החול · בית יעקב

אשרי

בימים שאין אומרים תחנון אין אומרים תְּפִלָּה לְדָוִד רק מתחילים מן בֵּית יַעֲקֹב וכו'. ובימים שאין אומרים גם אל ארך אפים גם בית יעקב אין אומרים רק מתחילים שיר של יום.

תְּפִלָּה לְדָוִד הַטֵּה־יְהֺוָה אָזְנְךָ עֲנֵֽנִי כִּי־עָנִי וְאֶבְיוֹן אָֽנִי: שָׁמְ֒רָה נַפְשִׁי כִּי־חָסִיד אָֽנִי הוֹשַׁע עַבְדְּךָ אַתָּה אֱלֹהַי הַבּוֹטֵֽחַ אֵלֶֽיךָ: חָנֵּֽנִי אֲדֹנָי כִּי־אֵלֶֽיךָ אֶקְרָא כָּל־הַיּוֹם: שַׂמֵּֽחַ נֶֽפֶשׁ עַבְדֶּֽךָ כִּי־אֵלֶֽיךָ אֲדֹנָי נַפְשִׁי אֶשָּׂא: כִּי־אַתָּה אֲדֹנָי טוֹב וְסַלָּח וְרַב־חֶֽסֶד לְכָל־קֹרְ֒אֶֽיךָ: הַאֲזִֽינָה יְהֺוָה תְּפִלָּתִי וְהַקְשִֽׁיבָה בְּקוֹל תַּחֲנוּנוֹתָי: בְּיוֹם צָרָתִי אֶקְרָאֶֽךָּ כִּי תַעֲנֵֽנִי: אֵין־כָּמֽוֹךָ בָאֱלֹהִים | אֲדֹנָי וְאֵין כְּמַעֲשֶֽׂיךָ: כָּל־גּוֹיִם אֲשֶׁר עָשִֽׂיתָ יָבֽוֹאוּ וְיִשְׁתַּחֲווּ לְפָנֶֽיךָ אֲדֹנָי וִיכַבְּ֒דוּ לִשְׁמֶֽךָ: כִּי־גָדוֹל אַתָּה וְעֹשֵׂה נִפְלָאוֹת אַתָּה אֱלֹהִים לְבַדֶּֽךָ: הוֹרֵֽנִי יְהֺוָה דַּרְכֶּֽךָ אֲהַלֵּךְ בַּאֲמִתֶּֽךָ יַחֵד לְבָבִי לְיִרְאָה שְׁמֶֽךָ: אוֹדְ֒ךָ אֲדֹנָי אֱלֹהַי בְּכָל־לְבָבִי וַאֲכַבְּ֒דָה שִׁמְךָ לְעוֹלָם: כִּי־חַסְדְּ֒ךָ גָּדוֹל עָלָי וְהִצַּֽלְתָּ נַפְשִׁי מִשְּׁ֒אוֹל תַּחְתִּיָּה: אֱלֹהִים זֵדִים קָֽמוּ־עָלַי וַעֲדַת עָרִיצִים בִּקְ֒שׁוּ נַפְשִׁי וְלֹא שָׂמֽוּךָ לְנֶגְדָּם: וְאַתָּה אֲדֹנָי אֵל־רַחוּם וְחַנּוּן אֶֽרֶךְ אַפַּֽיִם וְרַב־חֶֽסֶד וֶאֱמֶת: פְּנֵה אֵלַי וְחָנֵּֽנִי תְּנָה־עֻזְּ֒ךָ לְעַבְדֶּֽךָ וְהוֹשִֽׁיעָה לְבֶן־אֲמָתֶֽךָ: עֲשֵׂה־עִמִּי אוֹת לְטוֹבָה וְיִרְאוּ שׂנְ֒אַי וְיֵבֽשׁוּ כִּי־אַתָּה יְהֺוָה עֲזַרְתַּֽנִי וְנִחַמְתָּֽנִי:

בֵּית יַעֲקֹב לְכוּ וְנֵלְ֒כָה בְּאוֹר יְהוָֹה: כִּי כָּל־הָעַמִּים יֵֽלְ֒כוּ אִישׁ בְּשֵׁם אֱלֺֽהָיו, וַֽאֲנַֽחְנוּ נֵלֵךְ בְּשֵׁם־יְהוָֹה אֱלֹהֵֽינוּ לְעוֹלָם וָעֶד: יְהִי יְהוָֹה אֱלֹהֵֽינוּ עִמָּֽנוּ כַּֽאֲשֶׁר הָיָה עִם־אֲבוֹתֵֽינוּ, אַל־יַֽעַזְ֒בֵֽנוּ וְאַל־יִטְּ֒שֵֽׁנוּ: לְהַטּוֹת לְבָבֵֽנוּ אֵלָיו, לָלֶֽכֶת בְּכָל־דְּרָכָיו, וְלִשְׁמֹר מִצְוֹתָיו, וְחֻקָּיו, וּמִשְׁפָּטָיו, אֲשֶׁר צִוָּה אֶת־אֲבֹתֵֽינוּ: וְיִהְיוּ דְבָרַי אֵֽלֶּה אֲשֶׁר הִתְחַנַּֽנְתִּי לִפְנֵי יְהוָֹה, קְרֹבִים אֶל יְהוָֹה אֱלֹהֵֽינוּ יוֹמָם וָלָֽיְלָה, לַעֲשׂוֹת מִשְׁפַּט עַבְדּוֹ, וּמִשְׁפַּט עַמּוֹ יִשְׂרָאֵל דְּבַר־יוֹם בְּיוֹמוֹ: לְמַֽעַן דַּֽעַת כָּל־עַמֵּי הָאָֽרֶץ, כִּי יְהוָֹה הוּא הָֽאֱלֹהִים, אֵין עוֹד:

שִׁיר הַמַּעֲלוֹת לְדָוִד לוּלֵי יְהֺוָה שֶׁהָֽיָה לָֽנוּ יֹֽאמַר־נָא יִשְׂרָאֵל: לוּלֵי יְהֺוָה שֶׁהָֽיָה לָֽנוּ בְּקוּם עָלֵֽינוּ אָדָם: אֲזַי חַיִּים בְּלָעֽוּנוּ בַּחֲרוֹת אַפָּם בָּֽנוּ: אֲזַי הַמַּֽיִם שְׁטָפֽוּנוּ נַֽחְלָה עָבַר עַל־נַפְשֵֽׁנוּ: אֲזַי עָבַר עַל־נַפְשֵֽׁנוּ הַמַּֽיִם הַזֵּידוֹנִים: בָּרוּךְ יְהֺוָה שֶׁלֹּא נְתָנָֽנוּ טֶֽרֶף לְשִׁנֵּיהֶם: נַפְשֵֽׁנוּ כְּצִפּוֹר נִמְלְטָה מִפַּח יוֹקְ֒שִׁים הַפַּח נִשְׁבָּר וַאֲנַֽחְנוּ נִמְלָֽטְ֒נוּ: עֶזְרֵֽנוּ בְּשֵׁם יְהֺוָה עֹשֵׂה שָׁמַֽיִם וָאָֽרֶץ:

תוכן העניינים

סידור ספרד

טוען…

אור ברסלב
תרומה

מקלידים לפחות שתי אותיות

מתעלם מניקוד ומכתיב מלא או חסר, ומבין גם לפי משמעות↑↓ מעבר · Enter פתיחה