מעשה שמשון· רבי משה חיים לוצאטו [הרמח"ל]
תמנית ושמשון.
תמנית דּוֹדִי, צְבִי חִשְׁקִי, עֵת כִּי אֶרְאֶךָ
יִתְרוֹצְצוּ בִי שְׂעִפַּי גַם יָחַד.
כִּי אֶחֱזֶה מִכְלֹל יְפִי פָנֶיךָ,
כַּנְפֵי נֹגַהּ לְךָ כִּי עָלַי יוֹפִיעוּ,
חִצֵּי גִבּוֹר לִי שְׁנוּנִים יָשׁוּבוּ,
יִמְחֲצוּ כִלְיוֹתַי וְלֹא יַחֲמֹלוּ,
יֵקַד בְּלִבִּי כִּיקוֹד אֵשׁ אוֹכָלֶת,
נַפְשִׁי בְנַפְשְׁךָ יַחְדָּו נִקְשָׁרָה.
אַךְ עָרְפְּךָ קָשֶׁה אָז כִּי אַבִּיטָה,
תֹּאמַר כִּי תִדְבַּק בִּי וְרָחוֹק אָתָּה,
תַּחַת אַהֲבָתִי שִׂנְאָה תָּשִׁיבָה, –
תַּחַת רִשְׁפֵּי אִשּׁי יַעֲמֹד קֶרַח,
מִלִּבְּךָ יַרְחִיק וְיִזְרֶה הָלְאָה
לִבִּי, כִּי שְׂנֵאתָנִי.
אַךְ לֹא אֶתְאַפֵּק לְהַרְחִיק מִמֶּךָּ
נְדֹד אִם כֵּן יָאָתָה,
כִּי לֹא אַקְשֶׁה עָרְפִּי, אַכְזָר, כָּמוֹךָ.
אַךְ נַהֲרֵי יָגוֹן לִבִּי יָסֹבּוּ,
כֵּן נַחֲלֵי דִמְעָה עֵינַי תֵּרַדְנָה,
הִמֵּס יִמַּס לִבִּי, חִיל יֹאחֲזֵנִי.
אַךְ מָה אֹמַר? הִנֵּה הַיּוֹם הִגִּיעַ,
יָשׁוּב גְּמוּלִי לִי אֲשֶׁר חָטָאתִי
לָתֵת מֶגֶד דּוֹדֵי, אַכְזָר, אֵלֶיךָ
וּלְהִתְרַפֵּק כְּעַל יְדִיד עָלֶיךָ.
מֶה חָטָאתִי נֶגְדְּךָ, יְלִיד-הַחֵשֶׁק,
כִּי בְיַד זֶה עֹרֶף-בַּרְזֶל שַׁתָּנִי?
תָּעִיר בְּתוֹךְ לִבִּי קְרָב וָנֵשֶׁק,
בִּמְרִי עָצְבִּי אֶשְׁכַּח, כִּי יִסַּרְתָּנִי.
שמשון מַה-תֶּהֱמִי עָלַי, יוֹנָתִי? לָמָּה תִבְכִּי?
תמנית לָמָּה אֶבְכֶּה? וַתִּשְׂטְמֵנִי!
שמשון הֵן אַתְּ מְשׂוֹשׂ לִבִּי – וְשׂוֹנֵא אָנִי!
אֵיפֹה פְרִי שִׂנְאָה מֶנִּי אָכַלְתְּ?
תמנית אֵיפֹה פְרִי שִׂנְאָתְךָ אָכָלְתִּי?
אֵיפֹה פְרִי דוֹדִים – הֲלֹא תִשְׁאָלָה!
הִנֵּה לִבְנֵי עַמִּי הַחִידָה חַדְתָּ,
אִם אֲהַבְתַּנִי – אֵיךְ לִי לֹא הִגַּדְתָּ?
שמשון אֵיך אַגִּידָהּ לָךְ אִם לֹא הִגַּדְתִּי לְאָבִי וּלְאִמִּי?
תמנית לָכֵן אָמַרְתִּי
מֵאָז כִּי שְׂנֵאתָנִי.
אַךְ אֶת זֹאת אֶעֱשֶׂה: אֶהְיֶה כָּמוֹךָ,
אָצוּק לְבָבִי כַּאֲשֶׁר עָשִׂיתָ,
תִּגְעַל נַפְשִׁי אֲהָבֶיךָ – כִּי לָמָּה
הֶבֶל אִיגַע עִם לֵב לֹא לֵב, עִם אָבֶן?
לֹא עוֹד אָסוּר, לֹא עוֹד, אֶל מִשְׁמַעְתֶּךָ
עַד עֵת כִּי לְחָבְשָׁהּ יָשוּב לִבֶּךָ.33
לֹא יִכָּנַע בַּרְזֶל וּנְחֹשֶׁת סֶלָה
כִּי אֶל בַּרְזֶל אַחֵר, אֲשֶׁר כָּמֹהוּ.
כַּף-יָד לְפוֹצֵץ כֵּן לֵב-אֶבֶן תֵּלַהּ; 34
רַק לֵב-אֶבֶן אַחֵר יוּכַל עֲשֹׂהוּ.
(תלך לה התמנית).