סידור ספרד לשבת· רבי אברהם דיוויס
קבלת שבת · תהלים צב
מִזְמוֹר שִׁיר לְיוֹם הַשַּׁבָּת:
טוֹב לְהֹדוֹת לַיהֹוָה
וּלְזַמֵּר לְשִׁמְךָ עֶלְיוֹן:
לְהַגִּיד בַּבֹּֽקֶר חַסְדֶּֽךָ
וֶאֱמוּנָתְךָ בַּלֵּילוֹת:
עֲלֵי־עָשׂוֹר וַעֲלֵי־נָֽבֶל
עֲלֵי הִגָּיוֹן בְּכִנּוֹר:
כִּי שִׂמַּחְתַּֽנִי יְהֹוָה
בְּפָעֳלֶֽךָ
בְּמַעֲשֵׂי יָדֶֽיךָ אֲרַנֵּן:
מַה־גָּדְלוּ מַעֲשֶֽׂיךָ יְהֹוָה
מְאֹד עָמְקוּ מַחְשְׁבֹתֶֽיךָ:
אִישׁ־בַּֽעַר לֹא יֵדָע
וּכְסִיל לֹא־יָבִין אֶת־זֹאת:
בִּפְרֹֽחַ רְשָׁעִים כְּמוֹ עֵֽשֶׂב
וַיָּצִֽיצוּ כָּל־פֹּֽעֲלֵי אָֽוֶן
לְהִשָּׁמְדָם עֲדֵי־עַד:
וְאַתָּה מָרוֹם לְעֹלָם
יְהֹוָה:
כִּי הִנֵּה אֹיְבֶֽיךָ יְהֹוָה
כִּי־הִנֵּה אֹיְבֶֽיךָ יֹאבֵֽדוּ
יִתְפָּרְדוּ כָּל־פֹּֽעֲלֵי אָֽוֶן:
וַתָּֽרֶם כִּרְאֵים קַרְנִי
בַּלֹּתִי בְּשֶֽׁמֶן רַעֲנָן:
וַתַּבֵּט עֵינִי
בְּשׁוּרָי
בַּקָּמִים עָלַי מְרֵעִים
תִּשְׁמַֽעְנָה אָזְנָי:
צַדִּיק כַּתָּמָר יִפְרָח
כְּאֶֽרֶז בַּלְּבָנוֹן יִשְׂגֶּה:
שְׁתוּלִים בְּבֵית יְהֹוָה
בְּחַצְרוֹת אֱלֹהֵֽינוּ
יַפְרִֽיחוּ:
עוֹד יְנוּבוּן בְּשֵׂיבָה
דְּשֵׁנִים וְרַעֲנַנִּים יִהְיוּ:
לְהַגִּיד כִּי־יָשָׁר יְהֹוָה
צוּרִי
וְלֹא־עַוְלָֽתָה בּוֹ: