אור ברסלב
מחזור ליום כיפור - אשכנז תפלת שחרית › שירת הים

מחזור ליום כיפור - אשכנז· רבי אברהם דיוויס

תפלת שחרית · שירת הים

אשרי

וַיּֽוֹשַׁע יְהֹוָה בַּיּוֹם הַהוּא

אֶת־יִשְׂרָאֵל מִיַּד מִצְרָֽיִם

וַיַּרְא יִשְׂרָאֵל אֶת־מִצְרַֽיִם

מֵת עַל־שְׂפַת הַיָּם:

חזן: וַיַּרְא יִשְׂרָאֵל

אֶת־הַיָּד הַגְּדֹלָה

אֲשֶׁר עָשָׂה יְהֹוָה בְּמִצְרַֽיִם

וַיִּירְאוּ הָעָם אֶת יְהֹוָה

וַיַּאֲמִֽינוּ בַּיהֹוָה

וּבְמשֶׁה עַבְדּוֹ:

אָז יָשִׁיר משֶׁה וּבְנֵי יִשְׂרָאֵל

אֶת־הַשִּׁירָה הַזֹּאת לַיהֹוָה

וַיֹּאמְרוּ לֵאמֹר

אָשִֽׁירָה לַיהֹוָה כִּי־גָאֹה גָּאָה

סוּס וְרֹכְבוֹ רָמָה בַיָּם:

עָזִּי וְזִמְרָת יָהּ

וַיְהִי־לִי לִישׁוּעָה

זֶה אֵלִי וְאַנְוֵֽהוּ

אֱלֹהֵי אָבִי וַאֲרֹמְמֶֽנְהוּ:

יְהֹוָה אִישׁ מִלְחָמָה

יְהֹוָה שְׁמוֹ:

מַרְכְּבֹת פַּרְעֹה וְחֵילוֹ

יָרָה בַיָּם

וּמִבְחַר שָׁלִשָׁיו טֻבְּעוּ

בְיַם־סוּף:

תְּהֹמֹת יְכַסְיֻֽמוּ

יָרְדוּ בִמְצוֹלֹת כְּמוֹ־אָֽבֶן:

יְמִינְךָ יְהֹוָה

נֶאְדָּרִי בַּכֹּֽחַ

יְמִֽינְךָ יְהֹוָה תִּרְעַץ אוֹיֵב:

וּבְרֹב גְּאוֹנְךָ

תַּהֲרֹס קָמֶֽיךָ

תְּשַׁלַּח חֲרֹנְךָ

יֹֽאכְלֵמוֹ כַּקַּשׁ:

וּבְרֽוּחַ אַפֶּֽיךָ

נֶֽעֶרְמוּ מַֽיִם

נִצְּבוּ כְמוֹ־נֵד נֹזְלִים

קָפְאוּ תְהֹמֹת

בְּלֶב־יָם:

אָמַר אוֹיֵב

אֶרְדֹּף אַשִּׂיג

אֲחַלֵּק שָׁלָל תִּמְלָאֵֽמוֹ נַפְשִׁי

אָרִיק חַרְבִּי

תּוֹרִישֵֽׁמוֹ יָדִי:

נָשַֽׁפְתָּ בְרוּחֲךָ

כִּסָּֽמוֹ יָם

צָלֲלוּ כַּעוֹפֶֽרֶת בְּמַֽיִם אַדִּירִים:

מִי־כָמֹֽכָה בָּאֵלִם יְהֹוָה

מִי כָּמֹֽכָה

נֶאְדָּר בַּקֹּֽדֶשׁ

נוֹרָא תְהִלֹּת עֹֽשֵׂה־פֶֽלֶא:

נָטִֽיתָ יְמִינְךָ

תִּבְלָעֵֽמוֹ אָֽרֶץ:

נָחִֽיתָ בְחַסְדְּךָ

עַם־זוּ גָּאָֽלְתָּ

נֵהַֽלְתָּ בְעָזְּךָ

אֶל־נְוֵה קָדְשֶֽׁךָ:

שָֽׁמְעוּ עַמִּים יִרְגָּזוּן

חִיל אָחַז

ישְׁבֵי פְּלָֽשֶׁת:

אָז נִבְהֲלוּ אַלּוּפֵי אֱדוֹם

אֵילֵי מוֹאָב

יֹֽאחֲזֵֽמוֹ רָֽעַד

נָמֹֽגוּ כֹּל ישְׁבֵי כְנָֽעַן:

תִּפֹּל עֲלֵיהֶם אֵימָֽתָה וָפַֽחַד

בִּגְדֹל זְרוֹעֲךָ

יִדְּמוּ כָּאָֽבֶן

עַד־יַֽעֲבֹר עַמְּךָ יְהֹוָה

עַד־יַֽעֲבֹר

עַם־זוּ קָנִֽיתָ:

תְּבִאֵֽמוֹ וְתִטָּעֵֽמוֹ

בְּהַר נַחֲלָתְךָ

מָכוֹן לְשִׁבְתְּךָ

פָּעַֽלְתָּ יְהֹוָה

מִקְּדָשׁ אֲדֹנָי

כּוֹנְנוּ יָדֶֽיךָ:

יְהֹוָה יִמְלֹךְ לְעֹלָם וָעֶד:

יְהֹוָה יִמְלֹךְ לְעֹלָם וָעֶד:

יְהֹוָה מַלְכוּתֵהּ קָאֵם

לְעָלַם וּלְעָלְמֵי עָלְמַיָּא:

כִּי בָא סוּס פַּרְעֹה בְּרִכְבּוֹ

וּבְפָרָשָׁיו בַּיָּם

וַיָּֽשֶׁב יְהֹוָה עֲלֵהֶם

אֶת־מֵי הַיָּם

וּבְנֵי יִשְׂרָאֵל

הָלְכוּ בַיַּבָּשָׁה בְּתוֹךְ הַיָּֽם:

כִּי לַיהֹוָה הַמְּלוּכָה

וּמשֵׁל בַּגּוֹיִם:

חזן: וְעָלוּ מוֹשִׁיעִים בְּהַר צִיּוֹן

לִשְׁפֹּט אֶת־הַר עֵשָׂו,

וְהָיְתָה לַיהֹוָה הַמְּלוּכָה:

חזן: וְהָיָה יְהֹוָה לְמֶֽלֶךְ

עַל־כָּל הָאָֽרֶץ

בַּיּוֹם הַהוּא

יִהְיֶה יְהֹוָה אֶחָד וּשְׁמוֹ אֶחָד:

תוכן העניינים

מחזור ליום כיפור - אשכנז

טוען…

אור ברסלב
תרומה

מקלידים לפחות שתי אותיות

מתעלם מניקוד ומכתיב מלא או חסר, ומבין גם לפי משמעות↑↓ מעבר · Enter פתיחה