סידור ספרד לשבת· רבי אברהם דיוויס
תפלת מנחה לערב שבת
תהלים קז
הֹדוּ לַיהֹוָה כִּי־טוֹב
כִּי לְעוֹלָם חַסְדּוֹ:
יֹאמְרוּ גְּאוּלֵי יְהֹוָה
אֲשֶׁר גְּאָלָם
מִיַּד־צָר:
וּמֵאֲרָצוֹת קִבְּצָם
מִמִּזְרָח וּמִמַּעֲרָב
מִצָּפוֹן וּמִיָּם:
תָּעוּ בַמִּדְבָּר
בִּישִׁימוֹן דָּֽרֶךְ
עִיר מוֹשָׁב לֹא מָצָֽאוּ:
רְעֵבִים גַּם־צְמֵאִים
נַפְשָׁם בָּהֶם תִּתְעַטָּף:
וַיִּצְעֲקוּ אֶל־יְהֹוָה
בַּצַּר לָהֶם
מִמְּצוּקוֹתֵיהֶם יַצִּילֵם:
וַיַּדְרִיכֵם בְּדֶֽרֶךְ יְשָׁרָה
לָלֶֽכֶת אֶל־עִיר מוֹשָׁב:
יוֹדוּ לַיהֹוָה חַסְדּוֹ
וְנִפְלְאוֹתָיו לִבְנֵי אָדָם:
כִּי־הִשְׂבִּֽיעַ נֶֽפֶשׁ שֹׁקֵקָה
וְנֶֽפֶשׁ רְעֵבָה מִלֵּא־טוֹב:
יֽשְׁבֵי חֽשֶׁךְ
וְצַלְמָֽוֶת
אֲסִירֵי עֳנִי וּבַרְזֶל:
כִּי־הִמְרוּ אִמְרֵי־אֵל
וַעֲצַת עֶלְיוֹן
נָאָֽצוּ:
וַיַּכְנַע בֶּעָמָל לִבָּם
כָּשְׁלוּ וְאֵין עֹזֵר:
וַיִּזְעֲקוּ אֶל־יְהֹוָה
בַּצַּר לָהֶם
מִמְּצֻקוֹתֵיהֶם יוֹשִׁיעֵם:
יוֹצִיאֵם מֵחֽשֶׁךְ
וְצַלְמָֽוֶת
וּמוֹסְרוֹתֵיהֶם יְנַתֵּק:
יוֹדוּ לַיהֹוָה חַסְדּוֹ
וְנִפְלְאוֹתָיו לִבְנֵי אָדָם:
כִּי־שִׁבַּר דַּלְתוֹת נְחֽשֶׁת
וּבְרִיחֵי בַרְזֶל גִּדֵּֽעַ:
אֱוִלִים
מִדֶּֽרֶךְ פִּשְׁעָם
וּמֵעֲוֹנֹתֵיהֶם
יִתְעַנּוּ:
כָּל־אֹֽכֶל תְּתַעֵב נַפְשָׁם
וַיַּגִּיעוּ עַד־שַֽׁעֲרֵי מָֽוֶת:
וַיִּזְעֲקוּ אֶל־יְהֹוָה
בַּצַּר לָהֶם
מִמְּצֻקוֹתֵיהֶם יוֹשִׁיעֵם:
יִשְׁלַח דְּבָרוֹ וְיִרְפָּאֵם
וִימַלֵּט מִשְּׁחִיתוֹתָם:
יוֹדוּ לַיהֹוָה חַסְדּוֹ
וְנִפְלְאוֹתָיו לִבְנֵי אָדָם:
וְיִזְבְּחוּ זִבְחֵי תוֹדָה
וִיסַפְּרוּ מַעֲשָׂיו בְּרִנָּה:
יוֹרְדֵי הַיָּם בָּאֳנִיּוֹת
עֹשֵׂי מְלָאכָה בְּמַֽיִם רַבִּים:
הֵֽמָּה רָאוּ מַעֲשֵׂי יְהֹוָה
וְנִפְלְאוֹתָיו בִּמְצוּלָה:
וַיֹּאמֶר וַיַּעֲמֵד רֽוּחַ סְעָרָה
וַתְּרוֹמֵם גַּלָּיו:
יַעֲלוּ שָׁמַֽיִם
יֵרְדוּ תְהוֹמוֹת
נַפְשָׁם בְּרָעָה תִתְמוֹגָג:
יָחֽוֹגּוּ וְיָנֽוּעוּ כַּשִּׁכּוֹר
וְכָל־חָכְמָתָם תִּתְבַּלָּע:
וַיִּצְעֲקוּ אֶל־יְהֹוָה
בַּצַּר לָהֶם
וּמִמְּצוּקֹתֵיהֶם יוֹצִיאֵם:
יָקֵם סְעָרָה לִדְמָמָה
וַיֶּחֱשׁוּ גַּלֵּיהֶם:
וַיִּשְׂמְחוּ
כִי־יִשְׁתֹּֽקוּ
וַיַּנְחֵם אֶל־מְחוֹז חֶפְצָם:
יוֹדוּ לַיהֹוָה חַסְדּוֹ
וְנִפְלְאוֹתָיו לִבְנֵי אָדָם:
וִירוֹמְמֽוּהוּ
בִּקְהַל־עָם
וּבְמוֹשַׁב זְקֵנִים יְהַלְלֽוּהוּ:
יָשֵׂם נְהָרוֹת לְמִדְבָּר
