מחזור ליום כיפור - אשכנז· רבי אברהם דיוויס
קריאת התורה · הפטרה לשחרית
וְאָמַ֥ר סֹֽלּוּ־סֹ֖לּוּ פַּנּוּ־דָ֑רֶךְ הָרִ֥ימוּ מִכְשׁ֖וֹל מִדֶּ֥רֶךְ עַמִּֽי: כִּי כֹ֨ה אָמַ֜ר רָ֣ם וְנִשָּׂ֗א שֹׁכֵ֥ן עַד֙ וְקָד֣וֹשׁ שְׁמ֔וֹ מָר֥וֹם וְקָד֖וֹשׁ אֶשְׁכּ֑וֹן וְאֶת־דַּכָּא֙ וּשְׁפַל־ר֔וּחַ לְהַֽחֲיוֹת֙ ר֣וּחַ שְׁפָלִ֔ים וּֽלְהַֽחֲי֖וֹת לֵ֥ב נִדְכָּאִֽים: כִּ֣י לֹ֤א לְעוֹלָם֙ אָרִ֔יב וְלֹ֥א לָנֶ֖צַח אֶקְצ֑וֹף כִּי־ר֨וּחַ֙ מִלְּפָנַ֣י יַֽעֲט֔וֹף וּנְשָׁמ֖וֹת אֲנִ֥י עָשִֽׂיתִי: בַּֽעֲוֹ֥ן בִּצְע֛וֹ קָצַ֥פְתִּי וְאַכֵּ֖הוּ הַסְתֵּ֣ר וְאֶקְצֹ֑ף וַיֵּ֥לֶךְ שׁוֹבָ֖ב בְּדֶ֥רֶךְ לִבּֽוֹ: דְּרָכָ֥יו רָאִ֖יתִי וְאֶרְפָּאֵ֑הוּ וְאַנְחֵ֕הוּ וַֽאֲשַׁלֵּ֧ם נִֽחֻמִ֛ים ל֖וֹ וְלַֽאֲבֵלָֽיו: בּוֹרֵ֖א נִ֣יב שְׂפָתָ֑יִם שָׁל֨וֹם| שָׁל֜וֹם לָֽרָח֧וֹק וְלַקָּר֛וֹב אָמַ֥ר יְהֹוָ֖ה וּרְפָאתִֽיו: וְהָֽרְשָׁעִ֖ים כַּיָּ֣ם נִגְרָ֑שׁ כִּ֤י הַשְׁקֵט֙ לֹ֣א יוּכָ֔ל וַיִּגְרְשׁ֥וּ מֵימָ֖יו רֶ֥פֶשׁ וָטִֽיט: אֵ֣ין שָׁל֔וֹם אָמַ֥ר אֱלֹהַ֖י לָֽרְשָׁעִֽים: קְרָ֤א בְגָרוֹן֨ אַל־תַּחְשׂ֔ךְ כַּשּׁוֹפָ֖ר הָרֵ֣ם קוֹלֶ֑ךָ וְהַגֵּ֤ד לְעַמִּי֙ פִּשְׁעָ֔ם וּלְבֵ֥ית יַֽעֲקֹ֖ב חַטֹּאתָֽם: וְאוֹתִ֗י י֥וֹם| יוֹם֙ יִדְרשׁ֔וּן וְדַ֥עַת דְּרָכַ֖י יֶחְפָּצ֑וּן כְּג֞וֹי אֲשֶׁר־צְדָקָ֣ה עָשָׂ֗ה וּמִשְׁפַּ֤ט אֱלֹהָיו֙ לֹ֣א עָזָ֔ב יִשְׁאָל֨וּנִי֙ מִשְׁפְּטֵי־צֶ֔דֶק קִרְבַ֥ת אֱלֹהִ֖ים יֶחְפָּצֽוּן: לָ֤מָּה צַּ֨מְנוּ֙ וְלֹ֣א רָאִ֔יתָ עִנִּ֥ינוּ נַפְשֵׁ֖נוּ וְלֹ֣א תֵדָ֑ע הֵ֣ן בְּי֤וֹם צֹֽמְכֶם֙ תִּמְצְאוּ־ חֵ֔פֶץ וְכָל־עַצְּבֵיכֶ֖ם תִּנְגֹּֽשׂוּ: הֵ֣ן לְרִ֤יב וּמַצָּה֙ תָּצ֔וּמוּ וּלְהַכּ֖וֹת בְּאֶגְרֹ֣ף רֶ֑שַׁע לֹֽא־תָצ֣וּמוּ כַיּ֔וֹם לְהַשְׁמִ֥יעַ בַּמָּר֖וֹם קֽוֹלְכֶֽם: הֲכָזֶ֗ה יִֽהְיֶה֙ צ֣וֹם אֶבְחָרֵ֔הוּ י֛וֹם עַנּ֥וֹת אָדָ֖ם נַפְשׁ֑וֹ הֲלָכֹ֨ף כְּאַגְמֹ֜ן רֹאשׁ֗וֹ וְשַׂ֤ק וָאֵ֨פֶר֨ יַצִּ֔יעַ הֲלָזֶה֙ תִּקְרָא־צ֔וֹם וְי֥וֹם רָצ֖וֹן לַֽיהֹוָֽה: הֲל֣וֹא זֶה֘ צ֣וֹם אֶבְחָרֵהוּ֒ פַּתֵּ֨חַ֙ חַרְצֻבּ֣וֹת רֶ֔שַׁע הַתֵּ֖ר אֲגֻדּ֣וֹת מוֹטָ֑ה וְשַׁלַּ֤ח רְצוּצִים֙ חָפְשִׁ֔ים וְכָל־מוֹטָ֖ה תְּנַתֵּֽקוּ: הֲל֨וֹא פָרֹ֤ס לָֽרָעֵב֨ לַחְמֶ֔ךָ וַֽעֲנִיִּ֥ים מְרוּדִ֖ים תָּ֣בִיא בָ֑יִת כִּֽי־תִרְאֶ֤ה עָרֹם֨ וְכִסִּית֔וֹ וּמִבְּשָׂרְךָ֖ לֹ֥א תִתְעַלָּֽם: אָ֣ז יִבָּקַ֤ע כַּשַּׁ֨חַר֙ אוֹרֶ֔ךָ וַֽאֲרֻכָֽתְךָ֖ מְהֵרָ֣ה תִצְמָ֑ח וְהָלַ֤ךְ לְפָנֶ֨יךָ֙ צִדְקֶ֔ךָ כְּב֥וֹד יְהֹוָ֖ה יַֽאַסְפֶֽךָ: אָ֤ז תִּקְרָא֙ וַֽיהֹוָ֣ה יַֽעֲנֶ֔ה תְּשַׁוַּ֖ע וְיֹאמַ֣ר הִנֵּ֑נִי אִם־תָּסִ֤יר מִתּֽוֹכְךָ֙ מוֹטָ֔ה שְׁלַ֥ח אֶצְבַּ֖ע וְדַבֶּר־אָֽוֶן: וְתָפֵ֤ק לָֽרָעֵב֙ נַפְשֶׁ֔ךָ וְנֶ֥פֶשׁ נַֽעֲנָ֖ה תַּשְׂבִּ֑יעַ וְזָרַ֤ח בַּחֹ֨שֶׁךְ֙ אוֹרֶ֔ךָ וַֽאֲפֵלָֽתְךָ֖ כַּֽצָּֽהֳרָֽיִם: וְנָֽחֲךָ֣ יְהֹוָה֘ תָּמִיד֒ וְהִשְׂבִּ֤יעַ בְּצַחְצָחוֹת֙ נַפְשֶׁ֔ךָ וְעַצְמֹתֶ֖יךָ יַֽחֲלִ֑יץ וְהָיִ֨יתָ֙ כְּגַ֣ן רָוֶ֔ה וּכְמוֹצָ֣א מַ֔יִם אֲשֶׁ֥ר לֹֽא־יְכַזְּב֖וּ מֵימָֽיו: וּבָנ֤וּ מִמְּךָ֙ חָרְב֣וֹת עוֹלָ֔ם מֽוֹסְדֵ֥י דוֹר־וָד֖וֹר תְּקוֹמֵ֑ם וְקֹרָ֤א לְךָ֙ גֹּדֵ֣ר פֶּ֔רֶץ מְשׁוֹבֵ֥ב נְתִיב֖וֹת לָשָֽׁבֶת: אִם־תָּשִׁ֤יב מִשַּׁבָּת֙ רַגְלֶ֔ךָ עֲשׂ֥וֹת חֲפָצֶ֖ךָ בְּי֣וֹם קָדְשִׁ֑י וְקָרָ֨אתָ לַשַּׁבָּ֜ת עֹ֗נֶג לִקְד֤וֹשׁ יְהֹוָה֙ מְכֻבָּ֔ד וְכִבַּדְתּוֹ֙ מֵֽעֲשׂ֣וֹת דְּרָכֶ֔יךָ מִמְּצ֥וֹא חֶפְצְךָ֖ וְדַבֵּ֥ר דָּבָֽר: אָ֗ז תִּתְעַנַּג֙ עַל־יְהֹוָ֔ה וְהִרְכַּבְתִּ֖יךָ עַל־בָּ֣מֳתֵי אָ֑רֶץ וְהַֽאֲכַלְתִּ֗יךָ נַֽחֲלַת֙ יַֽעֲקֹ֣ב אָבִ֔יךָ כִּ֛י פִּ֥י יְהֹוָ֖ה דִּבֵּֽר:
בָּרוּךְ אַתָּה יְהֹוָה
אֱלֹהֵֽינוּ מֶֽלֶךְ הָעוֹלָם.
צוּר כָּל הָעֽוֹלָמִים.
צַדִּיק בְּכָל־הַדּוֹרוֹת.
הָאֵל הַנֶּאֱמָן.
הָאוֹמֵר וְעוֹשֶׂה.
הַמְדַבֵּר וּמְקַיֵּם.
שֶׁכָּל דְּבָרָיו אֱמֶת וָצֶֽדֶק:
נֶאֱמָן אַתָּה הוּא יְהֹוָה אֱלֹהֵֽינוּ.
וְנֶאֱמָנִים דְּבָרֶֽיךָ.
וְדָבָר אֶחָד מִדְּבָרֶֽיךָ.
אָחוֹר לֹא־יָשׁוּב רֵיקָם.
כִּי אֵל
מֶֽלֶךְ נֶֽאֱמָן וְרַחֲמָן אָֽתָּה:
בָּרוּךְ אַתָּה יְהֹוָה.
הָאֵל
הַנֶּאֱמָן בְּכָל־דְּבָרָיו:
רַחֵם עַל־צִיּוֹן
כִּי הִיא בֵּית חַיֵּֽינוּ.
וְלַעֲלוּבַת נֶֽפֶשׁ
תּוֹשִֽׁיעַ בִּמְהֵרָה בְיָמֵֽינוּ:
בָּרוּךְ אַתָּה יְהֹוָה.
מְשַׂמֵּֽחַ צִיּוֹן
בְּבָנֶֽיהָ:
שַׂמְּחֵֽנוּ יְהֹוָה אֱלֹהֵֽינוּ.
בְּאֵלִיָּֽהוּ הַנָּבִיא עַבְדֶּֽךָ.
וּבְמַלְכוּת בֵּית דָּוִד
מְשִׁיחֶֽךָ.
בִּמְהֵרָה יָבֹא
וְיָגֵל לִבֵּֽנוּ.
עַל כִּסְאוֹ לֹא יֵֽשֶׁב זָר.
וְלֹא יִנְחֲלוּ עוֹד אֲחֵרִים
אֶת כְּבוֹדוֹ.
כִּי בְשֵׁם קָדְשְׁךָ נִשְׁבַּֽעְתָּ לּוֹ.
שֶׁלֹּא יִכְבֶּה נֵרוֹ לְעוֹלָם וָעֶד:
בָּרוּךְ אַתָּה יְהֹוָה.
מָגֵן דָּוִד:
עַל הַתּוֹרָה. וְעַל הָעֲבוֹדָה.
וְעַל הַנְּבִיאִים.
(וְעַל יוֹם הַשַּׁבָּת הַזֶּה.)
וְעַל יוֹם הַכִּפֻּרִים הַזֶּה.
שֶׁנָּתַֽתָּ לָֽנוּ יְהֹוָה אֱלֹהֵֽינוּ
(לִקְדֻשָּׁה וְלִמְנוּחָה)
לִמְחִילָה וְלִסְלִיחָה וּלְכַפָּרָה
לְכָבוֹד וּלְתִפְאָֽרֶת:
עַל־הַכֹּל יְהֹוָה אֱלֹהֵֽינוּ.
אֲנַֽחְנוּ מוֹדִים לָךְ
וּמְבָרְכִים אוֹתָךְ.
יִתְבָּרַךְ שִׁמְךָ
בְּפִי כָּל־חַי
תָּמִיד לְעוֹלָם וָעֶד.
וּדְבָרְךָ אֱמֶת וְקַיָּם לָעַד:
בָּרוּךְ אַתָּה יְהֹוָה.
מֶֽלֶךְ מוֹחֵל וְסוֹלֵֽחַ
לַעֲוֹנוֹתֵֽינוּ
וְלַעֲוֹנוֹת עַמּוֹ
בֵּית יִשְׂרָאֵל.
וּמַעֲבִיר אַשְׁמוֹתֵֽינוּ
בְּכָל שָׁנָה וְשָׁנָה.
מֶֽלֶךְ עַל כָּל הָאָֽרֶץ
מְקַדֵּשׁ
(הַשַּׁבָּת וְ)
יִשְׂרָאֵל וְיוֹם הַכִּפֻּרִים: