מעשה שמשון· רבי משה חיים לוצאטו [הרמח"ל]
שמשון ופלשתים
שמשון אַחַי, נָא שְׁמָעוּנִי,
אָחוּדָה נָא חִידָה, כִּי עֵת לִשְׂמֹחַ,
וְתַגִּידוּ אוֹתָהּ לִי אִם תּוּכָלוּ.
הִנֵּה זְמָן נָתַתִּי,
שִׁבְעַת יְמֵי מִשְׁתֶּה אֲשֶׁר עוֹד אָעַשׂ.
הֲלֹא לִפְעֻלַּתְכֶם כֵּן שָׂכָר יֶהִי,
כִּי אִם אוֹתָהּ תַּגִּידוּ
חֲלִיפוֹת בְּגָדִים וּסְדִינִים יַחַד
מֵהֶם שְׁלֹשִׁים אֲלֵיכֶם אֶתֵּנָה;
אִם לֹא – לִי תִתֵּנוּ
אַתֶּם כָּזֹאת. כִּי כֵן הִנֵּה יָאָתָה.
אִם יֵשׁ אֶת נַפְשְׁכֶם, עַתָּה שְׁמָעוּ
חִידָתִי זֹאת, אִם לְהַגִידָהּ תֵּדָעוּ.
פלשתים חוּדָה חִידָתְךָ וְנִשְׁמָעֶנָּה.
שמשון אִם חִידָתִי זֹאת תַּחְפְּצוּ לָדַעַת,
הַטּוּ אָזְנְכֶם לְאִמְרֵי פִי עָתָּה:
מֵאוֹכֵל יָצָא אֹכֶל
וּמִנִּי עַז מָתוֹק. הִנֵּה הִגַּדְתִּי
לָכֶם חִידָתִי, עַתָּה הַגִּידוּהָ,
אִם לֹא – אֶת דִּבְרֵיכֶם אֵלַי תָּקִימוּ.
הֵן עַד שִׁבְעַת יָמִים לָכֶם אוֹחִילָה,
עַתָּה בְיוֹם טוֹבָה נִשְׂמַח, נָגִילָה.