וּמֹצָֽאֵי מַֽיִם לְצִמָּאוֹן:
אֶֽרֶץ פְּרִי לִמְלֵחָה
מֵרָעַת יֽוֹשְׁבֵי בָהּ:
יָשֵׂם מִדְבָּר לַאֲגַם־מַֽיִם
וְאֶֽרֶץ צִיָּה לְמֹצָֽאֵי מָֽיִם:
וַיּֽוֹשֶׁב שָׁם רְעֵבִים
וַיְכוֹנְנוּ עִיר מוֹשָׁב:
וַיִּזְרְעוּ שָׂדוֹת וַיִּטְּעוּ כְרָמִים
וַיַּעֲשׂוּ פְּרִי תְבוּאָה:
וַיְבָרְכֵם
וַיִּרְבּוּ מְאֹד
וּבְהֶמְתָּם לֹא יַמְעִיט:
וַיִּמְעֲטוּ
וַיָּשֹֽׁחוּ
מֵעֹֽצֶר רָעָה וְיָגוֹן:
שֹׁפֵךְ בּוּז עַל־נְדִיבִים
וַיַּתְעֵם בְּתֹֽהוּ
לֹא־דָֽרֶךְ:
וַיְשַׂגֵּב אֶבְיוֹן מֵעֽוֹנִי
וַיָּֽשֶׂם כַּצֹּאן מִשְׁפָּחוֹת:
יִרְאוּ יְשָׁרִים וְיִשְׂמָֽחוּ
וְכָל־עַוְלָה קָֽפְצָה פִּֽיהָ:
מִי־חָכָם וְיִשְׁמָר־אֵֽלֶּה
וְיִתְבּוֹנְנוּ
חַסְדֵּי יְהוָה:
ידיד נפש
יְדִיד נֶֽפֶשׁ אָב הָרַחֲמָן.
מְשׁוֹךְ עַבְדְּ֒ךָ אֶל רְצוֹנֶֽךָ.
יָרוּץ עַבְדְּ֒ךָ כְּמוֹ אַיָּל
יִשְׁתַּחֲוֶה אֶל מוּל הֲדָרֶֽךָ.
יֶעֱרַב לוֹ יְדִידוֹתֶֽיךָ.
מִנֹּֽפֶת צוּף
וְכָל טָֽעַם:
הָדוּר נָאֶה זִיו הָעוֹלָם.
נַפְשִׁי חוֹלַת אַהֲבָתֶֽךָ.
אָֽנָּא אֵל נָא רְפָא נָא לָהּ.
בְּהַרְאוֹת לָהּ
נֹֽעַם זִיוֶֽךָ.
אָז תִּתְחַזֵּק וְתִתְרַפֵּא.
וְהָיְ֒תָה לָהּ שִׂמְחַת עוֹלָם:
וָתִיק יֶהֱמוּ נָא רַחֲמֶֽיךָ
וְחֽוּסָה נָא עַל בֵּן אֲהוּבֶֽךָ.
כִּי זֶה כַּמָּה נִכְסוֹף נִכְסַפְתִּי
לִרְאוֹת מְהֵרָה בְּתִפְאֶֽרֶת עֻזֶּֽךָ.
אֵֽלֶּה חָמְ֒דָה לִבִּי
וְחֽוּסָה נָא וְאַל תִּתְעַלֵּם:
הִגָּלֶה נָּא
וּפְרוֹס חֲבִיבִי עָלַי
אֶת סֻכַּת שְׁלוֹמֶֽךָ.
תָּאִיר אֶֽרֶץ מִכְּ֒בוֹדֶֽךָ.
נָגִֽילָה וְנִשְׂמְ֒חָה בָּךְ.
מַהֵר אֶהֹב
כִּי בָא מוֹעֵד
וְחָנֵּֽנוּ כִּימֵי עוֹלָם:
אשרי
אַשְׁרֵי יוֹשְׁ֒בֵי
בֵיתֶֽךָ
עוֹד יְהַלְ֒לֽוּךָ סֶּֽלָה:
אַשְׁרֵי הָעָם שֶׁכָּֽכָה לּוֹ
אַשְׁרֵי הָעָם
שֶׁיְהֹוָה אֱלֹהָיו:
תְּהִלָּה לְדָוִד
אֲרוֹמִמְ֒ךָ אֱלוֹהַי הַמֶּֽלֶךְ
וַאֲבָרְ֒כָה שִׁמְ֒ךָ לְעוֹלָם וָעֶד:
בְּכָל־יוֹם אֲבָרְ֒כֶֽךָ
וַאֲהַלְ֒לָה שִׁמְ֒ךָ לְעוֹלָם וָעֶד:
גָּדוֹל יְהֹוָה וּמְ֒הֻלָּל מְאֹד
וְלִגְ֒דֻלָּתוֹ אֵין חֵֽקֶר:
דּוֹר לְדוֹר
יְשַׁבַּח מַעֲשֶׂיךָ
וּגְ֒בוּרֹתֶֽיךָ יַגִּֽידוּ:
הֲדַר כְּבוֹד הוֹדֶֽךָ
וְדִבְ֒רֵי נִפְלְ֒אֹתֶֽיךָ אָשִֽׂיחָה:
וֶעֱזוּז נוֹרְ֒אֹתֶֽיךָ יֹאמֵרוּ
וּגְ֒דֻלָּתְ֒ךָ אֲסַפְּ֒רֶֽנָּה:
זֵֽכֶר רַב־טוּבְ֒ךָ
יַבִּֽיעוּ
וְצִדְ֒קָתְ֒ךָ יְרַנֵּֽנוּ: